La stad duai entrar en vigur la lescha revedida davart l'assicuranza da dischoccupads LADI. L'ordinaziun executiva correspundenta OADI è actualmain anc en la consultaziun. Sco positiv taxescha la regenza dal Grischun ch'ina collavuraziun da tut las instituziuns è vegnida fixada. La nova regulaziun per metter a quint periodas d'educaziun, la regulaziun unifitgada per inoltrar curs e programs sco er la durada da retratga prolungada tar la promoziun da l'activitad da gudogn independenta quintan er tar las fermezzas da l'ordinaziun revedida. Crititgà ha la regenza surtut l'intenziun da metter a quint directamain las contribuziuns chantunalas a las intermediaziuns da lavur publicas e l'indemnisaziun dals custs administrativs da la confederaziun. In tal midament da sistem renda la cumpensaziun tranter confederaziun e chantun considerablamain pli cumplitgà.

Consentiment guvernativ per "info-tv Tavau/Claustra"
La regenza n'ha naginas resalvas cunter la renovaziun da la concessiun per il program d'infurmaziun "info-tv Tavau/Claustra". Ch'il project megliereschia l'infrastructura turistica ed augmenteschia l'attractivitad da la destinaziun Tavau e Claustra, scriva ella en sia consultaziun a l'uffizi federal da communicaziun UFCOM. La lescha federala davart radio e televisiun LRTV prescriva ch'ils chantuns, en ils quals sa chatta la regiun d'emissiun, stoppian vegnir tadlads.

Taxas da curs pli autas al Plantahof
La regenza ha auzà las taxas da curs dal center da furmaziun e cussegliaziun agricula "Plantahof" CFCA per 20 pertschinet; per 10 pertschient muntan ils custs per alimentaziun ed alloschi. Ils custs per participantas e participants dal Grischun na vegnan en l'avegnir betg pli subvenziunads e l'ordinaziun per cuvrir ils custs da viadi vegn abolida senza cumpensaziun. Ina cumparegliaziun da las tarifas d'alimentaziun ed alloschi cun autras scolas agriculas e centers da furmaziun ha mussà ch'ina adattaziun dals pretschs è giustificabla. Il reglament revedì entra en vigur ils 15 d'avrigl 2003.

Da vischnancas e regiuns
- La citad da Glion dastga realisar la procedura per il plan da quartier da la zona da mastergn, 2. etappa d'access en il territori da Grüneck. La regenza aveva pretendì l'onn 1994 da la citad da Glion ina examinaziun dal sulom. La regenza ha ussa prendì enconuschientscha dals documents inoltrads.
- La regenza ha deliberà ina contribuziun da maximal 975'000 francs per il project da rempar da lavinas "Plütschessa" da la vischnanca da Ftan. Ils custs totals per quel project muntan a 3,9 milliuns francs.
- Per il project integral "Seewis" ha la regenza garantì contribuziuns chantunalas da circa 880'000 francs (custs totals: quatter milliuns francs). Il project prevesa diversas lavurs, spartidas sin tschintg onns, en ils guads da l'intschess idrografic dal vallun Tschina.
- Sco part dal plan per l'access dal guaud da la vischnanca da Fideris ha la regenza approvà il project per ils dus tocs "Oberfäld" ed "Allmeindli". Perquai ha ella garantì a la vischnanca ina contribuziun chantunala da circa 309'000 francs (custs totals: 1,2 milliuns francs).
- La regenza ha approvà la nova lescha da taglia da Madulain.

Contribuziuns chantunalas a differentas instituziuns
- La regenza ha approvà 348'000 francs sco contribuziuns per la promoziun da la cultura. Cun quels raps vegnan sustegnids l'onn 2003 19 projects culturals.
- Sco contribuziun a la promoziun da la giuventetgna ha la regenza empermess al circus d'uffants "Lollypop" 22'000 francs.

Projects da vias
- Sin la via da la Lumnezia vegn la punt Val Miedra sanada e schlargiada. La regenza ha deliberà per quai in credit da circa 680'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun