L'onn 1999 è stà in onn extraordinari per il sectur d'asil ed ina sfida particulara tant per l'uffizi dal servetsch social sco er per la polizia d'esters dal chantun Grischun. Il grond dumber da requirents d'asil dal Cosovo ch'è restà constant dapi l'atun 1998 ha necessità in'extensiun da las structuras entaifer l'uffizi dal servetsch social dal chantun. Durant l'onn passà han ins mess en funcziun trais novs centers transitoris cun totalmain 230 plazzas ed augmentà temporarmain l'effectiv da persunal per 16 plazzas. Malgrà ils novs alloschis collectivs han ins stuvì metter a disposiziun stabiliments da protecziun civila da l'avrigl fin l'avust 1999 per dar suttetg a tut ils requirents. A partir da l'avust 1999 ha entschavì l'emigraziun sperta e massiva da requirents d'asil dal Cosovo en il rom dal program da repatriaziun lantschà da la confederaziun. Cun quai han ins puspè stuì reducir las structuras ch'ins aveva extendì curt avant.
Dapi l'october 1999 è en vigur la nova lescha d'asil cun las pauschalas scursanidas per ils custs da sustegn, d'alloschi e d'assistenza.
Dus "records" caracteriseschan l'onn 1999. En il Grischun n'han ins anc mai dà suttetg a tants umans che tschertgan protecziun da la guerra en lur patria, e quai entaifer uschè curt termin. Da l'autra vart n'han ins anc mai realisà entaifer mais in program da repatriaziun che ha pussibilità a tantas persunas da returnar a moda ordinada en lur patria. La mancanza da reglamentaziuns da recepziun duvrablas ha chaschunà, sco gia pli baud tar ils umans da la Bosnia, er tar la recepziun da fugitivs da guerra dal Cosovo attribuziuns arbitraras da proceduras e cun quai reglamentaziuns da dimora las pli differentas. Ins po sperar ch'il titel da dimora da las persunas cun basegn da protecziun, introducì cun l'entrada en vigur da la nova lescha d'asil, pussibiliteschia ina reglamentaziun pli effizienta da la dimora dals fugitivs en cas da futuras catastrofas umanitaras. Cuntrari a quai ha gì il project da repatriaziun, lantschà da la confederaziun e realisà cun agid da la polizia d'esters, grond success er en il Grischun, surtut grazia a sia structura simpla, las attracziuns finanzialas sco er sia communicaziun clera. En il segund quartal da l'onn passà han ins gia pudì repatriar 44 pertschient da las persunas or dal sectur d'asil (requirents d'asil e persunas recepidas provisoriamain) sco er 30 pertschient da quellas persunas che han gì sulettamain in visum u in auter titel per reglar lur dimora. Malgrà questa quota da repatriaziun considerabla vegnan ils gronds problems en connex cun la repatriaziun dals fugitivs da guerra dal Cosovo pir a sa preschentar en il decurs da quest onn.
Ultra dals effects da la crisa dal Cosovo ha la polizia d'esters stuvì s'occupar surtut da las consequenzas da la misergia d'execuziun ch'exista dapi intgin temp. A basa dal sustegn d'execuziun mancant da la confederaziun daventa l'expulsiun da requirents d'asil refusads u da persunas estras nungiavischadas adina pli cumplitgada u per part schizunt nunpussaivla. Adina pli savens na pon ins betg pli far valair decisiuns en consequenza da documents da viadi che mancan u da pussaivladads da viadi objectivas. Quest svilup na difficultescha betg sulettamain l'applicaziun da las mesiras repressivas, mabain el po er pregiuditgar la segirezza interna. Ina interrupziun pli lunga da l'execuziun, sco p. ex. tar ils burgais da Sri Lanka, po er avair la consequenza che las persunas na partan betg, mabain ch'i vegnan inoltradas pli bleras dumondas per permissiuns da dimora per motivs umanitars.
Gremi: departament da giustia, polizia e sanitad dal Grischun
Funtauna: rg departament da giustia, polizia e sanitad dal Grischun