Cun la revisiun da la lescha federala davart las armas (LArm), en vigur dapi ils 12 da december 2008, èn vegnidas stgaffidas novas obligaziuns da far in'annunzia e da dumandar ina permissiun per la populaziun svizra. Pertutgà da quai è er, tgi ch'è en possess d'ina arma da tir gia avant l'entrada en vigur da la lescha revedida. Il possess d'armas da tir sto vegnir annunzià – abstrahà da paucas excepziuns (cf. tranter auter las excepziuns tenor l'art. 42a al. 2 LArm) – entaifer in onn al post chantunal d'annunzia.

Tenor l'art. 31a LArm èn ils chantuns da nov obligads da prender encunter gratuitamain tranter auter armas e muniziun, da las qualas la possessura u il possessur n'ha nagin interess pli, e ch'ella u ch'el vul dar giu.

I n'è actualmain betg enconuschent, quantas armas ch'èn avant maun en chasadas svizras. Stimaziuns da la confederaziun fan quint cun circa 2.3 milliuns armas da tir, 1.6 milliuns da quellas èn anteriuras armas d'ordonanza. La part la pli gronda da questas armas n'è registrada nagliur. Per part èn las armas e la muniziun vegnidas iertadas e vegnan ussa tegnidas vinavant en salv, perquai che lur possessuras e lur possessurs na san betg, co ch'ellas pudessan vegnir dismessas, schebain ch'ellas e ch'els na las vulessan pli.

Cun ina campagna per consegnar voluntarmain armas da tir e muniziun sco er cun installar posts da consegna decentrals en las regiuns pudess in grond dumber d'armas da tir vegnir rimnà e dismess cumpetentamain tras il chantun. Quai gida er che talas armas e che muniziun, da las qualas la possessura u il possessur n'ha nagin interess pli, na vegnian betg malduvradas u vegnian betg en mauns fauss (p.ex. sch'ina abitaziun vegn schliada u en cas d'in enguladitsch cun infracziun). La pussaivladad da pudair consegnar en moda nuncumplitgada e gratuita in'arma che na vegn betg pli duvrada, cun muniziun e tut, reducescha ultra da quai la birocrazia tant tar la possessura u tar il possessur sco er tar il stadi.

Las sutsegnadras ed ils sutsegnaders incumbenseschan perquai la regenza:

1. La regenza duai designar posts d'annunzia regiunals, nua che la populaziun dal Grischun duai pudair consegnar voluntarmain – entaifer il termin d'annunzia fin ils 12 da december 2009 – sias armas e sia muniziun ch'ella na dovra pli e da las qualas ella n'ha nagin interess pli.

2. La regenza duai render enconuschent publicamain questa acziun regiunala per consegnar voluntarmain armas e muniziun durant l'onn 2009.

3. Per render attent la populaziun dal Grischun duai la regenza publitgar periodicamain er durant ils onns suandants che armas e che muniziun, che na vegnan betg pli duvradas, possian vegnir consegnadas voluntarmain al chantun. Il medem mument duai la regenza metter a disposiziun a las vischnancas fegls d'infurmaziun correspundents.

Cuira, ils 10 da favrer 2009

Cavigelli, Baselgia-Brunner, Barandun, Arquint, Augustin, Berther (Sedrun), Bezzola (Samedan), Blumenthal, Bucher-Brini, Buchli, Candinas, Casparis-Nigg, Casutt, Caviezel (Pitasch), Christoffel-Casty, Clavadetscher, Darms-Landolt, Dermont, Fallet, Felix, Feltscher, Florin-Caluori, Frigg-Walt, Gartmann-Albin, Hartmann (Cuira), Jäger, Jenny, Kessler, Kollegger, Menge, Mengotti, Meyer Persili (Cuira), Niederer, Nigg, Noi-Togni, Parpan, Peyer, Pfenninger, Pfiffner-Bearth, Quinter, Thomann, Thöny, Thurner-Steier, Trepp, Troncana-Sauer, Tuor, Valär, Locher Benguerel

Session: 10.02.2009
Vorstoss: rg Auftrag