da Cusseglier guvernativ Klaus Huber

Il pli tard dapi la prova generala cun la cursa da skis dals umens dal cup mundial a l'entschatta da favrer è mintgin conscient ch'il campiunadi mundial da skis alpins da la FIS ha lieu l'onn proxim a San Murezzan. Ils organisaturs han mussà ch'els han fatg lur pensums e ch'els èn preparads per questa grond'occurrenza internaziunala. Il campiunadi mundial duai daventar ina festa da skis che duai avair effect lunsch sur ils cunfins da noss pajais. Il turissem grischun survegn cun quai ina plattafurma internaziunala per sa preschentar d'ina vart fitg positiva e per pudair dar qua tras al chantun impuls impurtants.

Gia l'atun 1999 2000 han dumandà ils organisaturs ina contribuziun da 7 milliuns francs vi dals custs per realisar il campiunadi mundial. La regenza ha sustegnì questa dumonda ed ha suttamess al cussegl grond ina missiva correspundenta. Il cussegl grond ha concludì unanimamain da conceder il credit. A chaschun da la votaziun dal pievel dals 24 da settember 2000 è vegnì refusà nunspetgadamain cun ina pitschna maioritad il credit da 7 milliuns francs. Il cussegl grond ha tractà in'ulteriura giada questa dumonda. Ils 3 da mars 2002 è uss la segunda votaziun davart il campiunadi mundial. La contribuziun chantunala munta uss be a 4 milliuns francs. Questa reducziun è stada pussaivla, perquai che las vischnancas dal circul da l'Engiadin'ota sa participeschan cun 4 milliuns francs ultra da la vischnanca da San Murezzan che contribuescha tut en tut 30 milliuns francs vi dal preventiv dal campiunadi mundial. Medemamain 4 milliuns francs contribuescha la confederaziun. Plinavant ha la confederaziun empermess ina garanzia da deficit dad 1.5 milliuns francs. D'endretg vegni pretendì ch'il chantun Grischun sa participeschia medemamain cun ina contribuziun.

In campiunadi mundial da skis alpins, nua che rapporteschan 2'500 collavuraturs da medias da 60 naziuns è ina plattafurma da reclama ideala, cun la quala il chantun Grischun po far attent a sia situaziun sco regiun da turissem la pli impurtanta da la Svizra. Gist suenter ils eveniments dals 11 da settember 2001 è necessaria pli che mai la promoziun da noss turissem. Gist da quest turissem viva directamain u indirectamain la gronda part da las persunas che lavuran en il chantun Grischun. Perquai èsi cunvegnent ed adequat ch'il chantun sa participeschia medemamain - sco las vischnancas e la confederaziun - cun ina contribuziun vi dal campiunadi mundial da skis.

La regenza ha adina sustegnì ina contribuziun chantunala per realisar quest'occurrenza. Il campiunadi mundial da skis èn er ina schanza per l'Engiadin'ota, per il turissem grischun, gea per l'entir chantun. Correspundentamain è l'impurtanza da la votaziun fitg gronda per il chantun da turissem Grischun. Igl è impurtant ch'il campiunadi mundial vegnia sustegnì dal pievel grischun e che quest'occurrenzia daventia ina veritabla festa da skis. Perquai dovri in GEA da las votantas e dals votants per il credit al campiunadi mundial.

Gremi: Departament da l'intern e da l'economia publica dal Grischun
Funtauna: rg Cusseglier guvernativ Klaus Huber