Meglierar la collavuraziun tranter ils centers da turissem, ils
centers regiunals, las vischnancas d'aglomeraziun e las vischnancas
ruralas en il spazi da Cuira e conturn: quai è la mira dal project da
model aglomeraziun Cuira e conturn (MACC). En quest connex èsi impurtant
da registrar l'emprim las differentas modas da vesair e da percepziun,
las fermezzas e deblezzas sco er ils dubis e las temas en ils differents
territoris parzials sco er tar ils differents acturs. Per quest motiv
vegnan ussa lantschadas consultaziuns.
Per iniziar ina collavuraziun vegnan l'emprim intercuridas las
relaziuns spazialas en il spazi da Cuira e conturn. Quel tanscha da
Sargans enfin Tusaun sco er fin Glion, Lai, Arosa e Küblis (cf.
l'illustr.). Al project sa participeschan la citad da Cuira, tut las
regiuns en il perimeter dal project, ils uffizis da planisaziun dals
chantuns Grischun e Son Gagl sco er la confederaziun. La basa per quest
project èn la nova politica d'aglomeraziun da la confederaziun sco er la
collavuraziun tranter las regiuns pertutgadas ed ils dus chantuns en il
rom da la planisaziun directiva.
Per l'examinaziun da las relaziuns spazialas vegnan las infurmaziuns
existentas cumplettadas cun consultaziuns. I vegn eruì nua ch'i vegn gia
collavurà u agì surregiunalmain e nua ch'igl existan anc deficits e
pussaivladads da meglieraziun. Latiers vegn resguardada la
collavuraziun en ils secturs traffic, economia, cultura, furmaziun,
sanadad e sport. Sin quests champs giogan differents acturs ina rolla;
els vegnan integrads directamain en la consultaziun. Uschia vegnan
interrogads a bucca u en scrit enfin la fin da zercladur en il spazi da
Cuira e conturn ina selecziun casuala d'abitantas e d'abitants sco er
tut las vischnancas, las organisaziuns turisticas e las federaziuns da
mastergn. Ils resultats vegnan alura sviluppads vinavant e consolidadas
en il rom da duas dietas da lavur. Fin la fin da l'onn duai esser avant
maun ina furma d'organisaziun per la collavuraziun surregiunala ed ils
temas d'approfundaziun per l'ulteriura elavuraziun dal project duain
esser definids.
Gremi: uffizi da planisaziun
Funtauna: rg uffizi da planisaziun