Dacurt è s'occupada ina cumissiun pedeliberanta dal cussegl grond sut il presidi da daputà dr. Jon Domenic Parolini ed en preschientscha da cusseglier guvernativ Claudio Lardi, schef dal departament d'educaziun, cultura e protecziun da l'ambient dal sboz per ina lescha introductiva tar la lescha federala davart la protecziun da l'ambient (lescha chantunala davart la protecziun da l'ambient). La cumissiun ha concludì unanimamain d'entrar en chaussa e recumonda il cussegl grond da deliberar il project per mauns da la votaziun dal pievel.
La nova lescha chantunala davart la protecziun da l'ambient serva en emprima lingia per garantir l'execuziun dal dretg federal davart la protecziun da l'ambient. Perquai cuntegna la lescha principalmain regulaziuns davart las cumpetenzas e las proceduras, spezialmain davart la repartiziun da las incumbensas executivas tranter las vischnancas ed il chantun. Qua vulan ins da princip mantegnair la separaziun da las cumpetenzas ch'è sa cumprovada. Incumbensas cumplexas vegnan exequidas tenor la pratica actuala dal chantun, entant che a las vischnancas vegnan assegnadas tut quellas incumbensas ch'ellas san schliar gist uschè bain u schizunt meglier ch'il chantun. La cumissiun è persvadida, tuttina sco la regenza, che questa repartiziun da las incumbensas tranter las vischnancas ed il chantun represchentia ina regulaziun raschunaivla e praticabla.
Dal rest duain vegnir integradas las disposiziuns davart l'allontanament dals ruments en la lescha chantunala davart la protecziun da l'ambient, a moda ch'i pon vegnir abrogadas la lescha davart economisar ils ruments e l'ordinaziun da ruments ch'èn valaivlas oz. En la cumissiun ha subì ina discussiun animada spezialmain l'obligaziun previsa en il project da transportar ruments sur distanzas pli lungas cun la viafier, sche quai è economicamain supportabel e sche quai engrevgiescha main ferm l'ambient ch'auters meds da transport. La maioritad da la cumissiun è arrivada a la conclusiun che questa schliaziun preferida da la regenza saja gista e raschunaivla en il senn da la lescha davart la protecziun da l'ambient. Tuttina na duai, tenor l'avis da la maioritad da la cumissiun e cuntrariamain a la proposta da la regenza, betg vegnir subvenziunà be il transport dals ruments cun la viafier, mabain er quel cun auters meds da transport, sche quels n'engrevgieschan l'ambient betg pli ferm che la viafier.
Per gronda part han ins per finir concludì in augment da la contribuziun chantunala per sanar deponias veglias, sin las qualas ins aveva deposità essenzialmain ruments d'abitadi.
Il cussegl grond vegn a s'occupar dal project en la proxima sessiun da mars. Il conclus dal cussegl grond vegn suttamess a la votaziun dal pievel.

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond