La regenza grischuna ha approvà il contract per la fundaziun da la SA Ospitals Cuira. Questa societad da manaschament è responsabla per l'entira gestiun operativa da l'ospital chantunal, da l'ospital da la Crusch e da l'ospital da dunnas Fontana. Las parts contrahentas èn ils purtaders actuals dals trais ospitals: La fundaziun ospital chantunal e regiunal retic a Cuira, la fundaziun ospital da la Crusch a Cuira ed il chantun Grischun sco purtader da l'ospital da dunnas chantunal Fontana. Il punct da partenza da questa reorganisaziun operativa è in unic ospital cun trais lieus. L'eliminaziun da duplicitads e l'utilisaziun da potenzials da sinergias è ina contribuziun essenziala per reducir ils custs dal sectur da la sanadad.

300'000 francs per promover il lain indigen
Per promover il lain grischun ha la regenza approvà 300'000 francs. Il program da promoziun 2003 cumpiglia la realisaziun d'in center da laina e la stabilisaziun d'in'etichetta da product per il lain grischun. In auter accent è l'introducziun d'ina scolaziun supplementara modulara tenor il motto: "En furma pervi da la cooperaziun". L'onn 2003 vul l'uniun lain grischun intensivar sia lavur da publicitad. Tranter auter vegn alura surdà in premi da construcziun en lain e duas occurrenzas supremas da lain vegnan manadas tras. Cun ina cussegliaziun amplifitgada tar ils patruns da construcziun duai vegnir cuntanschì in augment evident da la dumonda. La promoziun dal lain indigen è ina da las finamiras dal program da la regenza 2001-2004.

Da vischnancas e regiuns
La regenza ha approvà divers projects da vischnancas:
- la revisiun da las leschas da taglia da Spleia e Tumegl
- la revisiun parziala da la constituziun communala da la citad da Maiavilla (reorganisaziun dal cussegl da scola)
- la revisiun parziala da lescha da construcziun e da la planisaziun locala "center dal parc naziunal" da Zernez
- il plan da zonas parzial Meierhof e la revisiun parziala da la lescha da construcziun da Sursaissa
- Sper il stgalim superiur mainan las trais vischnancas Alvagni, Schmitten e Surava communablamain er la scola primara a partir da l'onn da scola 2003/2004. La regenza ha ussa approvà la midada correspundenta dals statuts dal consorzi da scola da Belfort dadens.
- Il domicil da l'uffizi da stadi civil unì Sutsassiala (vischnancas Breil, Schlans, Sumvitg e Trun) è a Trun. Il domicil da l'uffizi da stadi civil unì Schons (vischnancas Andeer-Clugin, Farera, Casti-Vargistagn, Donat, Calantgil, Lon, Maton, Pignia, Runtgaglia e Ziràn) è a Ziràn-Reschen. Las propostas correspundentas dals circuls e da las vischnancas ha er approvà la regenza.
Contribuziuns chantunalas a differentas instituziuns
- 20'000 francs ha la regenza deliberà per il project d'ediziun "Die drei Hunde. Rätoromanische Märchen aus dem Engadin, Oberhalbstein und Schams". I sa tracta dal segund tom d'ina ediziun da paraulas en lingua tudestga.
- In sustegn finanzial survegn er il teater da marionettas "Arcasperli". La regenza ha approvà ina contribuziun per promover la cultura da 15'000 francs.
- Per il mantegniment da la ruina dal chastè da Tschanüff da Ramosch ha la regenza deliberà ina summa da 30'000 francs. Latiers sa tracta da l'emprim'etappa da las lavurs da conservaziun. Per il project da la conservaziun generala da la ruina vegni calculà cun 1,5 milliuns francs.

Persunal
Dominigue Sonja Frank è vegnida elegida sco media superiura a l'ospital da dunnas Fontana.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun