Suenter il rapiment e suenter il mazzament dad Ylenia L. ils 31 da fanadur 2007 è il tema d'in sistem d'alarm en cas da rapiments d'uffants vegnì mess en discussiun dals meds da massa e pia tractà sin il plaun politic cun differentas intervenziuns e petiziuns (moziuns 07.3553 e 07.3554 da la cumissiun dal cussegl naziunal per dumondas giuridicas concernent l'introducziun d'in sistem d'alarm en cas da rapiments e concernent l'endrizzament d'in sistem d'alarm per MMS en cas da spariziuns d'uffants; interpellaziun 08.3452 concernent il progress da questas lavurs; moziun 0.3928 concernent ina cunvegna da partenariat per introducir in sistem d'alarm en cas da rapiments).

Suenter ch'in rapiment è vegnì enconuschent vegn instradada gia oz in'entira retscha da mesiras polizialas. Quellas cumpiglian la transmissiun da las infurmaziuns utilas a tut ils commandos da polizia, la publicaziun naziunala per mauns da tut ils corps da polizia e da tut ils posts da cunfin sco er eventualmain la lantschada d'ina retschertga d'alarm, cun la quala las posiziuns interchantunalas ch'èn vegnidas definidas vegnan occupadas da la polizia. Talas mesiras han sco emprima prioritad la finamira da localisar in vehichel da l'autura u da l'autur dal delict, da preparar ina intervenziun e da liberar la victima. Ellas pon vegnir iniziadas entaifer paucas minutas suenter che l'annunzia e arrivada ed ulteriuras furmaziuns spezialas ubain ulteriuras partenarias ulteriurs partenaris pon vegnir clamads u consultads. Ina integraziun supplementara, er immediata, da la publicitad vegn fatga en enclegientscha cun l'autoritad giudiziala cumpetenta (per regla la procura publica), e quai en furma da communicaziuns a las medias, d'appels da retschertga e d'annunzias da spariziun.

La Svizra enconuscha pia differentas mesiras da retschertga effizientas ch'èn colliadas sin plaun naziunal, e quai er sche la cumpetenza en cas da rapiments è per regla chaussa dal chantun pertutgà. In sistem d'alarm specific per il rapiment d'uffants sto sa laschar integrar en il connex general da tut las autras mesiras da la polizia sin plaun chantunal e federal e sto tegnair quint da l'organisaziun federalistica da la polizia en Svizra.

A chaschun da sia radunanza dals 2 d'avrigl 2009 ha la conferenza da las directuras e dals directurs chantunals da giustia e polizia incumbensà da realisar in'organisaziun da project per il project "in sistem d'alarm per il rapiment d'uffants", e quai fin la fin da l'onn 2009. Per quest intent èn er vegnids deliberads ils meds finanzials necessaris. La realisaziun pretenda in sustegn extern. Las lavurs èn vegnidas instradadas en il fratemp; ellas cumpiglian er las lavurs preliminaras d'ina gruppa da lavur da la cumissiun da polizia criminala svizra, ch'era vegnida nominada gia pli baud. Il chantun Grischun sustegna quest project. La polizia chantunala dal Grischun è – grazia a ses schef da polizia criminala, ch'è in commember da la suprastanza da l'uniun da las scheffas e dals schefs da la polizia criminala en Svizra – in post da contact ed ina coordinatura per realisar las lavurs.

Cun questa situaziun da partenza n'èsi betg necessari ch'il chantun Grischun fetschia anc atgnas stentas supplementaras. Las dumondas ch'èn vegnidas fatgas ston perquai – resguardond las explicaziuns qua survart – vegnir snegadas tuttas. Las mesiras u las intervenziuns supplementaras dal chantun u dal departament na sa demussan betg pli sco necessarias.

29 da zercladur 2009