La regenza ha relaschà las novas prescripziuns da chatscha. Da nov dastgan ins prender cun sai telefonins stizzads e duvrar quels en situaziuns d'urgenza. Plinavant ha la regenza deliberà las propostas da midar ils asils federals da selvaschina per mauns da l'uffizi federal d'ambient, guaud e cuntrada. Da nov duai obtegnair la planira da la Greina il status d'in asil federal.

Las prescripziuns da chatscha che vegnan concludidas annualmain da la regenza permettan ina direcziun exacta da la chatscha. Ins po reagir cunter svilups nungiavischads ed adatta-ziuns raschunaivlas pon ins realisar spert en la pratica. Cun ils plans da reducziun vegn resguardada la situaziun actuala da l'effectiv d'ina spezia da selvaschina. Da l'autra vart vegnan zavrads periodicamain asils da selvaschina cun in scumond parzial u total da chatscha; questas mesiras han pia in effect pir a lunga vista. Perquai vegnan ils asils chantunals da selvaschina repassads mintga tschintg onns, la proxima giada l'onn 2003, ed ils asils federals pir suenter passa desch onns. L'ordinaziun davart ils asils federals da selvaschina relaschada dal cussegl federal l'onn 1991 vegn revedida parzialmain quest onn.

Telefonins - temp da chatscha - plans da reducziun
Sin tut las chatschas èsi permess da prender cun sai telefonins stizzads. Il diever dals telefonins è dentant admess mo en cas medicinals d'urgenza sco er per stabilir il contact cun ils organs da surveglianza da chatscha e cun las centralas da chauns da sang. Adattà vegn plinavant il temp da chatscha la saira durant la chatsch'auta; a partir dals 21 da settember chala el a las 20.00.
Il tschierv cun curuna da domaduas varts resta protegì. Il niz da questa mesira vegn examinà annualmain. La structura da l'effectiv da tschiervs è sa meglierada marcantamain. Quai ha in bun effect sin la distribuziun en il spazi da viver. Il chatschader profita d'ina purschida pli gronda da tschiervs creschids. Il dumber dals tschiervs cun curuna d'ina vart sajettads è sa redublà dapi l'introducziun da questa mesira. Il plan da reducziun dals tschiervs prevesa da sajettar 4'175 tschiervs. Cun quai duai vegnir stabilisà l'effectiv da primavaira da var 12'600 animals.

La planira da la Greina duai daventar in asil federal da selvaschina
La midada la pli gronda pertutga la planira da la Greina. Questa cuntrada d'impurtanza speziala sa chatta oz tranter ils dus asils federals Pez Vial da la vart dal Grischun e Greina Ticinio da la vart dal Tessin. La surfatscha da la part proponida ha ina grondezza da var 13.3 km². La vischnanca da Vrin sustegna questa proposta en sia funcziun da vischnanca territoriala.
Singulas disposiziuns en l'ordinaziun davart ils asils federals da selvaschina ston urgentamain vegnir adattadas. Uschia duain valair las disposiziuns che restrenschan l'ir cun skis er per l'ir cun gianellas. Per tut ils asils federals da selvaschina proponan ins pitschnas rectificaziuns dal cunfin. La finamira da questas rectificaziuns è tant d'optimar ils cunfins sco er da sminuir ils conflicts. Uschia duain per exempel vegnir excorporadas pliras chasas d'abitar da las zonas da protecziun.

Gremi: regenza
Funtauna: rg uffizi da chatscha e pestga dal Grischun