La regenza grischuna vul reveder la lescha davart las finanzas dal
chantun Grischun LFC da l'onn 1998 e trametta ses sboz en la
consultaziun entaifer l'administraziun. Las valurs da l'experientscha
actualas, diversas intervenziuns en il cussegl grond e la finanziaziun
restanta da la cassa da pensiun chantunala pretendan ina revisiun
totala, tranter auter cun ils suandants accents:
- las premissas per la finanziaziun restanta da la cassa da pensiun
chantunala, decididas dal cussegl grond l'october 2000, vegnan fixadas
en detagl;
- ils giavischs dal parlament vegnan resguardads;
- la basa per manar las finanzas chantunalas en moda flexibla ed
adattada al stgalim vegn meglierada, e
- la LFC vegn adattada a la nova constituziun chantunala.
Ultra da quai duain vegnir delegadas tschertas cumpetenzas
finanzialas a la cumissiun da gestiun CdG ed a la regenza: Davart la
realisaziun definitiva d'eventualas scursanidas globalas dal preventiv
tras il cussegl grond e davart la permissiun definitiva da tut ils
credits supplementars - er da tals deliberads durant ina sessiun dal
cussegl grond - duai da nov pudair decider la CdG. La regenza duai da
nov pudair conceder garanzias en il rom da la promoziun da l'economia ed
augmentar las participaziuns ad ovras electricas. Per la delegaziun da
las cumpetenzas per approvar expensas e credits a la CdG ed a la regenza
duai dentant er vegnir revedì in artitgel da la nova constituziun
chantunala. La consultaziun da la revisiun totala da la LFC e da la
revisiun da l'art. 35 da la nova constituziun chantunala marscha fin la
fin da november 2003.
Nova ordinaziun davart il tubac procura per transparenza
La confederaziun vul reveder totalmain l'ordinaziun davart il tubac.
En quest connex vegn engrevgià l'obligaziun da declerar, d'annunziar e
da designar. La regenza grischuna salida explicitamain questas stentas
per transparenza. Ellas adattan l'ordinaziun davart il tubac a las
directivas internaziunalas e protegian cunzunt la giuventetgna. La nova
ordinaziun fixescha p.ex. concretamain ina valur maximala per nicotin e
per monoxid carbonic; la concentraziun maximala da catram vegn sbassada.
E: La confederaziun po pretender che maletgs da colur mussian sin
l'emballadi en moda explicativa las consequenzas dal fimar per la
sanadad.
Da vischnancas e regiuns
- Planisaziun locala revedida: La regenza ha approvà la revisiun da
differents meds da planisaziun da la vischnanca da Rueun.
- Reconstrucziun en connex cun las malauras 2002: Fin l'onn 2006 vul
la regenza investar en ina segunda etappa da realisaziun var 900'000
francs per la reconstrucziun e la sanaziun da vias e dustanzas suenter
las malauras da l'atun 2002. En quests secturs èn entradas 148 annunzias
da donns. Ils custs totals dals donns muntan a var 4,1 milliuns francs.
L'emprima etappa da realisaziun è vegnida approvada da la regenza la
mesadad da matg 2003.
Contribuziuns chantunalas a diversas instituziuns
- Promoziun da la cultura: Il museum regiunal da Tavau, la fundaziun
schmelzra S-charl e la fundaziun pro claustra son Gion Müstair survegnan
per divers projects contribuziuns chantunalas da totalmain var 66'000
francs.
- Protecziun d'utschels mezmieur: La fundaziun per la protecziun da
noss utschels mezmieur en Svizra survegn per ils onns 2004 fin 2007 ina
contribuziun chantunala da totalmain 88'000 francs per il project
"protecziun d'utschels mezmieur en il Grischun".
- Pignia: Per renovar ina part dal conduct da reservuar
Clugin-Pignia survegn la vischnanca ina contribuziun chantunala da var
23'000 francs.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun