Restaurants d'autostrada dastgan vegnir realisads dapi la midada da la pratica da la confederaziun da la mesadad da l'onn 2002 er en directa vischinanza d'ina sortida d'autostrada. Il plaz Tusaun "Rheinau" ch'è vegnì fixà da nov vegn ussa integrà en il plan directiv chantunal pervi da questa midada da la pratica. L'exposiziun publica da l'adattaziun dal plan directiv succeda dals 2 d'october fin ils 2 da december 2003. Il medem mument vegn er exponì il plan directiv regiunal.

Perquai che restaurants d'autostrada dastgan vegnir construids en directa vischinanza da sortidas d'autostrada, è puspè vegnida fatga ina valitaziun dal plaz per in restaurant d'autostrada en la regiun Tumleastga / Val Schons. Questas lavurs èn vegnidas realisadas en stretga collavuraziun dal chantun e da la regiun. Ins ha examinà ils plazs Roten, Cazas, Tusaun, Seglias e Ziràn. Quellas vischnancas avevan mussà in interess correspundent. Da la valitaziun dal plaz è resortì il plaz Tusaun "Rheinau" sco il meglier da tuts.

Plan directiv anc cun il plaz "Cazas"
Suenter che la vischnanca da Tusaun ha approvà l'entschatta da settember la realisaziun dal restaurant a l'autostrada, succeda ussa l'integraziun en il plan directiv chantunal. Ina da las premissas per realisar in restaurant d'autostrada en vischinanza d'ina sortida d'autostrada è tranter auter sia integraziun en il plan directiv chantunal.
Il plan directiv chantunal ch'è vegnì approvà da curt dal cussegl federal cuntegna anc il plaz Cazas per la realisaziun d'in restaurant d'autostrada. La midada da la pratica da la confederaziun è succedida pir curt avant la deliberaziun dal plan directiv general chantunal tras la regenza. Pervi da la midada da la pratica è vegnida inditgada ina remartga correspundenta en il plan directiv chantunal. Cun l'adattaziun dal plan directiv currenta vegn il plan directiv adattà a las relaziuns midadas.

Consultaziun durant dus mais
L'exposiziun publica da quests documents ha lieu dals 2 d'october 2003 fin ils 2 da december 2003. Durant l'exposiziun publica po mintgin far objecziuns e propostas tar ils plans directivs exposts. L'exposiziun publica ha lieu a Cuira ed a Tusaun. Parallelamain a l'exposiziun publica ha lieu la consultaziun tar las vischnancas da la regiun e tar l'administraziun chantunala sco er l'examinaziun preliminara dal plan directiv chantunal tar la confederaziun. Suenter succeda la repassada dal project, la deliberaziun e l'approvaziun dal plan directiv regiunal e chantunal. Ils proxims pass èn alura l'elavuraziun d'in project d'exposiziun tenor il dretg davart las vias naziunalas sco er l'adattaziun da la planisaziun locala da la vischnanca da Tusaun.

Rinviament per las medias:
Chargiar qua la documentaziun sin l'agen computer.

Gremi: uffizi da planisaziun
Funtauna: rg uffizi da planisaziun