Navigation

Inhaltsbereich

Incumbensa Keller concernent l'Expo 2015 a Milaun

Sessiun: 16.06.2009
L'onn 2015 vegn Milaun ad organisar in'exposiziun mundiala (Expo 2015). In dals temas principals da l'occurrenza vegn ad esser l'aua en sia funcziun da resursa natirala primordiala.

Las lavurs preparativas èn en curs ed er en il chantun Grischun vegni discutà davart iniziativas localas (da las regiuns e da las uniuns da traffic) che han l'intent da propagar ils products da noss chantun a l'Expo 2015.

La participaziun ad in'exposiziun mundiala en la Lumbardia – ina regiun cun passa 10 milliuns abitantas ed abitants – è ina occasiun extraordinaria per far reclama per il Grischun, per ils auters chantuns e per la Svizra. Il tema "aua" è in tema fitg preschent e fitg impurtant per noss chantun e per tut la Svizra e nossas experientschas sin quest champ pon segiramain interessar er la Expo 2015.

Perquai èsi necessari d'agir en moda coordinada, l'emprim entaifer il chantun e pli tard er cun ils auters chantuns e cun la confederaziun. Mo uschia poi vegnir profità optimalmain da las schanzas che questa exposiziun mundiala extraordinaria porscha.

Cun questa incarica vegn la regenza supplitgada da nominar ina persuna che, sin il plaun politic:

a) coordinescha ed organisescha la preschentaziun dal chantun Grischun (e da tut las interessentas sco er da tut ils interessents publics e privats) a la Expo 2015;

b) coordinescha la preschentaziun dal chantun Grischun – en il rom da la preschentaziun da la Svizra – cun auters chantuns e cun la confederaziun a la Expo 2015;

c) collavura cun ils territoris da muntogna da las regiuns che cunfineschan cun noss chantun, e quai cun la finamira da propagar ils products communabels (sco p.ex. Viafier retica, Rezia energia, Alta Rezia) a la Expo 2015.

Puschlav, 16 da zercladur 2009

Keller, Toschini, Zanetti, Arquint, Augustin, Baselgia-Brunner, Blumenthal, Bondolfi, Brüesch, Bucher-Brini, Bundi, Butzerin, Campell, Candinas (Rabius), Casutt (Falera), Cavigelli, Christoffel-Casty, Conrad, Dudli, Fasani, Felix, Feltscher, Giovanoli, Jäger, Kleis-Kümin, Mengotti, Noi-Togni, Parolini, Parpan, Pedrini, Peyer, Plozza, Portner, Quinter, Righetti, Sax, Tenchio, Thöny, Thurner-Steier, Trepp, Tuor, Wettstein, Zurfluh

Session: 16.06.2009
Vorstoss: rg Auftrag

Resposta da la regenza

Cun il tema proponì "nutrir il planet, energia per la vita" ha l'exposiziun mundiala da l'onn 2015 a Milaun er in potenzial per il chantun Grischun. In interess spezial giaudan l'infurmaziun previsa da las visitadras e dals visitaders davart eventualas meglieraziuns da las disas d'alimentaziun e da las modas da viver, e la discussiun davart l'access ad aua da baiver. En vista a quest potenzial ha il departament d'economia publica e fatgs socials (DES) elavurà differentas opziuns da participaziun sco er pussaivladads da proceder.

En connex cun las lavurs preliminaras e cun ils scleriments èsi sa mussà che l'Expo 2015 munta tranter auter la schanza da pudair preschentar meglier ils potenzials da la Svizra taliana e da valurisar quels sco er da rinforzar la collavuraziun sur ils cunfins cun las provinzas da Sondrio e da Com, dentant er cun il chantun Tessin.

La regenza vegn a profitar dals contacts formals existents per discutar cun las regiuns menziunadas davart ina pussaivladad da proceder. Tut tenor il resultat da quests contacts vegn la regenza a determinar ina structura ed in'organisaziun da project adequata. La regenza nominescha las persunas responsablas en las posiziuns centralas. La furma d'organisaziun da l'opziun tschernida vegn a constar cun la preschentaziun dal chantun.

Natiralmain ch'i sto – pli e pli concret che quest project vegn – vegnir nominà a temp util ina coordinatura u in coordinatur respectivamain ina manadra u in manader da project. Questa persuna duai coordinar ed organisar il concept per la preschentaziun dal Grischun a l'Expo 2015, e quai resguardond las ponderaziuns politicas, socialas ed economicas surregiunalas. La preschentaziun dal chantun Grischun sto vegnir accordada cun la cumparsa da la Svizra en collavuraziun cun il DFAE, cun autras regiuns e citads involvidas, e particularmain cun il chantun Tessin. L'Expo 2015 na permetta la finala betg mo da collavurar cun las regiuns cunfinantas, mabain munta er la schanza da far reclama per products grischuns singulars.

En il senn da questas explicaziuns è la regenza pronta d'acceptar l'incumbensa.

3 da settember 2009