Navigation

Inhaltsbereich

Incumbensa Pfäffli concernent l'introducziun d'in artitgel d'innovaziun per ils ospitals acuts en la lescha chantunala per promover la tgira da persunas malsaunas (LTM)

Sessiun: 22.04.2009

Ils ospitals acuts èn pertutgads oz d'in grond problem: Perquai che la finanziaziun sa referescha al passà (la calculaziun da tariffas sa basa sin datas ch'èn dus onns veglias) resulta ina largia tar la finanziaziun adina, cur che innovaziuns davart il provediment acut da pazientas e da pazients vegnan sin il martgà. Quest problem sa mussa spezialmain en cas d'implantats novs u da medicaments novs, ils quals custan bler dapli che lur products antecessurs. Uschia custa per exempel la generaziun la pli nova da stimulaturs dal cor ca. 50'000 francs per toc, entant ch'ils apparats vegls custavan mo ca. 14'000 francs.

Tenor il sistem da finanziaziun da las cassas da malsauns (model da TPP) vegnan ils implantats finanziads separadamain. Uschespert ch'ils novs implantats èn vegnids dads liber da las autoritads federalas sin donn e cust da l'assicuranza obligatorica da malsauns, è il problem schlià per quella part che vegn finanziada da la cassa da malsauns (stgars la mesadad), cunquai che er l'innovaziun è uschia gia pajada. Tenor il sistem da finanziaziun dal maun public dentant vegn l'indemnisaziun dals implantats novs ad entrar pir suenter dus onns en la calculaziun da las pauschalas pro cas.

Las pazientas ed ils pazients sco er las medias ed ils medis da famiglia enconuschan mintgamai fitg bain las novaziuns. Ils ospitals acuts en il chantun spetgan perquai che las innovaziuns giajan er directamain a favur da las pazientas e dals pazients dal Grischun. Per ils ospitals acuts dal Grischun è quai puspè collià cun auts custs supplementars che na vegnan betg cuvrids dal chantun. Sch'ils ospitals acuts transferissan lur pazientas e lur pazients en tals cas en ina instituziun extrachantunala, pudessan vegnir spargnads quests custs supplementars en ils ospitals chantunals. En quests cas na stuess il chantun dentant betg mo surpigliar automaticamain ils custs supplementars che vegnan chaschunads tras innovaziuns, mabain stuess a medem temp er anc finanziar ils custs per las dimoras staziunaras en ils ospitals extrachantunals.

La situaziun è paradoxa, n'è betg raschunaivla areguard l'economia publica e cuntegna il privel, ch'il chantun Grischun vegnia – tar las innovaziuns – en ina situaziun disfavuraivla areguard il svilup en il sectur da la medischina. Quai po avair gronds dischavantatgs per las pazientas e per ils pazients en noss chantun.

A medem temp enconuscha la lescha chantunala per promover la tgira da persunas malsaunas dentant cun l'art. 21d "Contribuziuns d'innovaziun" ina pussaivladad da finanziar novs models per la tgira e per l'assistenza ambulanta, parzialmain staziunara e staziunara da pazientas e da pazients stabels sco er da pazientas e da pazients attempads durant ina fasa d'emprova limitada. Deplorablamain vala quest artitgel mo per pazientas e per pazients stabels sco er per persunas attempadas.

En quest senn vegn la regenza perquai incumbensada da cumplettar la lescha chantunala per promover la tgira da persunas malsaunas (LTM) cun in artitgel d'innovaziun per ospitals acuts.

Cuira, ils 22 d'avrigl 2009

Pfäffli, Cahannes Renggli, Hardegger, Arquint, Barandun, Berni, Bezzola (Samedan), Bezzola (Zernez), Blumenthal, Brantschen, Brüesch, Buchli, Bühler-Flury, Campell, Casparis-Nigg, Casty, Casutt (Falera), Caviezel (Pitasch), Cavigelli, Claus, Clavadetscher, Conrad, Dermont, Donatsch, Federspiel, Feltscher, Giovanoli, Hartmann (Cuira), Hartmann (Champfèr), Jeker, Jenny, Kessler, Koch, Kollegger, Kunz, Märchy-Michel, Marti, Mengotti, Meyer-Grass (Claustra Vitg), Michel (Tavau Monstein), Nick, Noi-Togni, Parolini, Pedrini, Peer, Perl, Portner, Ragettli, Ratti, Rizzi, Tenchio, Thomann, Thurner-Steier, Toschini, Trepp, Troncana-Sauer, Valär, Vetsch (Claustra Vitg), Vetsch (Pragg-Jenaz), Wettstein, Furrer-Cabalzar, Gunzinger, Michel (Cuira)

Session: 22.04.2009
Vorstoss: rg Auftrag


Resposta da la regenza

Tenor la finanziaziun dals ospitals che s'orientescha a la prestaziun e ch'è en vigur dapi il 1. da schaner 2005 vegnan ils ospitals indemnisads sin basa dals custs pro cas standardisads d'avant dus onns. Medemamain sa basan ils contracts tariffars tranter ils ospitals e las assicuranzas da malsauns sco er las contribuziuns dal chantun per tractaments en ospitals extrachantunals sin datas d'avant dus onns. Ils augments dals custs che vegnan chaschunads da novs tractaments pli chars vegnan pia per regla indemnisads cun in retard da dus onns, e quai tant dal chantun sco er da las assicuranzas da malsauns. En ils blers cas pon ils ospitals senz'auter supportar quest retard da dus onns da l'indemnisaziun dals custs supplementars, perquai che las novas metodas da tractament ed ils novs medicaments vegnan introducids plaunsieu e perquai che la summa dals custs supplementars resulta correspundentamain plaunsieu.

En cas che la midada d'ina veglia ad ina nova metoda da tractament chaschuna ina differenza dals custs fitg gronda poi esser ch'in ospital desista, per motivs finanzials – perquai ch'el stuess finanziar sez ils custs supplementars che resultan da quai durant dus onns –, d'introducir la nova metoda.

Per in provediment optimal da la sanadad da la populaziun da noss chantun sto vegnir prendì en mira ch'i vegnia introducida a temp ina nova metoda da tractament en ils ospitals acuts en il chantun en cas che quella metoda ademplescha ils criteris che vegnan definids en la lescha federala davart l'assicuranza da malsauns LAM (efficazia, cunvegnenta ed economica) e ch'ella è correspundentamain suttamessa a la LAM. Ultra da quai sto vegnir examinà, sche ed en tge furma ch'i po vegnir integrada en la lescha per promover la tgira da persunas malsaunas ina regulaziun, tenor la quala il chantun e/u las vischnancas pon surpigliar l'entira u ina part da la finanziaziun dals custs supplementars da la nova metoda a partir dal mument da l'introducziun durant maximalmain dus onns.

Tenor l'art. 21d da la lescha per promover la tgira da persunas malsaunas ha il chantun la pussaivladad da finanziar novs models per la tgira e per l'assistenza ambulanta, parzialmain staziunara e staziunara da pazientas e da pazients stabels sco er da persunas attempadas durant ina fasa d'emprova limitada. L'intent da quai è quel d'examinar las novas furmas da tgira e d'assistenza areguard lur pratitgabladad. Quest artitgel na stat correspundentamain betg en connex cun il giavisch che vegn formulà en l'incumbensa.

La regenza è pronta d'acceptar questa incumbensa en il senn da las explicaziuns qua survart. Ella vegn a suttametter al cussegl grond ina proposta da regulaziun correspundenta en il rom da l'adattaziun da la lescha per promover la tgira da persunas malsaunas en il sectur da la finanziaziun dals ospitals ch'è necessaria sin fundament da la revisiun parziala da la lescha federala davart l'assicuranza da malsauns.

15 da zercladur 2009