Navigation

Inhaltsbereich

Incumbensa Parolini concernent ils nivels da cumpetenza linguistica per las scolas rumantschas/talianas

Sessiun: 11.02.2009
Tenor il concordat HarmoS ch'è vegnì refusà il november 2008 eri previs, ch'i saja obligatoric d'emprender duas linguas estras. Ina da questas duas linguas duaja esser ina segunda lingua naziunala, l'autra l'englais.

Plinavant stevi scrit en l'artitgel 4 dal concordat HarmoS: "Per tuttas duas linguas estras vegnan prescrittas las medemas cumpetenzas per la fin da la scola obligatorica." Questa frasa pretenda che tut las scolaras e che tut ils scolars sappian a la fin da la scola obligatorica ina segunda lingua naziunala gist uschè bain sco l'englais.

Per las scolas tudestgas dal Grischun po quai esser en urden, sch'i vegn prendì en mira il medem nivel areguard las enconuschientschas da talian e d'englais. Per las scolas obligatoricas rumantschas e talianas vul quai dentant dir ch'ils giuvenils che vegnan ord scola duain savair medem bain – ubain medem mal – tudestg ed englais.

Ma per tut las Rumantschas e per tut ils Rumantschs sco er per tuttas e per tuts dal Grischun talian, che na s'orienteschan betg vers il Tessin, èsi absolutamain necessari ch'ellas e ch'els sappian fitg bain tudestg. En mintga cas è quai bler pli impurtant che da savair englais. Sin il martgà da plazzas d'emprendissadi ubain er en la scola media ston ellas ed els numnadamain tuttenina sa mesirar cun scolaras e cun scolars tudestgs. Ina unifurmaziun dals nivels da cumpetenza da las scolaras e dals scolars or da las differentas gruppas linguisticas, sco quai ch'igl era intenziunà cun il concordat HarmoS, sconuscha las realitads e cuntegna il privel che las scolaras e ch'ils scolars rumantschs e talians vegnan disfavurisads fermamain.

Questa finamira concernent ils nivels da cumpetenza en l'artitgel 4 dal concordat HarmoS ha chaschunà grondas discussiuns, en spezial en la part rumantscha dal Grischun, ed è er stada in motiv ch'il concordat è vegnì refusà.

Per che la proxima revisiun totala da la lescha da scola resguardia meglier ch'il project HarmoS ils giavischs da las differentas regiuns linguisticas, vegn la regenza incumbensada da fixar – confurm a las differentas cundiziuns ed als differents basegns – ils nivels da cumpetenza da l'emprima, da la segunda e da la terza lingua dals giuvenils che vegnan ord scola en las scolas obligatoricas rumantschas e talianas sco er en las scolas obligatoricas bilinguas.

Cuira, ils 11 da favrer 2009

Parolini, Fasani, Pedrini, Arquint, Augustin, Berther (Mustér), Berther (Sedrun), Bezzola (Samedan), Bezzola (Zernez), Bischoff, Bondolfi, Brantschen, Brüesch, Buchli, Bundi, Butzerin, Caduff, Campell, Casutt, Caviezel (Pitasch), Cavigelli, Christoffel-Casty, Conrad, Darms-Landolt, Dermont, Fallet, Gartmann-Albin, Giovanoli, Hartmann (Champfèr), Jäger, Jenny, Keller, Kleis-Kümin, Koch, Mengotti, Niederer, Noi-Togni, Peer, Perl, Pfäffli, Pfister, Plozza, Quinter, Ragettli, Ratti, Righetti, Sax, Thomann, Thurner-Steier, Troncana-Sauer, Tuor, Wettstein, Zanetti, Furrer-Cabalzar

Session: 11.02.2009
Vorstoss: rg Auftrag

Resposta da la regenza

La regenza vegn incumbensada da procurar – en il rom da la revisiun totala planisada da la lescha da scola grischuna – ch'ils nivels da cumpetenza ch'èn mintgamai fixads per l'emprima, per la segunda e per la terza lingua tegnian quint er en l'avegnir da las circumstanzas e dals basegns spezials da las singulas regiuns linguisticas. Questa incumbensa sa basa cunzunt sin la tema ch'il tudestg pudess vegnir indeblì en las parts rumantschas e talianas dal chantun, perquai ch'i vegn prendì en mira in nivel da cumpetenza equivalent en tuttas duas linguas estras, e ch'il tudestg pudess perder en questas regiuns sia posiziun da preferenza indispensabla envers l'englais.

Questa tema ch'è formulada en l'intervenziun parlamentara sa basa sin ina malchapientscha ch'è vegnida creada e derasada en connex cun l'interpretaziun da l'art. 4 da la cunvegna interchantunala davart l'armonisaziun da la scola obligatorica (concordat HarmoS). Quest artitgel di: "Per tuttas duas linguas estras vegnan prescrittas las medemas cumpetenzas per la fin da la scola obligatorica." Questa formulaziun vul segirar in standard minimal ed è – per quels chantuns che introduceschan l'englais sco emprima lingua estra – in agid per proteger la segunda lingua naziunala. Natiralmain è mintga chantun liber da fixar il nivel da cumpetenza per ina lingua naziunala, che vegn tschernida sco lingua estra, sur il standard minimal ch'è fixà sin plaun interchantunal. Il giavisch da promover e da rinforzar las linguas naziunalas en tut las regiuns da la Svizra vegn exprimì differentamain (dentant betg adina explicitamain) tant en il concordat HarmoS sco tal sco er en ils commentaris respectivs. Uschia menziunescha per exempel l'art. 2 dal concordat: "Respectond las differentas culturas en la Svizra plurilingua resguardan ils chantuns da cunvegna il princip da la subsidiaritad, cur ch'els prendan las mesiras d'armonisaziun." En il senn da questa tenuta averta avess er il concept grischun da linguas, cun tut sias particularitads, chattà facilmain sia plazza en il rom dal concordat HarmoS.

Sut quest aspect ed independentamain dal concordat HarmoS po vegnir constatà il suandant areguard las pretensiuns ch'èn formuladas en l'incumbensa: Er la regenza va cumplainamain d'accord cun ils giavischs ch'èn formulads en l'incumbensa parlamentara. Ella vegn a far tut il pussaivel, per che l'impurtanza speziala da las trais linguas chantunalas sco emprimas linguas e sco segundas linguas restia mantegnida en las differentas regiuns linguisticas e per ch'ils nivels da cumpetenza dals giuvenils che vegnan ord scola vegnian fixads per l'emprima, per la segunda e per la terza lingua er en l'avegnir confurm a las circumstanzas spezialas e confurm als basegns particulars.

La regenza è pronta d'acceptar questa incumbensa.

27 d'avrigl 2009