Tenor l'art. 13 al. 1 lit. a da la lescha da chatscha dastgan vegnir utilisads a la chatscha auta grischuna mo schluppets d'ina channa senza magasin e d'in caliber minimal da 10,2 mm.

La determinaziun dal caliber è vegnida e vegn discutada dapi onns en moda cuntraversa tranter las chatschadras ed ils chatschaders dal chantun Grischun.

A favur dal mantegniment dal caliber vegni savens argumentà cun aspects da segirezza e cun schanzas pli grondas per la selvaschina.

Ils chantuns Glaruna, Berna, Sutsilvania e Vallais, che han – ultra da la chatscha da patenta – relaziuns topograficas sumegliantas (muntognas autalpinas), desistan per part d'in caliber minimal u han fixà quel bler pli bass, numnadamain tranter 5,6 mm e 7 mm.

Tut ils chantuns numnads qua survart prevesan dentant ina distanza da tir maximala da 200 m per la chatscha auta, cun ina toleranza da maximalmain 10% per sbagls da stimaziun.

Il chantun Grischun n'enconuscha dentant betg ina distanza da tir maximala.

Ussa po vegnir constatada ina tendenza en la politica da chatscha, tenor la quala adina dapli offerentas ed offerents porschan perspectivs da mira che disponan d'apparats che mesiran la distanza. Quests apparats pon ultra da quai vegnir cumbinads cun in uschenumnà sistem d'infurmaziun ballistic. A la chatschadra u al chatschader che ha regulà sia arma sin 100 m mussa quest sistem – resguardond la ballistica da la muniziun – per quants centimeters ch'ella u ch'el sto tegnair pli aut il schluppet (correctura dal punct da mira), sche la distanza da la selvaschina che vegn mesirada è pli gronda.

Sut questas premissas daventan ils motivs, ch'èn vegnids numnads qua survart per mantegnair il caliber grischun, obsolets.

Bler pli raschunaivel fissi d'introducir ina distanza da tir maximala, sco quai ch'ils chantuns cumparegliabels prevesan en lur legislaziun da chatscha. Uschia vegni tegnì quint cumplainamain dals aspects da segirezza. E bain nagin na vul pretender ch'ils ulteriurs chantuns alpins valiteschian quest aspect sco main impurtant. En quests chantuns n'èn er vegnids registrads nagins accidents da chatscha pervia da projectils che fissan sgulads memia lunsch. Dal rest dastga la chatschadra u il chatschader sajettar sin la selvaschina mo, sch'i sa chatta in tschiffaballas suffizient davos l'animal.

Medemamain vegn er la schanza per la selvaschina resguardada adequatamain cun l'introducziun da la distanza da tir maximala.

Tenor la legislaziun da chatscha vertenta e cun ils perspectivs da mira numnads qua survart fissi numnadamain senz'auter pussaivel oz da sajettar p.ex. sin tschiervs or d'ina distanza da passa 300 m. Quai pudess er propi vegnir fatg, tant pli perquai ch'igl è permess a las chatschadras ed als chatschaders dal Grischun da chargiar sez lur patronas e d'extender qua tras la distanza da tir.

Cunter la determinaziun d'in caliber minimal tenor ils standards dals chantuns numnads qua survart na datti naginas objecziuns. Il caliber minimal na duess dentant betg surpassar 7 mm.

La regenza vegn incumbensada:

1. da reveder l'art. 13 al. 1 lit. a da la lescha da chatscha uschia, che la disposiziun davart il caliber minimal da 10,2 mm vegn stritgada or da la lescha. Sche la regenza duess esser da l'avis ch'in caliber minimal saja raschunaivel, dastgass quel vegnir fixà a maximalmain 7 mm;

2. da determinar en la lescha da chatscha ina distanza da tir maximala da 200 m per sajettar la balla, cun ina toleranza da maximalmain 10% per sbagls da stimaziun. Graduaziuns da las distanzas da tir vers engiu – per sajettar chavriels, vulps, tais e muntanellas – fissan raschunaivlas e pudessan senz'auter vegnir previsas.

Cuira, ils 11 da favrer 2009

Menge, Thomann, Casutt, Donatsch, Frigg-Walt, Gartmann-Albin, Jaag, Jäger, Jenny, Keller, Kunz, Meyer Persili (Cuira), Peyer, Pfenninger, Pfiffner-Bearth, Ragettli, Thöny, Toschini, Trepp, Locher Benguerel, Züst

Session: 11.02.2009
Vorstoss: rg Auftrag