Navigation

Inhaltsbereich

Dumonda Brandenburger concernent la politica dal territori da muntogna

Sessiun: 18.06.2009
La publicaziun dals studis davart spazis cun pauc potenzial ha chaschunà malchapientschas e malsegirezzas en grondas parts da noss chantun. Quai, perquai ch'i vegnan messas en dumonda pitgas impurtantas da nossa politica vertenta dal territori da muntogna. Igl è fitg impurtant che la regenza fixeschia svelt ils puncts principals da sia politica futura dal territori da muntogna. Quests puncts na dastgan betg metter en dumonda la structura decentrala da l'abitadi e la cultivaziun da l'entir territori da noss chantun. Quai, perquai ch'il svilup futur da nossas regiuns da muntogna dependa decisivamain da la dumonda, sche la regenza è pronta da far tut per rinforzar la structura decentrala da l'abitadi e la cultivaziun da l'entir territori.

En quest senn vegn la regenza supplitgada da prender posiziun davart las suandantas dumondas:

1. È er la regenza da l'avis che la structura decentrala da l'abitadi e che la cultivaziun da l'entir territori da noss chantun sajan premissas per profilar noss chantun er en l'avegnir sco spazi da viver singular?

2. È er la regenza da l'avis ch'i stoppia vegnir fatg tut per garantir er en l'avegnir la structura decentrala da l'abitadi e la cultivaziun da l'entir territori da noss chantun? È ella pronta da s'engaschar per che la politica agrara da noss pajais garanteschia questa finamira senza restricziuns, sco che quai è fixà en la constituziun federala?

3. È er la regenza da l'avis che l'avertura dals territoris abitads saja ina premissa impurtanta per garantir ina structura decentrala da l'abitadi en noss chantun? È la regenza pronta da s'engaschar er en l'avegnir per questa avertura almain en il rom vertent, e quai independentamain da fusiuns da vischnancas?

4. È la regenza pronta da s'engaschar per ch'ils territoris perifers da noss chantun sajan represchentads er en l'avegnir en ils gremis politics, sco il cussegl grond, e possian uschia far valair lur interess?

5. È la regenza pronta da s'engaschar per che las vischnancas sajan concepidas finanzialmain uschia, ch'ellas pon mantegnair lur funcziuns er en cas da structuras decentralas? È er la regenza da l'avis che fusiuns portian mo avantatgs, sch'i vegnan sviluppads a medem temp concepts che garanteschan in rinforzament da las vischnancas periferas? Tge mesiras concretas prevesa la regenza eventualmain en quest connex?

6. È la regenza pronta da suttametter al cussegl grond uschè svelt sco pussaivel in rapport, en il qual ella preschenta sia strategia per ina politica dal territori da muntogna ch'è orientada al futur?

Puschlav, ils 18 da zercladur 2009

Brandenburger, Nigg, Barandun, Berther (Sedrun), Blumenthal, Bondolfi, Brüesch, Bucher-Brini, Buchli, Caduff, Casparis-Nigg, Casutt (Falera), Caviezel (Pitasch), Conrad, Donatsch, Gartmann-Albin, Giovanoli, Hardegger, Heinz, Jäger, Keller, Kessler, Kleis- Kümin, Koch, Märchy-Michel (Malans), Mengotti, Meyer Persili (Cuira), Meyer-Grass (Claustra Vitg), Noi-Togni, Parolini, Pedrini, Peer, Peyer, Plozza, Portner, Ragettli, Rizzi, Sax, Stoffel, Tenchio, Thöny, Troncana-Sauer, Wettstein, Zanetti, Candinas (Mustér), Gunzinger, Locher Benguerel, Zurfluh

Session: 18.06.2009
Vorstoss: rg Anfrage

Resposta da la regenza

La politica futura dal territori da muntogna vegn concepida principalmain da la confederaziun e dals chantuns. Cun la politica agrara e cun la nova politica regiunala da la confederaziun (NPR), ch'è vegnida messa en vigur l'onn 2008, èn vegnidas definidas pitgas impurtantas. Il program chantunal da realisaziun tar la NPR mussa ils detagls da las strategias per ina promoziun regiunala ch'è orientada al futur. L'uniun purila grischuna ha elavurà l'onn 2005 in agen rapport da strategia. La regenza s'occupa gia dapi daditg cun la problematica da la politica dal territori da muntogna, che vegn tematisada en la dumonda, ed ha fixà strategias correspundentas en ses program 2009- 2012 cun differentas directivas e cun divers puncts centrals da svilup. Questas strategias na vegnan betg midadas tras il rapport davart spazis cun pauc potenzial.

1. Er la regenza è da l'avis che la cultivaziun da l'entira surfatscha dal chantun stoppia restar ina finamira impurtanta. La NPR e la politica agrara gidan a cuntanscher questa finamira. Ils programs vertents per la promoziun da la regiun da muntogna vegnan mantegnids (interreg IV C) u remplazzads tras la NPR (lescha federala davart agids d'investiziun per territoris da muntogna [LIM], RegioPlus) ed il manaschament regiunal vegn reorganisà.

2. Il chantun vegn a s'engaschar sco fin ussa, per ch'i possia vegnir cuntanschida – tras l'agricultura – ina cultivaziun da l'entira surfatscha dal chantun. I sto dentant vegnir concedì che territoris difficils da cultivar èn periclitads. Malgrà contribuziuns intenziunadas da la confederaziun na po quai betg vegnir evità dal tuttafatg. Perquai sto vegnir dada fitg gronda attenziun al mantegniment ed a la tgira d'ina cuntrada cultivada persistenta. Cun projects da meglieraziun vegn optimada l'infrastructura ch'è necessaria per ina cultivaziun pli effizienta dal terren cultivà. In'avertura cumplessiva da tut las surfatschas avertas n'è dentant betg pli opportuna.

3. La regenza è da l'avis che la mobilitad – ed uschia er la structura decentrala da l'abitadi en noss chantun – stoppia vegnir garantida per la populaziun e per l'economia tras meds da traffic segirs ed effizients en tut las regiuns en il rom dals meds finanzials disponibels. La garanzia da meds da traffic effizients è cuntegnida en il program da la regenza 2009-2012 sco punct central da svilup. Quai sin basa da l'experientscha che la mobilitad collia ina cun l'autra las funcziuns da basa sco l'abitar, la lavur, il provediment e la recreaziun – independentamain da las structuras communalas.

4. La regenza conferma sia tenuta vertenta areguard la procedura electorala ed areguard ils circuls electorals, tenor la quala mintga circul duai esser represchentà en il cussegl grond. Quai ha ella declerà tant en sia missiva tar la revisiun parziala da la constituziun chantunala (detretschament da las incumbensas giudizialas; M 2008-2009, p. 455, 513 s.) sco er en sias explicaziuns supplementaras, perquai che la represchentanza da territoris perifers en il cussegl grond è in element impurtant dal sistem electoral grischun.

5. Las vischnancas en las regiuns periferas agriculas survegnan gia oz in sustegn spezial tras la gulivaziun da finanzas vertenta sco er tras ils differents champs da la politica secturiala. Ellas han per gronda part grevezzas geografictopograficas che sa chattan lunsch sur la media. Tras la NGF grischuna vegnan applitgads dapli meds finanzials per la dotaziun finanziala da basa e per la cumpensaziun da grevezzas spezialas geografic-topograficas. Fusiuns da vischnancas portan – tras structuras pli effizientas e tras dapli autonomia – medemamain in rinforz. Plinavant pon resursas persunalas libras vegnir engaschadas per il svilup economic. La regenza desista sapientivamain da colliar fusiuns cun cundiziuns concernent il svilup da concepts.

6. Fixond cuntegns correspundents en ses program 2009-2012, ha la regenza deter- minà las strategias sco basa per sviluppar vinavant ina politica dal territori da muntogna ch'è orientada al futur. Las basas, las directivas ed ils puncts centrals da svilup dal program da la regenza 2009-2012 èn vegnids elavurads ensemen cun il cussegl grond. La realisabladad da las propostas da soluziun fundamentalas dal rapport davart ils spazis cun pauc potenzial duai vegnir examinada en duas regiuns da pilot. La regenza è da l'avis ch'i na saja betg cunvegnent d'elavurar in ulteriur rapport per ina politica dal territori da muntogna ch'è orientada a la realisaziun.

4 da settember 2009