Navigation

Inhaltsbereich

Dumonda Jäger concernent l'applicaziun effizienta da l'energia en il sectur da l'informatica

Sessiun: 11.02.2009
Sco en mintga administraziun moderna vegnan utilisads oz ils meds d'informatica ils pli differents er en ils posts da servetsch dal chantun. En blers lieus dovran ils computers ed auters apparats electrics anc adina memia blera electricitad nunnecessaria. Gronds "maglia-energia" èn savens ils centers da calculaziun resp. ils servers sco tals, che dovran per regla er indrizs da climatisaziun per pudair garantir in manaschi segir. Ma er il consum d'electricitad da computers, da stampaders e.u.v. en il modus da standby chaschuna – ultra d'in consum d'energia nunnecessari – custs finanzials totals che na dastgan betg vegnir negligids. En quest connex poi vegnir renvià a programs novs che pudessan per exempel vegnir installads sin tut ils computers da l'administraziun. Tals programs pussibiliteschan che tut ils apparats ch'èn en il modus da standby vegnan mess en in modus per spargnar energia, quai che permettess segiramain da spargnar tut en tut in quantum d'energia considerabel. Smatgond sin ina tasta, è in computer cun in tal program immediatamain puspè pront per il diever.

Il "biro senza palpiri" – ch'era vegnì prognostitgà ina giada – è sa mussà sco clera illusiun. Er en las administraziuns publicas n'è il consum da palpiri betg sa reducì. Er qua sa laschan dentant spargnar energia e finanzas, sch'i vegn duvrà palpiri da recicladi en moda uschè consequenta sco pussaivel. En il rapport da las gruppas da products da la centrala chantunala per stampats e material èsi formulà – sco finamira per ils onns 2008 e 2009 – d'augmentar la quota da palpiri da recicladi per mintgamai almain 10 %.

La regenza vegn supplitgada da respunder las suandantas dumondas:

1. Quant importan ils custs totals d'energia per l'informatica en l'administraziun chantunala? En tge secturs principals pon quests custs vegnir dividids?

2. Nua vesa la regenza pussaivladads da spargnar? Co e tenor tge urari vegnan realisadas il proxim temp talas mesiras per spargnar energia?

3. En tge furma barattan ils chantuns activamain lur experientschas areguard in'applicaziun effizienta da l'energia en il sectur da l'informatica?

4. Quant gronda è la quota actuala da palpiri da recicladi vi da tut il palpiri che sorta da la centrala chantunala per stampats e material? Co è questa quota sa sviluppada en il decurs dals ultims 5 onns?
Cun tge mesiras vegnan cuntanschidas las finamiras per augmentar il palpiri da recicladi, las qualas èn numnadas en il rapport da las gruppas da products?

Cuira, ils 11 da favrer 2009

Jäger, Meyer-Grass (Claustra Vitg), Thöny, Arquint, Baselgia-Brunner, Feltscher, Frigg-Walt, Gartmann-Albin, Jaag, Jenny, Kleis-Kümin, Koch, Menge, Meyer Persili (Cuira), Michel, Niederer, Noi-Togni, Pfiffner-Bearth, Tenchio, Trepp, Furrer-Cabalzar, Locher Benguerel

Session: 11.02.2009
Vorstoss: rg Anfrage

Resposta da la regenza

1. Ils custs d'energia per l'informatica da biro han importà l'onn 2008 tut en tut circa 294'000 francs. Ils custs d'electricitad sa basan per part sin stimaziuns, perquai ch'igl èn installads quintaders separads dal current electric per apparats da l'informatica mo en las localitads dal center da calculaziun da l'uffizi d'informatica (UI). Ils custs d'energia sa laschan divider en ils suandants secturs:

a) Localitads centralas dal center da calculaziun (custs d'electricitad da ca. 160'000 francs)
En las localitads dal center da calculaziun stattan las suandantas cumponentas: servers, cumponentas centralas da la rait da datas e da la telefonia sco er stampaders a gronda prestaziun. Ils custs cuntegnan plinavant er il consum d'electricitad da la climatisaziun. Ils indrizs centrals vegnan ultra da quai er duvrads da clientas e da clients che n'appartegnan betg a l'administraziun chantunala sco vischnancas, ospitals, instituts autonoms e dretgiras districtualas. Il consum d'energia correspundent è er cuntegnì en ils custs qua survart.

b) Rait da datas e telefonia (custs d'electricitad da ca 23'000 francs)
En ils differents edifizis da l'administraziun èn installadas cumponentas decentralas da la rait da datas e da la telefonia en stgaffas da distribuziun (uschenumnads "racks"). Il consum d'electricitad dals apparats sco tals da la telefonia è resguardà qua, perquai che blers da quests apparats retiran l'electricitad sur la rait da datas.

c) Plazza da lavur inclusiv stampaders (custs d'electricitad da ca 111'000 francs)
ils custs d'energia dals computers installads, dals computers purtabels, dals moniturs, dals stampaders persunals, dals stampaders da team e dals stampaders da partiziun èn vegnids stimads. La repartiziun en quest sectur è vegnida fatga sco suonda: computers fixs e computers purtabels 45 %, moniturs 31 % e stampaders 24 %.

2. Per la regenza èsi fitg impurtant che las pussaivladads da spargnar vegnian percepidas e realisadas. Bleras mesiras èn gia vegnidas realisadas. Uschia èn la centralisaziun e la virtualisaziun tar ils servers progredidas fitg bain. En il center da calculaziun principal dal UI lavuran ils servers per gronda part en ina stanza stgira senza surveglianza che ha ina temperatura a l'intern da circa 26 grads. Uschia vegn duvrada uschè pauca energia sco pussaivel per il sfradentament. Cur che computers, moniturs e stampaders vegnan acquistads, vegnan pretendids ils labels d'energia correspundents (p.ex. anghel blau, energystar, EPEAT) ed ils custs d'energia vegnan er resguardads en l'evaluaziun. Tenor las strategias d'utilisaziun da stampaders e d'apparats multifuncziunals vegni renunzià – er pervia da motivs da custs – d'acquistar stampaders persunals, nua che quai è pussaivel. La regenza prevesa il suandant proceder:

• Cun promover la sensibilitad, cun directivas, cun resguardar ils custs totals (inclusiv ils custs d'energia) a chaschun da l'acquisiziun e cun optimar l'infrastructura da la tecnologia d'infurmaziun pon vegnir realisadas ulteriuras pussaivladads da spargnar energia.
• Sche la strategia d'informatica vegn repassada l'onn 2009, èsi da dar attenziun al tema da l'effizienza energetica.
• Per la fin da l'onn 2009 èsi previs da far ina strategia per las localitads dal center da calculaziun per ils proxims 10 onns. En quest connex duain er vegnir examinadas las pussaivladads d'installar in sistem da recuperar la chalur, quai che na vegn anc betg fatg actualmain.
• Nua che quai è pussaivel ston ils computers, ils moniturs ed ils stampaders persunals vegnir stizzads suenter che la lavur è terminada. I vegn examinà da duvrar pli savens spinas d'electricitad multiplas che han ina claviglia per interrumper il current d'electricitad (p.ex. cun ina claviglia ch'è colliada cun in cabel cun la spina multipla).
• Igl è da dar attenziun ch'ils apparats vegnian configurads uschia ch'els spargnan electricitad. En spezial duai il monitur sche pussaivel sa stizzar automaticamain, sch'el na vegn betg duvrà in tschert temp. Sche computers midan suenter ina fasa inactiva automaticamain en il uschenumnà modus da "standby" u sa mettan "a durmir", po quai chaschunar differents problems cun programs che lavuran en la rait d'ina firma. En quest connex stoi vegnir examinà, sche la situaziun sa lascha meglierar p.ex. cun novas versiuns dals programs u cun l'utilisaziun da programs supplementars (uschenumnads power-management-tools).

3. Il barat d'experientschas en dumondas da l'informatica vegn fatg primarmain sur la conferenza svizra d'informatica e sur la conferenza d'informatica dals chantuns da la Svizra orientala. In barat d'experientschas pli profund davart mesiras per spargnar energia en il senn da la dumonda qua avant maun n'ha betg gì lieu l'ultim temp. Realisond las mesiras per spargnar energia vegnan dentant er resguardads ils resultats dal studi "Green IT – Studie und Leitfaden zur Gestaltung nachhaltiger IT-Infrastrukturen" da sieber & partenaris. Quest studi cuntegna tranter auter rapports d'experientscha ed explicaziuns da persunas ch'èn responsablas per l'informatica davart il stadi da realisaziun da "Green IT" en manaschis svizzers da la tecnologia d'infurmaziun.

4. La part da palpiri reciclà da la vendita totala da palpiri da la centrala chantunala per stampats e material (CSM) importa actualmain circa 45 %. Grazia ad ina cussegliaziun pli intensiva dals posts da servetsch concernent las pussaivladads da duvrar palpiri reciclà ha quella part pudì vegnir augmentada per 5 % dapi l'onn 2006. Cifras da cumparegliaziun d'anteriurs onns na datti naginas. En il sectur dal copiar ha la part dal palpiri reciclà pudì vegnir augmentada per 10.33 % l'onn 2008. Cun in ulteriur augment marcant en quest sectur poi vegnir fatg quint pervia da l'introducziun d'in nov palpiri reciclà (Nautilus) l'onn current. Ultra da quai duain vegnir examinadas las pussaivladads d'ina utilisaziun pli vasta da palpiri reciclà en il sectur da las scrittiras stampadas (p.ex. da las missivas). Pervia da questas mesiras poi vegnir fatg quint cun in ulteriur augment da la part dal palpiri reciclà vi dal consum total da palpiri.

5 da matg 2009