Sonda, ils 31 d'avust ha lieu il di chantunal dal Grischun da l'Expo 02 a Neuchâtel. Il chantun sa preschenta en sia varietad tipica cun ina cumparsa correspundenta sin divers palcs e sin diversas plazzas da festa. Il spectrum cumpiglia represchentaziuns da tut gener e sco culminaziun ina installaziun gigantica da glatsch. Il program entschaiva a las 10.45 e dura l'entir di.
Sut il motto "Natiralmain en colurs" vegn il Grischun a sa preschentar al di chantunal a Neuchâtel. Las visitadras ed ils visitaders pon experimentar directamain las culturas multifaras da la vita e da las linguas dal pli grond chantun svizzer.

Il capricorn sco ambassadur
Il capricorn, l'animal superbi da la vopna grischuna, stat en il center da las activitads. Ina invasiun da 209 capricorns colurads da poliester vegn ad irrumper sur notg en il territori da l'Expo. Scolaras e scolars da tut las vischnancas grischunas han dissegnà mintgamai las spezialitads da la vischnanca sin ils capricorns. Sco attracziun e simbol da la midada vegn creada ina sculptura da glatsch d'in capricorn d'ina autezza da tschintg meters en il center dal parc da l'Expo. En ella duai daventar vesaivla la relaziun cun la chombra d'aua e la forza idraulica. L'exposiziun "aua extrema", il project dals set chantuns da la Svizra orientala cun il tema "Unitad en la varietad" vegn a s'integrar fitg bain en il decurs cumplessiv da la cumparsa dal Grischun.

Nagina festa senza Grischunas e Grischuns
Musica, chant ed ulteriuras represchentaziuns vegnan ad exprimer las particularitads culturalas e linguisticas dal Grischun. Differents ensembles ed orchesters grischuns procuran per in program interessant e varià che vegn a s'extender da la musica instrumentala e la musica populara sur la musica classica fin tar las furmas modernas da s'exprimer. Er la muntogna sco simbol dal grond chantun da las Alps vegn represchentada a moda speziala: alpinistas e raividers, er el(la)s artist(a)s da lur rom, vegnan a dumagnar muntognas en in ritmus musical.

Il Grischun à la carte
Al di d'eveniments dal Grischun na dastgan sa chapescha betg mancar ils buns baccuns culinarics. Uschia vegnan purschids als visitaders da l'Expo 02 a Neuchâtel durant il di chantunal dal Grischun products tradiziunals e tipics dal Grischun, sco p. ex. pulpa, schambun criv, chaschiel da muntogna, paun, vin ed aua minerala per la degustaziun.

Grischunas e Grischuns èn er da la partida
Las vischnancas grischunas èn envidadas da sa participar al di chantunal cun ina delegaziun. Er per la populaziun vegn purschì in arranschament spezial. I sa chapescha da sasez ch'ins spetga er las Grischunas ed ils Grischuns che vivan giu la Bassa a quest'occurrenza. Tuts ensemen èn envidads ad in aperitiv sin la piazza suenter il curt act festiv (10.45 ). Cun circa 500 collavuraturs ed ina gronda delegaziun che cumpiglia circa 1'000 persunas duai il di chantunal dal Grischun dals 31 d'avust 2002 daventar in grond success.

Gremi: departament da l'intern e da l'economia publica dal Grischun
Funtauna: rg departament da l'intern e da l'economia publica dal Grischun