La scol'auta professiunala da pedagogia (SAP) porscha dus andaments da studis sco scolaziun fundamentala: il studi per il persunal d'instrucziun da las scolinas ed il studi per persunal d'instrucziun da las scolas primaras.

Domaduas scolaziuns possedan la medema structura, nua ch'igl è raschunaivel vegnan manadas ensemen las uras d'instrucziun. La SAP vul accentuar cun quai l'incumbensa communabla, numnadamain l'educaziun e la furmaziun dals uffants. La scolaziun per domadus andaments da studi succeda en il rom da tschintg secturs da scolaziun ch'ins po cumbinar in cun l'auter. L'interdisciplinaritad è da grond'impurtanza.

L'emprim sectur procura per las infurmaziuns da basa necessarias per l'ambient da la scola. El introducescha en ils sistems culturals, socials ed economics che determineschan la vita dals uffants. Per quai s'occupa el da las tecnologias d'infurmaziun e da communicaziun e da lur pussaivladads per la scola.

La pedagogia e la psicologica furman ensemen cun la didactica generala il secund sectur. Sco disciplinas da basa d'ina scol'auta professiunala da pedagogia dirigian ellas il decurs da l'entira scolaziun. Il terz sectur, numnadamain la scolaziun en la didactica da la domena ed en la didactica dal rom è collià stretgamain cun il secund sectur. Qua succeda la confruntaziun approfundada cun ils cuntegns e cun las finamiras da l'instrucziun e da la scolaziun dals roms da la scola primara e cun las incumbensas da la scolina.

Il quart sectur è la scolaziun pratica da professiun, il veritabel "crap da stgarpitsch" dals curs da scolaziun a la scol'auta professiunala pedagogica per il persunal d'instrucziun da las scolinas e da la scola primara. Ella cuzza 28 emnas. Cun quai è ella da grond'impurtanza en il rom da l'entira scolaziun. Quai è ina da las impurtantas innovaziuns da la refurma actuala da la furmaziun da magistras e da magisters.

In punct central dal studi sco tschintgavel sectur è l'acquist da cumpetenzas che n'èn betg sulettamain d'impurtanza per la scolaziun da basa per l'atgna classa, mabain per l'entira chasa da scola, per la scola u per l'entir ambient da la scola. Quai po per exempel esser la pedagogia da religiun, la direcziun da chors u d'ensembles u l'educaziun sanitara. Quest punct central dal studi appartegna al program dal terz onn e vegn purschì communablamain per domadus andaments da scolaziun.

En tut quels tschintg secturs da studi è fixada ina finamira ambiziusa: almain 20% dal temp da scolaziun sto vegnir impundì per la lavur interdisciplinara.

Ulteriuras infurmaziuns: www.pfh.gr.ch

Quai è la communicaziun da medias nr. 2 da 4 pertutgant il studi a la SAP.

Gremi: departament d'educaziun dal Grischun
Funtauna: rg departament d'educaziun dal Grischun