En la praschun Cazas Realta è vegnì avert la primavaira 2004 il tract da cellas 2 ch'è vegnì sanà. Vi dal tract da cellas 1 è vegnì renovà mo quai ch'era absolutamain necessari per pudair far eventualmain ina construcziun nova a quest lieu. Pervi da las experientschas positivas cun il tract da cellas 2 ch'è vegnì sanà totalmain ha la regenza ussa er approvà il project per la sanaziun totala dal tract da cellas 1. Ils custs correspundents importan ca. 2.2 milliuns francs. La regenza vegn a dumandar dal cussegl grond in credit posteriur tar il preventiv 2005.

Da vischnancas e regiuns
- Tschappina: La lescha communala da taglia revedida entra en vigur il 1. da schaner 2005. Adattadas èn vegnidas las disposiziuns en connex cun la taglia sin immobiglias (art. 11). La regenza ha approvà questa revisiun.
- Masagn: La nova constituziun communala è vegnida approvada.
- Novas vias da colliaziun dal chantun: Il chantun surpiglia per il 1. da schaner 2005 la via da Malix-Brambrüesch (davent da la bifurcaziun da la via dal Güglia fin Brambrüesch) sin ina lunghezza da ca. 3,5 kilometers e la via da Campagna a Panaduz (davent da la bifurcaziun da la via sursilvana fin Campagna) sin ina lunghezza da ca. 1 kilometer.
- Pais maximals da vehichels: Sin la via da colliaziun Trin-Trin Mulin (Trin ost fin Trin lavuratori) è il pais maximal vegnì dauzà da 28 sin 40 tonnas.

Contribuziuns chantunalas a differentas instituziuns
- Center per pedagogia speziala a Giuvaulta: Per ils dus bus da scola duai vegnir construida ina garascha averta. La regenza ha approvà per quai ina contribuziun chantunala da ca. 40'000 francs.

Chaussas persunalas
- Carmen Zimmermann Bürkler da Mastrils è vegnida elegida en l'uffizi da persunal e d'organisaziun sco manadra dals secturs spezials e dals sistems da las resursas umanas.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun