La part teoretica da l'examen da chatscha è vegnida realisada enfin ussa – sco ch'igl è vegnì remartgà correctamain en la dumonda – en moda decentrala en pliras regiuns. L'onn 2008 han quests examens gì lieu a Cuira, a Zuoz ed a Roveredo. Quest onn han ils examens stuì vegnir fatgs da tut las candidatas e da tut ils candidats per l'emprima giada mo a Cuira. En cumparegliaziun cun la regulaziun vertenta ha questa soluziun numerus avantatgs. Quels vegnan tractads en las respostas a las singulas dumondas.

1. En las regiuns han ils examens teoretics da chatscha stuì vegnir fatgs per part en localitads che n'èn betg stadas adattadas per quai. Qua n'è betg stà fitg cuntentaivel, ni per las expertas e per ils experts da l'examen ni per las candidatas e per ils candidats. Cun il museum da la natira dal Grischun resp. cun la chasa Brandis a Cuira sco lieu d'examen po vegnir purschida ina infrastructura optimala a tut las candidatas ed a tut ils candidats. Là pon las candidatas ed ils candidats absolver ils quatter roms d'examen er senza lungs temps da spetga. Per tut las candidatas e per tut ils candidats pon ultra da quai vegnir duvrads per l'examen ils medems preparats dal museum da la natira. Er l'infrastructura da l'examen sto vegnir installada mo ina giada. Sin basa da tut questas ponderaziuns sa mussa la soluziun centrala cun Cuira sco lieu d'examen sco pli favuraivla en cumparegliaziun cun las soluziuns decentralas cun plirs lieus d'examen.

2. Ils lieus principals per l'examen davart la manipulaziun da l'arma e per l'examen da tir èn Domat per il Grischun dal nord, Tavau per il Grischun central e Zernez per il Grischun dal sid. Las plazzas da tir da Mustér e da Roveredo vegnan resguardadas, sch'i s'annunzian dapli che diesch candidatas e candidats per quests lieus. En cas da l'examen davart la manipulaziun da l'arma e da l'examen da tir è la regulaziun decentrala sa cumprovada cumplainamain. Perquai na datti en quest connex nagin motiv per centralisar quest examen a Cuira.

3. Ponderaziuns finanzialas n'èn betg stadas e n'èn betg decisivas per realisar a Cuira la part teoretica da l'examen da chatscha. Decisiva per questa decisiun è stada unicamain l'infrastructura optimala en il museum da la natira resp. en la chasa Brandis. Là poi vegnir garantì a tut las candidatas ed a tut ils candidats che l'examen vegnia fatg en ina moda optimala e gista. Per motivs evidents resultan da questa soluziun centrala dentant er respargns. Da l'organisaziun da l'examen da qualificaziun teoretic a Cuira è resultada ina reducziun da fin ussa diesch dis d'examen a set dis d'examen, e quai tar il medem dumber da candidatas e da candidats d'examen. Correspundentamain ston las expertas ed ils experts da l'examen er impunder main temp.

La regenza na sconuscha insumma betg il fatg che candidatas e che candidats da regiuns periferas dovran dapli temp per vegnir a Cuira per far l'examen. Quest fatg vegn resguardà cun fixar ils temps d'examen. Per ils motivs menziunads qua survart predomineschan tut en tut dentant cleramain ils avantatgs d'ina soluziun centrala. Ord vista da la regenza è pervia da quai da preferir er en il futur questa nova regulaziun cun Cuira sco lieu d'examen.

6 da fanadur 2009