Sylvia Caduff ed Oscar Peer han num ils dus purtaders dal premi grischun da cultura 2003. La regenza grischuna undrescha las prestaziuns extraordinarias, la carriera excepziunala sco dirigenta e l'activitad musicala sin livel internaziunal da Sylvia Caduff. La musicista e dirigenta da Cuira è naschida l'onn 1937. Ella ha visità il conservatori a Lucerna ed ha alura studegià direcziun d'orchester tar Herbert von Karajan a Berlin. L'onn 1966 ha ella gudagnà la concurrenza internaziunala ordvart prestigiusa "Dimitri Mitropoulos" a New York. Suenter quest success grond è ella daventada a Berna docenta per direcziun d'orchester e dirigenta da l'orchester dal conservatori. L'onn 1973 ha ella survegnì il premi d'art da la citad da Lucerna. A partir dal 1967 ha ella dirigì sco dirigenta ospitanta tut ils orchesters renumads pli gronds da la Svizra e da l'ester, inclusiv, sco emprima dunna insumma, ils filarmonichers da Berlin.

Oscar Peer survegn il premi grischun da cultura da quest onn en appreziaziun da sia vasta ovra litterara en lingua rumantscha e tudestga, en la quala el dissegna excellentamain figuras da cumplexitad psichica e passa sur ils cunfins d'ina litteratura da tempra regiunala, sco er en renconuschientscha da ses merits per la promoziun da la lingua e cultura rumantscha. L'Engiadinais Oscar Peer ha finì ses studi l'onn 1958 cun ina dissertaziun davart il scriptur sursilvan Gian Fontana. Suenter il studi ha el redigì l'onn 1962 per incumbensa da la Lia rumantscha il vocabulari ladin-tudestg. Suenter ha el lavurà sco magister da franzos e talian a la scola chantunala da Winterthur ed, a partir da l'onn 1970, al seminari da magisters a Cuira.

Ils premis èn mintgamai dotads cun 20'000 francs e vegnan surdads a Sylvia Caduff ed Oscar Peer ils 14 da november en il rom d'ina pitschna festa en l'edifizi dal cussegl grond a Cuira.

Ultra da quai ha la regenza concedì sis premis da renconuschientscha d'ina valur da mintgamai 10'000 francs a:
- Walter Bieler, en renconuschientscha da sia lavur da pionier cun construcziuns en lain e oravant tut per avair sviluppà la punt da lain senza tetg, ina nova furma da construir punts.
- Diego Giovanoli quale riconoscimento per il suo instancabile impegno nel rilevare, valorizzare e divulgare le peculiarità e le bellezze architettoniche, territoriali e culturali del nostro vasto cantone.
- Duosch Grass, en renconuschientscha da sia art genuina sin il champ da la sculptura, da la pictura e da la creaziun da mobiglia.
- Heinrich Kollegger, en renconuschientscha da sia musica populara originala cun la chapella da famiglia, cun la quala el sa preschenta en ed ordaifer il Grischun.
- Aniko Risch, en renconuschientscha da sia art da grond'expressiun sin il champ da la pictura, da la sculptura, da l'installaziun e da la creaziun da mobiglia.
- Tresa Rüthers-Seeli, en renconuschientscha da si'excellenta ovra lirica areguard la lingua ed il cuntegn.

Ils premis da promoziun da mintgamai 7'000 francs van quest onn a:
- Dumenic Andry, scriptur;
- Claudia Cadruvi, scriptura;
- Achim Wolfgang Lenz, actur/reschissur/autur;
- Romedi Reinalter, botanicher;
- Jos Schmid, fotograf;
- Nadja Schmid, actura/reschissura/autura;
- Andi Schnoz, musicist;
- Monika von Aarburg, artista visuella.

Ils 30 da november cun indesch projects da votaziun
Ils 30 da november 2003 vegnan las votantas ed ils votants grischuns a pudair votar davart indesch projects da leschas chantunals. Sper la "iniziativa per mantegnair l'egualitad da las schanzas da la giuventetgna grischuna" vegn a la votaziun er in pachet da diesch projects che stattan en connex cun la sanaziun da las finanzas dal chantun:
- la revisiun parziala da la lescha d'ustaria per il chantun Grischun
- la revisiun parziala da la lescha davart il promover la tgira da malsauns e l'assistenza da persunas attempadas e da persunas che basegnan tgira (lescha davart la tgira da malsauns)
- la revisiun parziala da la lescha davart l'assicuranza da malsauns e la reducziun da las premias
- la revisiun parziala da la lescha davart l'acquist e la perdita dal dretg da burgais chantunal e communal (lescha dal dretg da burgais)
- la revisiun da la lescha davart las scolas popularas dal chantun Grischun (lescha da scola)
- la revisiun da la lescha davart las scolinas dal chantun Grischun (lescha da scolina)
- la revisiun da la lescha davart la furmaziun professiunala en il chantun Grischun (lescha chantunala davart la furmaziun professiunala)
- la revisiun parziala da la lescha davart la taglia da cultus da las persunas giuridicas (lescha davart la taglia da cultus)
- la revisiun parziala da la lescha da pestga
- la revisiun parziala da la lescha davart las vias dal chantun Grischun

Da vischnancas e regiuns
- Cuira: L'ovra electrica da la Rabiusa è vegnida cuvrida tar las malauras dal november 2002 e na funcziuna dapi lura betg pli. La regenza ha ussa approvà cun cundiziuns il project per la restauraziun e concedì la permissiun da construcziun.
- Via da Furna: Per il traject parzial Kirche-Boden vegn dauzà il pais maximal da set a 13 tonnas e per il traject Pragg Jenaz-Furna-Hinterberg vegn augmentada la ladezza maximala da 2,3 a 2,5 meters.

Contribuziuns chantunalas a diversas instituziuns
- Contribuziuns da sport-toto: Sis petents èn vegnids resguardads per ina transcha da var 21'000 francs: club da skis Vuorz, club da ballape Domat, OLG Cuira, club da judo Tavau, tiradurs da pistola e sport Surses e l'uniun da tiradurs Tavau Glaris.

Chaussas persunalas
Hanspeter Rüedi, Maiavilla, è vegnì elegì sco manader da la partiziun "megliuraziun" da l'uffizi d'agricultura, megliuraziun da structura e mesiraziun. El cumenza sia plazza il 1. da zercladur 2004.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun