La chatscha da patenta dal Grischun posseda grazia a sia lunga tradiziun anc adina ina grond'impurtanza tar la populaziun grischuna. Per garantir che tut las persunas cun l'autorisaziun d'ir a chatscha disponian d'ina buna scolaziun da basa vegnan manads tras mintg'onn examens da qualificaziun per las chatschadras ed ils chatschaders. L'annunzia e la via administrativa tar l'examen èn vegnidas simplifitgadas cun insaquantas novaziuns.
La chatscha da patenta dal Grischun è vegnida midada fundamentalmain ils ultims onns. Pli baud era ella be in passatemp cun ina grond'impurtanza fiscala (regal da chatscha). Cun la nova legislaziun da chatscha ha ella surpiglià l'incumbensa da regular ils effectivs da selvaschina en in spazi da viver che vegn adina pli e pli pitschens e l'incarica da minimar conflicts. Questa funcziun adempleschan las chatschadras ed ils chatschaders en in ambient che sa preschenta pli e pli critics envers il mazzar ils animals. Perquai è ina buna scolaziun indispensabla per mintga giuvna chatschadra e mintga giuven chatschader. Far l'examen da qualificaziun furma la basa per in cumportament correct sin la chatscha. Cun la scolaziun sco chatschadra resp. chatschader survegnan quels invista dals connex ecologics da la natira e pon qua tras suandar las consequenzas da diversas intervenziuns. Durant il temp da scolaziun ha mintga candidata e mintga candidat da prestar 50 uras lavur da tgira, 30 da quellas durant la stad avant l'examen da sajettar.
L'onn precedent han ins introducì diversas novaziuns favuraivlas per il "client". Per ch'ins possia cumenzar cunzunt en las regiuns bassas dal chantun pli baud cun las lavurs da tgira han ins spustà anavant l'ultim termin d'annunzia per l'examen da qualificaziun da las chatschadras e dals chatschaders sin ils 31 da schaner 2002. Las candidatas ed ils candidats che han passà cun success l'examen d'armas e da sajettar l'onn 2000 u pli baud pon s'annunziar directamain per l'examen teoretic da la primavaira 2002.
Tgi che vul far l'examen po sa preparar detagliadamain cun il curs da l'uniun grischuna da chatschaders da patenta (UGCP) sin ils roms d'examen sajettar, teoria da las armas, lescha, selvaschina ed ambient, enconuschientschas da la chatscha e da la tgira ed enconuschientschas da la selvaschina. Per dar la pussaivladad a las candidatas ed als candidats da lavurar durant l'entir temp da scolaziun en la medema gruppa exista da nov la pussaivladad d'absolvar l'examen teoretic era lura, sche l'examen da las armas e da sajettar n'è betg reussì l'onn precedent.

Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun