La lescha per promover l'economia publica daventa la "lescha per promover il svilup economic en il chantun Grischun". La midada dal num vegn accumpagnada d'ina extensiun da sia applicaziun. La regenza ha deliberà la missiva correspundenta per mauns dal cussegl grond.

L'emprima lescha per promover l'economia publica è vegnida creada l'onn 1974 en connex cun la promoziun da la regiun da muntogna. Ils onns 1979 e 1979 èn vegnidas fatgas duas revisiuns. Tras la nova lescha duai vegnir promovì il svilup economic cun la finamira da garantir las plazzas da lavur existentas e da crear novas. Cun la revisiun proponida vuless la regenza garantir la cumpetitivitad da la promoziun grischuna da l'economia. Per quest intent vegnan perfecziunads ils instruments vertents e creads novs instruments da promoziun. Per part sa tracti er da dar ina meglra basa legala a tschertas activitads da fin uss. Plinavant stgaffescha questa lescha la basa legala per il concept chantunal per stabiliments da sport.

La revisiun metta tranter auter ils sequents accents:
- La creaziun ed amplificaziun d'interpresas pitschnas e mesaunas (IPM) duai pudair vegnir sustegnida da nov surtut cun emprests da daners.
- Emprests da daners èn previs er per l'hotellaria. Quests emprests furman in instrument independent dal chantun e n'èn betg pli liads a la promoziun tras la societad svizra da credit d'hotel (SCH).
- Contribuziuns a la creaziun da l'infrastructura da telecommunicaziun pudevan per part gia vegnir pajadas. Da nov èn previsas contribuziuns da gestiun (per exempel per la transmissiun) sco er la pussaivladad ch'il chantun po, en cas excepziunals, sa participar a las interpresas correspundentas (Tele-Rätia).
- En cumbinaziun cun incaricas da prestaziun pon vegnir concedidas contribuziuns da gestiun ad instituziuns. Fin uss eran contribuziuns mo pussaivlas per crear novas prestaziuns da servetsch. Contribuziuns da gestiun duain pudair vegnir prestadas er ad instituziuns da perscrutaziun, particularmain a talas cun attracziun internaziunala.
- Cun contribuziuns a projects da cooperaziun tranter manaschis sco er a las stentas per avrir martgads exteriurs duai vegnir rinforzada la cumpetitivitad da Ias IPM.
- Per promover il transfer da savida, cunzunt en connex cun projects da domiciliaziun, èn previsas contribuziuns a projects specifics da scolaziun e da furmaziun supplementara.
- I vegn desistì da la pussaivladad da sa participar a la sanaziun d'interpresas, d'avantagiar regiuns economicamain flaivlas sco er da la cumissiun consultativa per dumondas economicas.
Per rinforzar la promoziun chantunala da l'economia na basegni dentant betg mo da meglierar la basa legala, mabain er da metter a disposiziun dapli meds finanzials per ils singuls instruments. Quai vegn a vegnir examinà pir en il rom da la planisaziun da finanzas 2005 fin 2008. Il cussegl grond vegn probablamain a tractar la revisiun da la lescha en la sessiun da favrer 2004.

Gremi: regenza
Funtauna: rg chanzlia chantunala dal Grischun