1. Er la regenza è da l'avis ch'il chantun stoppia esser in partenari fidà, sch'i sa tracta da pajar ils quints a temp. Tenor ina communicaziun da pressa dad Intrum Justitia da l'onn 2009 pajan las autoritads statalas en Svizra lur quints en media 16 dis memia tard. A chaschun d'ina examinaziun da l'onn 2007 ha la controlla da finanzas dal chantun Grischun percunter constatà ch'il chantun paja ses quints en la gronda part dals cas tranter 2 e 5 dis suenter il termin da pajament fixà. Grazia a midadas organisatoricas, ma er sin basa dal fatg che l'administraziun da finanzas ha surpiglià quest onn la controlla da las assegnaziuns da la controlla da finanzas, ha il temp per elavurar ils quints pudì vegnir reducì e meglierà anc ina giada. Il gudogn da temp suenter l'entrada dals quints tar l'administraziun da finanzas importa fin a 3 dis.

2. La gronda part dals quints ch'il chantun ha da pajar, ha in termin da pajament da 30 dis è vegn pajada oz entaifer quest termin. En il champ da construcziun (construcziun auta e bassa) capiti dentant ch'ils termins da pajament vegnan fixads a 60 dis, confurm a las normas da la SIA. Il termin da pajament pli lung sa lascha argumentar cun il fatg che blers da quests quints ston l'emprim vegnir controllads tras las direcziuns da construcziun externas incumbensadas. Suenter vegnan ils quints tramess vinavant per als elavurar, approvar e cudeschar. Sco che la pratica mussa, na pon termins da pajament pli curts per regla betg vegnir observads en quests cas pervia da la procedura da controlla, d'approvaziun e da pajament. Er en il champ da construcziun sa stenta il chantun dentant da betg pajar ils quints pir suenter in termin da pajament da 60 dis; l'uffizi da construcziun bassa paja gia oz var 80 pertschient da tut ils quints entaifer 30 dis.
3. Sin plaun federal s'occupa actualmain ina gruppa da lavur cun il tema dals termins da pajament. En sia funcziun sco represchentanta da las patrunas e dals patruns da construcziun publics da la confederaziun, dals chantuns e da las citads examinescha la conferenza da coordinaziun dals organs da construcziun e d'immobiglias da la confederaziun (COCIC) – en collavuraziun cun la federaziun da tetg da l'economia da construcziun svizra – quant enavant ch'ils termins per l'elavuraziun da quints pon vegnir reducids vinavant er tar las patrunas e tar ils patruns da construcziun publics. Il resultat dals scleriments n'è anc betg avant maun. Independentamain da quai vul la regenza dentant augmentar dad actualmain 80 pertschient a 90 pertschient la quota da quints che vegnan pajads entaifer 30 dis en il champ da construcziun.

4. Per sustegnair l'economia è la regenza ultra da quai pronta da prender ina mesira nuncumplitgada che ha in effect immediat. D'ina vart ha ella incumbensà ils posts da servetsch da trametter vinavant immediatamain ils quints a l'administraziun da finanzas, per ch'ils termins da pajament fixads possian vegnir observads. Da l'autra vart ha ella incumbensà l'administraziun da finanzas da pajar immediatamain tut ils quints, uschespert che la revisiun dals quints è terminada, pia er alura, sch'il termin da pajament fixà tenor contract n'è betg anc scadì. Perquai che questa mesira chaschuna ina perdita dal retgav dals tschains en la gestiun da la liquiditad, duai ella per entant vegnir limitada – en il senn d'ina mesira conjuncturala – fin la fin da l'onn 2010. La regenza è pronta d'acceptar l'incumbensa.

4 da settember 2009