La taxaziun tenor la capacitad economica è la pitga centrala dal dretg fiscal federal e grischun. Divergenzas da quest princip na vegnan betg chapidas da la gronda part da las pajataglias e dals pajataglias. En spezial en temps economicamain difficils fan las burgaisas ed ils burgais pli fitg stim d'ina taxaziun gista. In tractament inegual da las pajataglias e dals pajataglias, sco che quai è il cas tar la taxaziun pauschala (taxaziun tenor las expensas), na vegn betg chapì da vasts circuls da la populaziun. En il chantun Turitg han las votantas ed ils votants mess ina fin a questa pratica abolind la taxaziun pauschala. Tar la confederaziun è pendenta ina iniziativa dal chantun Son Gagl ch'è vegnida lantschada da la fracziun da la PCD. Ina intervenziun sumeglianta ha inoltrà la PCD en il parlament chantunal da Lucerna.

En il chantun Grischun èn l'onn 2006 vegnidas taxadas 227 persunas tenor las expensas. Tenor il quint dal chantun 2007 èn vegnids incassads en quest connex circa 10 milliuns francs sin basa da taxaziuns pauschalas. En vista dal total da las entradas fiscalas da circa 687 milliuns francs n'è quai betg in import ch'è fitg relevant. Quel na crudass er betg simplamain davent dal tuttafatg, sche la taxaziun tenor las expensas vegniss abolida. Er sch'in pèr persunas ritgas che profitan da la taxaziun pauschala midassan lur domicil fiscal, vegnissan las perditas cumpensadas per gronda part da las entradas che resultassan da la nova taxaziun correcta.

Las sutsegnadras ed ils sutsegnaders proponan pervia da quai ch'ils artitgels 14 e 15 da la lescha da taglia per il chantun Grischun vegnian abolids.


Cuira, ils 20 d'avrigl 2009

Peyer, Arquint, Baselgia-Brunner, Bucher-Brini, Frigg-Walt, Gartmann-Albin, Jaag, Jäger, Menge, Meyer Persili (Cuira), Pfenninger, Pfiffner-Bearth, Thöny, Trepp, Locher Benguerel, Michel (Cuira)

Session: 20.04.2009
Vorstoss: rg Parlamentarische Initiative