Navigation

Inhaltsbereich

Incumbensa Thurner-Steier concernent la simplificaziun da la procedura da permissiun per ils edifizis existents ordaifer la zona da construcziun

Sessiun: 16.06.2009
La legislaziun chantunala da planisaziun dal territori e da construcziun vertenta pretenda ch'il chantun approveschia – en cas d'edifizis ordaifer la zona da construcziun – midadas vi da la fatschada d'edifizis existents e midadas sumegliantas pli pitschnas vi d'edifizis existents. Las vischnancas, che han uschiglio la cumpetenza unica per dumondas che concernan la polizia da construcziun, ston uschia er desister da la cumpetenza da decider davart las midadas architectonicas pli pitschnas da tut gener vi da la substanza architectonica existenta, sch'ils edifizis sa chattan ordaifer ina zona da construcziun.

Cun la regulaziun actuala da la procedura EOZ (edifizis ordaifer la zona da construcziun) vegnan il temp ed ils custs che ston vegnir impundids da las autoritads chantunalas e communalas ch'èn cumpetentas tuttas duas tenor il dretg vertent, ma er da las patrunas e dals patruns, augmentads en moda considerabla e sproporziunada.

Las sutsegnadras ed ils sutsegnaders supplitgeschan perquai la regenza da suttametter al cussegl grond ina revisiun da la legislaziun chantunala da planisaziun dal territori e da construcziun. Tenor quella duai – en il rom da la procedura EOZ – la cumpetenza per midadas pli pitschnas vi d'edifizis existents ordaifer la zona da construcziun restar definitivamain ed unicamain tar las vischnancas, premess ch'ils edifizis vegnian utilisads cun il medem intent er suenter las midadas.

Las midadas pli pitschnas cumpiglian tenor las ideas da las sutsegnadras e dals sutsegnaders en spezial:

• il schlargiament u la construcziun da fanestras e dad ischs;

• la montascha da collecturs solars da passa 1.5 m2;

• la montascha d'ina pensla sco susta a l'entrada;

• midadas sumegliantas pli pitschnas vi d'edifizis ordaifer la zona da construcziun.

La legislaziun chantunala da planisaziun dal territori e da construcziun vertenta ha la finamira da simplifitgar en general ils andaments da la procedura e da scursanir la durada da quella. Questa incumbensa sustegna en moda considerabla il giavisch impurtant e giustifitgà ch'è en l'interess da las patrunas e dals patruns da construcziun sco er da las vischnancas. Ultra da quai ha l'incumbensa la finamira da stgaffir las premissas, per che quest sectur saja reglà en ina moda ch'è adequata a l'instanza.

Puschlav, ils 16 da zercladur 2009

Thurner-Steier, Feltscher, Felix, Barandun, Berther (Sedrun), Bezzola (Zernez), Bleiker, Blumenthal, Bondolfi, Brandenburger, Brantschen, Buchli, Bühler-Flury, Bundi, Butzerin, Caduff, Cahannes Renggli, Casparis-Nigg, Castelberg-Fleischhauer, Casty, Casutt (Falera), Caviezel (Pitasch), Claus, Clavadetscher, Conrad, Darms-Landolt, Dudli, Fallet, Fasani, Florin-Caluori, Geisseler, Giovanoli, Hardegger, Hartmann (Cuira), Hartmann (Champfèr), Heinz, Jeker, Kessler, Kleis-Kümin, Koch, Kollegger, Kunz, Loepfe, Mani- Heldstab, Märchy-Michel, Mengotti, Michel, Montalta, Nick, Parolini, Parpan, Pedrini, Peer, Pfister, Plozza, Portner, Quinter, Ragettli, Ratti, Righetti, Rizzi, Stiffler, Stoffel, Tenchio, Thomann, Troncana-Sauer, Tuor, Valär, Vetsch (Claustra Vitg), Wettstein, Candinas (Mustér), Casutt-Derungs (Falera), Furrer-Cabalzar, Gunzinger, Hartmann (Küblis), Märchy-Caduff (Domat)

Session: 16.06.2009
Vorstoss: rg Auftrag

Resposta da la regenza

Tenor l'art. 25 al. 2 da la lescha federala davart la planisaziun dal territori (LPT) basegnan da princip "tut" ils projects da construcziun ordaifer la zona da construcziun ina permissiun EOZ dal chantun. Areguard ils edifizis gia existents vegni discurrì en l'art. 24c LPT expressivamain da renovaziuns e da midadas parzialas.

La regenza e l'autura da l'incumbensa qua avant maun partan dal fatg che betg mintga renovaziun resp. midada parziala pli pitschna basegnia ina permissiun EOZ, mabain ch'il legislatur chantunal haja ina tscherta libertad concepziunala en quest sectur. Perquai ha la regenza stgaffì – a chaschun da la revisiun totala da la legislaziun chantunala davart la planisaziun dal territori da l'onn 2004 (en vigur dapi il 1. da november 2005) – en l'art. 40 da l'ordinaziun davart la planisaziun dal territori per il chantun Grischun (OPTGR) in catalog cumplessiv cun plirs projects da construcziun pli pitschens che na basegnan nagina permissiun da construcziun resp. nagina permissiun EOZ, ultra da diversas categorias d'edifizis novs er tips da projects da construcziun, nua ch'i sa tracta da midadas vi d'edifizis existents en il senn da questa intervenziun. Cun il catalog chantunal èn las lavurs da reparatura e da mantegniment vegnidas exclusas en general da l'obligaziun da dumandar ina permissiun, uschenavant ch'ellas servan a mantegnair la valur; ultra da quai èn er vegnidas exclusas tschertas midadas cuntinuantas vi d'edifizis existents sco l'installaziun da collecturs solars pli pitschens (surfatscha d'absorpziun fin 2 m2) u da recepturs da satellit (fin 1,5 m2), stabiliments da la concepziun d'ierts e.u.v.

Cun elavurar da quel temp il catalog dals edifizis che na basegnan betg ina permissiun è la regenza sa stentada da nizzegiar dal tuttafatg la libertad concepziunala dal dretg federal ch'era anc admissibla. Tuttina è la regenza oz pronta d'examinar ulteriuras liberalisaziuns en il senn da l'intervenziun, damai ch'i resultan eventualmain ulteriuras pussaivladads pervia dal svilup permanent da la giurisdicziun dapi lura sco er pervia da la legislaziun en auters chantuns. Las speranzas na dastgan dentant betg esser memia grondas. Il dretg federal giuditgescha, tge che dovra ina permissiun EOZ. Gia las liberalisaziuns ch'èn vegnidas introducidas n'han betg mo purtà laud al chantun. Da differentas varts è vegnida la renfatscha ch'il chantun haja surpassà per part il cunfin da quai ch'è admissibel en il dretg federal. Er tenor numerusas vischnancas è il catalog ì memia lunsch; ina maioritad da quellas ha fatg diever da la pussaivladad da reintroducir per ils projects da construcziun ch'èn enumerads en il catalog – u almain per ina part da quels – l'obligaziun da dumandar ina permissiun. Resguardond las prescripziuns dal dretg federal dastgassi esser difficil da realisar ulteriuras liberalisaziuns. Per motivs dal stadi da dretg è la regenza sfurzada ed er intenziunada da resguardar il dretg federal.

Sche l'examinaziun avess da mussar ch'il catalog pudess eventualmain vegnir engrondì tras ina u pliras ulteriuras categorias da projects da construcziun, duai quai vegnir fatg – per motivs da l'unitad formala – tras ina revisiun da l'ordinaziun davart la planisaziun dal territori, la quala cuntegna il catalog dals projects che na dovran betg ina permissiun. La regenza vegn en mintga cas ad infurmar il cussegl grond en moda adattada davart il resultat da l'examinaziun fatga.

Per resumar è la regenza pronta d'acceptar questa incumbensa en il senn da las explicaziuns fatgas qua survart.

3 da settember 2009