Navigation

Inhaltsbereich

Dumonda Righetti concernent l'applicaziun da las prescripziuns da submissiun

Sessiun: 16.06.2009
Nus avain constatà ch'il maun public applitgescha l'ultim temp pli e pli savens criteris da decisiun che dattan sistematicamain la preferenza a las offerentas ed als offerents cun il pretsch il pli bass, uschia che auters criteris d'agiudicaziun van en emblidanza. Quai ha per consequenza ch'i vegn fatg abus, ch'i dat accidents sin ils plazzals e ch'i resulta in dumping dals salaris, sco che quai è gia capità sin ils plazzals da la Alp Transit Ceneri e tar il stabiliment per arder ruments da Giubiasco.

Ils dus ultims exempels ch'èn vegnids a la glisch en il chantun Tessin, pudessan daventar realitad er qua tar nus.

En la publicaziun per la gestiun da material en connex cun il tunnel dal sviament a Roveredo ha l'uffizi federal da vias (UVIAS) effectivamain dà ina paisa da 90% al criteri dal pretsch ed ha uschia quasi laschà ord egl ils auters criteris. Quai signifitga ch'i gudogna quella firma che offra il pretsch il pli bass, senza insumma resguardar la qualitad, ils aspects ecologics, la fidaivladad dal pretsch offrì ed in program da construcziun che tegna quint d'in engaschament adequat dal persunal sco er da las emprendistas e dals emprendists e.u.v.

Nus sperain ch'il maun public na sa laschia betg manar en errur da questa nova moda speculativa che po per l'ina signifitgar custs da preventiv pli bass ch'èn politicamain supportabels al cumenzament, ma che introducescha per l'autra in grond dumber d'indicaturs cuntraris che pon eliminar l'avantatg economic presumà.

Nus sperain ch'il maun public haja la voluntad da tscherner l'offerta cun il pretsch il pli favuraivel, la quala tegna dentant er quint da las reglas contractualas sco er da l'experientscha e da l'enconuschientscha specifica, da l'occupaziun, da la scolaziun, da las taglias e dals pajaments a las assicuranzas socialas.

Plinavant vulessan nus render attenta la regenza ad in auter fatg negativ: Interpresas che han survegnì incaricas publicas surdattan questas incaricas a firmas excorporadas a l'exteriur (p.ex. pajais da l'ost), las qualas subsurdattan da lur vart las lavurs ad interpresas che engaschan persunal sutpajà e quai a cundiziuns generalas precaras.

A la regenza vegnan fatgas las suandantas dumondas:

a) È ella pronta da dar – en la crisa economica actuala – dapli attenziun a questa situaziun e d'augmentar la paisa specifica ch'ella dat als criteris d'agiudicaziun independents dal pretsch (p.ex. engaschament d'emprendistas e d'emprendists, protecziun da l'ambient e.u.v.)?

b) Ha ella previs controllas spezialas per impedir subsurdadas "selvadias"?

c) È ella pronta d'intervegnir tar il UVIAS, per ch'i vegnian resguardads pli e pli ils auters criteris d'agiudicaziun independents dal pretsch?

Puschlav, ils 16 da zercladur 2009

Righetti, Pedrini, Keller, Augustin, Berther (Sedrun), Bleiker, Blumenthal, Brantschen, Bucher-Brini, Buchli, Butzerin, Cahannes Renggli, Candinas (Rabius), Castelberg-Fleischhauer, Casty, Cavigelli, Christoffel-Casty, Conrad, Fallet, Fasani, Felix, Frigg-Walt, Gartmann-Albin, Giovanoli, Hardegger, Jäger, Kleis-Kümin, Mani- Heldstab, Meyer Persili (Cuira), Parpan, Peyer, Plozza, Portner, Quinter, Stiffler, Stoffel, Thöny, Thurner-Steier, Trepp, Tuor, Zanetti, Candinas (Mustér)

Session: 16.06.2009
Vorstoss: rg Anfrage

Resposta da la regenza

a) Da princip dastgi vegnir constatà per il chantun Grischun che la crisa economica actuala n'è anc betg sa fatga valair cun fermezza en il sectur da construcziun appellà e che las interpresas da construcziun indigenas – er tenor la stimaziun da la societad grischuna dals impressaris constructurs – han anc adina ina reserva da lavur magari gronda. En vista al lev regress dal sectur da construcziun privat che sa mussa, ha la regenza mess a disposiziun per l'onn current e per l'onn proxim meds finanzials supplementars ch'èn destinads al sectur d'infrastructura e che van pia directamain a favur da l'economia grischuna. Tenor las statisticas da surdada da plirs onns dal chantun van numnadamain passa 90 pertschient da tut las incaricas publicas da construcziun ad interpresas indigenas.

Ils posts d'acquisiziun dal chantun applitgeschan – tut tenor il gener e la cumplexitad da l'incarica sco er tut tenor la procedura en chaussa – differentas cumbinaziuns da criteris d'agiudicaziun, per arrivar la finala a l'offerta economicamain la pli favuraivla per il chantun. Per quest intent sa servan els dentant exclusivamain da criteris d'agiudicaziun che sa refereschan a l'incarica sco il pretsch, la qualitad u ils termins. Criteris d'agiudicaziun esters sco il domicil fiscal, las plazzas da lavur localas, la distribuziun adequata da las incaricas na vegnan – cun excepziun da la scolaziun d'emprendistas e d'emprendists – insumma betg applitgads per valitar las offertas, e quai pervia da las difficultads giuridicas e da princip che stattan en connex cun quests criteris. Ils criteris da la cumpatibilitad ecologica ston dal rest star en in connex direct cun la prestaziun che vegn furnida e na dastgan betg avair in effect discriminant. Tenor la pratica da la dretgira administrativa dal Grischun ha la finala il criteri d'agiudicaziun "pretsch" per regla ina impurtanza primordiala. La dretgira ha fixà ch'il pretsch sto avair tant dapli paisa, pli pitschen ch'il grad da difficultad d'ina incarica è.

b) Tenor l'art. 10 da la lescha chantunala da submissiun garantescha l'instanza d'acquisiziun cun agid d'ina decleranza persunala che la purschidra u ch'il purschider observia las disposiziuns per la protecziun da lavur e las cundiziuns da lavur e ch'ella u ch'el obligheschia per contract terzas persunas, a las qualas ella u el dat vinavant incaricas, er d'observar questas prescripziuns. L'examinaziun, sche questas prescripziuns vegnan observadas, surpiglian en noss chantun las cumissiuns professiunalas pariteticas (CPP) che ageschan per regla independentamain u alura sin denunzia dal maun public u da persunas privatas. Sch'i vegn constatada ina cuntravenziun, pronunzia la regenza las sancziuns necessarias. Quest sistem da controlla è sa cumprovà fitg bain il passà, uschia che la regenza na vesa nagin ulteriur basegn d'agir dal puntg da vista actual.

c) Ils cas da submissiun che las sutsegnadras e ch'ils sutsegnaders han descrit pertutgan evidentamain surdadas publicas da la confederaziun resp. dal chantun Tessin ed èn perquai en la suletta cumpetenza e responsabladad da quels. Perquai ch'er la confederaziun ademplescha sias obligaziuns legalas en moda autonoma sin il champ da las acquisiziuns publicas, ha il chantun fitg pitschnas pussaivladads da prender influenza e d'intervegnir en il senn da la dumonda.

9 da settember 2009