La regenza metta en vigur l'ordinaziun executiva davart il stadi civil ch'il cussegl grond ha relaschà ils 29 da schaner 2002 sin il 1. d'avrigl 2002. Ultra da quai vegnan relaschadas las disposiziuns executivas tar l'ordinaziun executiva davart il stadi civil, las qualas entran medemamain en vigur per quest termin. La revisiun parziala da l'ordinaziun executiva da la regenza tar l'ordinaziun dal cussegl federal dals 22 da december 1980 davart il certificat d'origin vegn approvada.

Contribuziuns da sport
I vegnan conderschidas contribuziuns da sport e toto d'ina summa da totalmain stgars 6'000 francs al club da vela e da surf da Tavau, al club da skis da la Mantogna ed a la basa Tavau-Partenz da la federaziun da skis dal Grischun.

Regiuns e vischnancas
Il project general davart l'avertura dal guaud "Solas" da las vischnancas dad Alvaschagn, Mut, Stierva e Vaz vegn approvà. Il concept per il project è vegnì elavurà gia a l'entschatta dals onns 70. Ma el è vegnì suspendì fin ch'igl era cler tge trassé che la via chantunala da colliaziun si Mut prendeva. Questa via furma la basa per l'avertura dal guaud. Cun l'avertura vegn rendida accessibla per la cultivaziun e per l'utilisaziun ina surfatscha da guaud da 282 ha. Dus terzs da la surfatscha èn guauds cun ina funcziun da protecziun speziala. Quests dus terzs protegian la via chantunala/via dal Schin ed il trassé da la viafier retica sur l'Alvra sco er singuls edifizis cunter lavinas, sbuvadas e bovas. I vegn fatg quint cun custs totals dad 1.9 milliuns francs, il chantun presta ina contribuziun da 25 pertschient.
Il concept general ed il project preliminar per la construcziun d'in edifizi nov cun ina gruppa da tgira da sis letgs e cun quatter abitaziuns d'attempads assistidas a Val S. Pieder vegn approvada sut diversas cundiziuns. I vegn quintà cun custs totals da 4.1 milliuns francs, il chantun presta ina contribuziun da 14 pertschient als custs imputabels dal stabiliment che muntan ad 1.3 milliuns francs.
La nova constituziun da la vischnanca da Fuldera vegn approvada.
Al project general per la punt Salginatobel e per la concepziun da la plazza communala da la vischnanca da Schiers vegn empermess in emprest d'investiziun senza tschains da la confederaziun en l'autezza da 150'000 francs. Ils custs totals dal project muntan a 620'000 francs. Il chantun paja ina contribuziun da maximalmain var 33'000 francs.
La cunvegna concernent las tariffas per ils transports primars e secundars tranter la santésuisse dal Grischun e la federaziun chasas ed ospitals dal Grischun (H + S) vegn approvada. La cunvegna regla las tariffas per las acziuns dals servetschs da salvament e d'ambulanza che vegnan renconuschids dal chantun Grischun sco purtaders da prestaziuns e ch'han lur basa en il Grischun.
Per differents projects da construcziun da vias en il chantun vegnan dads libers credits d'in import total da bundant 5.5 milliuns francs (lavurs d'impressari e da cuvrida per renovar l'access ost da la A13 a Landquart, lavurs da construcziun e da construcziuns en lain tar la punt sur il Glogn a Peiden Bogn; direcziun generala dal project per il sviament da Claustra; lavurs d'impressari per il sviament da Claustra al portal Selfranga; lavurs d'impressari per la punt Grosstobel sin la via da colliaziun Glion - St. Martin/Sursaissa; lavurs da construcziun sin la via da colliaziun Sevgein - Riein).

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun