Cun la revisiun parziala da la lescha davart las publicaziuns uffizialas ("lescha federala davart la collecziun da las leschas e davart il fegl uffizial federal") vegnan las constituziuns chantunalas a scumparair da la collecziun sistematica dal dretg federal; medemamain ils contracts interchantunals. La revisiun proponida resguarda plinavant la publicaziun electronica da la collecziun uffiziala dal dretg federal. Sch'i resultassan qua differenzas textualas cun la versiun stampada, alura duai restar decisiva er vinavant la versiun stampada. La regenza grischuna ha beneventà la nova regulaziun da la lescha davart las publicaziuns uffizialas. En sia consultaziun a la chanzlia federala s'engascha ella dentant er per il fatg, che la versiun rumantscha dals decrets duaia daventar medemamain impegnativa sco ils decrets en las autras trais linguas uffizialas. Las regulaziuns per il rumantsch duain tenor il sboz da revisiun vegnir surprendidas da la lescha davart las publicaziuns uffizialas en la nova lescha da linguas. La regenza grischuna pretenda dentant disposiziuns transitorias per il cas che la nova lescha davart las publicaziuns uffizialas entrass en vigur avant la nova lescha da linguas; la regenza è numnadamain da l'avis ch'i stoppia esser garantida ina cuntinuitad per l'applicaziun dal rumantsch.

Assicuranza da malsauns: da nov èn las vischnancas cumpetentas per dumondas d'excepziun da l'obligaziun da s'assicurar
Mintga persuna cun domicil en Svizra sto da princip s'assicurar cunter malsogna. Per excepziuns da questa regulaziun è cumpetent il chantun. Quai prescrivan las disposiziuns executivas tar la lescha chantunala davart l'assicuranza da malsauns e la reducziun da las premias DERtLARP. Insumma betg reglada è fin uss la cumpetenza per ina subordinaziun voluntara a l'obligaziun da s'assicurar en Svizra. La regenza ha pia precisà e cumplettà las DERtLARP. Da nov duain las vischnancas tractar er dumondas d'excepziun e dumondas per subordinaziuns voluntaras ed ellas duain er esser cumpetentas per l'execuziun da l'obligaziun fundamentala da s'assicurar.

Las prestaziuns da spitex daventan pli charas
La regenza ha reducì la tariffa chantunala per las prestaziuns da spitex per diesch pertschient. Da nov paja il chantun 13 francs per ura che vegn messa a quint. A medem temp ha la regenza adattà las tariffas per las prestaziuns da l'economia da chasa. Minimalmain dastgan vegnir dumandads da nov 14 (fin uss 12) e maximalmain 20 francs (fin uss 16) per ura. Cun questas adattaziuns ha la regenza realisà l'ordinaziun dal cussegl grond davart las reducziuns linearas da contribuziuns en il sectur da spitex dal november 2002.

Il di svizzer dal sport da scola 2004 ha lieu en il Grischun
Il di svizzer dal sport da scola 2004 ha lieu en il Grischun. La regenza ha approvà ina dumonda correspundenta da l'associaziun svizra per il sport en scola ASSS.

Da vischnancas e regiuns
- Las pendicularas Motta Naluns Scuol-Ftan-Sent SA duain pudair construir ina nova sutgera da 6 da la Motta Naluns si Schlivera. A l'uffizi federal da traffic propona la regenza d'approvar la correspundenta dumonda da concessiun.
- Gist trais constituziuns communalas èn vegnidas approvadas da la regenza; quella da Zizers, d'Urmagn e quella d'Alvaschagn.
- Il project per la nova halla da sport "Quadera" a Saas è da princip vegnì approvà da la regenza. Sco contribuziun chantunala da construcziun èn vegnids empermess var 585'000 francs.
- A Maiavilla po vegnir construida la "halla da stalizzas" (deposit da las stalizzas per il stgaudament da zinslas da las novas hallas da gimnastica). La regenza ha deliberà per quai ina contribuziun chantunala da construcziun da circa 30'000 francs.
- Il maraton inline da l'Engiadina po avair lieu. Per l'occurrenza dals 28 da zercladur 2003 ha la regenza permess da duvrar il percurs tranter Malögia e S-chanf.
- Las planisaziuns localas revedidas da Samedan (lescha da construcziun, plans da zonas "Val Bever", "Muntatsch-Clavadatsch", Val Roseg e "Muottas-Champagna") sco er da Castasegna ("estratto del piano delle zone") ha uss approvà er la regenza.
- Per la sanaziun da la via chantunala en il vitg da Tschlin sco er per la renovaziun e la cumplettaziun da tut ils conducts d'ovra ha la regenza consentì ina contribziun chantunala da totalmain var 270'000 francs.

Contribuziuns chantunalas a differentas instituziuns
- A la Crusch Cotschna Svizra CCS ha la regenza concedì ina contribuziun da 10'000 francs en favur da l'acziun agid d'urgenza per ils fugitivs iracais.
- Cun 300'000 francs or dal fond da la lottaria interchantunala sa participescha il chantun Grischun al chapital da la fundaziun "Convivenza", il center internaziunal per minoritads. La sedia giuridica da la fundaziun è a Mustér. La regenza ha cumbinà sia empermischun cun differentas cundiziuns e pretensiuns.

Projects da vias
- Per divers projects da vias (A 13, via da la Lumnezia, via dal Partenz, via da l'Alvra) ha la regenza deliberà in credit total da circa 11,5 milliuns francs.

Persunal
Per il post da stab per linguas (fin uss post da stab per linguas chantunalas) a la scol'auta professiunala da pedagogia dal Grischun èn vegnids elegids ils docents Gian-Peder Gregori e Vincenzo Todisco. Il pensum da lavur munta a 40 pertschient per docent.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun