Ils dretgs da l'uffant ston adina esser garantids. Perquai sustegna
la regenza grischuna senza resalvas il "protocol facultativ tar la
convenziun dals dretgs da l'uffant concernent la vendita d'uffants, la
prostituziun d'uffants e la pornografia d'uffants". Il protocol vul
realisar las finamiras da la convenziun dals dretgs da l'uffant e metta
en il center la protecziun da l'uffant cunter l'explotaziun commerziala.
Daspera cuntegna il protocol surtut disposiziuns davart la cumpetenza,
l'agid a victimas, il dretg d'extradiziun, la cooperaziun internaziunala
ed il basegn d'agir politic. Tras quellas vegnan fatgas pretensiuns
minimalas al dretg penal naziunal. La Svizra na dastga però betg sa
cuntentar cun questas, scriva la regenza en sia consultaziun al
departament federal dals affars exteriurs. Il tema da la protecziun da
l'uffant sto esser e restar ina mira centrala da l'agenda politica. La
Svizra aveva suttascrit l'onn 2000 il protocol facultativ da la
radunanza generala da la ONU.
Psichiatria d'uffants e giuvenils: ina contribuziun fixa bassa empè
d'ina reducziun lineara
La contribuziun chantunala a la fundaziun per la psichiatria
d'uffants e giuvenils en il Grischun per l'onn 2004 vegn limitada sin in
milliun francs. Tras quai ha la regenza realisà l'ordinaziun davart las
reducziuns linearas da contribuziuns dal november 2002 er en il sectur
da la psichiatria d'uffants e giuvenils. L'ordinaziun prescriva da
reducir en il quint current per diesch pertschient tut las contribuziuns
dal chantun che n'èn betg liadas tras la legislaziun federala u tras
cunvegnas interchantunalas. Per il chantun maina la soluziun specifica
per la fundaziun per la psichiatria d'uffants e giuvenils en il Grischun
al medem resultat sco ina reducziun lineara da las contribuziuns per
diesch pertschient.
Tarmed: la regenza approvescha il contract d'affiliaziun per il
Grischun
La regenza ha approvà il contract chantunal d'affiliaziun da tarmed
tranter l'uniun grischuna da medis e la santésuisse dal Grischun. La
valur dal punct da taxa è vegnida fixada ad 84 raps. Questa valur na
chaschuna nagins custs supplementars ed er betg in augment da las
premias.
Dapi il 1. da schaner vala per prestaziuns medicinalas ambulantas en
tut la Svizra la structura da tariffa tarmed. La santésuisse (la
federaziun interprofessiunala dals assicuraders svizzers da malsauns) e
la federaziun da las medias e dals medis svizzers FMH avevan fatg per
quest intent l'onn 2002 in contract general. Il tarmed remplazza il
catalog da las prestaziuns d'ospital.
Contribuziun pli auta per il project interreg "DACH+"
Fin l'onn 2007 sustegna la regenza il project "DACH+" cun 60'000
francs. Quest project interreg ha la finamira da tractar problems e
svilups territorials sco il svilup dal traffic e da l'abitadi,
l'utilisaziun dal temp liber e da recreaziun u interdependenzas
economicas - e quai sur ils cunfins or. Participà è tut il territori da
cunfin tranter la Germania, l'Austria, la Svizra ed il Liechtenstein.
Perquai che la confederaziun reducescha fitg ses engaschament finanzial
per il project, surpiglian ils chantuns pertutgads la finanziaziun
restanta. Ils custs per il chantun Grischun s'augmentan tras quai per
10'000 francs. Ils custs totals dal project importan 800'000 francs.
Da vischnancas e regiuns
- Molinis: La regenza ha approvà - cun obligaziuns e cundiziuns - la
tschiffada d'aua da funtauna en il territori da "Chuoregger". La
permissiun è limitada fin la fin da schaner 2024.
- Zuoz: La regenza ha approvà il plan da zonas ed il plan general da
furmaziun "golf". Uschia po la zona da golf vegnir engrondida cun il
kiosc planisà en il sectur da la pista 17 e la lingia da distanza dal
guaud vegnir adattada. La surfatscha engrondida da la zona da golf vegn
relaschada or dal territori "cun pretensiuns d'utilisaziun e da
cultivaziun" ed ina part da la pista 17 vegn attribuida al territori
"culp da partenza".
- Cuira: Il project per sanar il bogn cuvert dal Sand è vegnì
approvà. Ils custs muntan a var 3,1 milliuns francs.
Contribuziuns chantunalas a differentas instituziuns
- Lottaria naziunala interchantunala / promoziun da la cultura: La
regenza ha approvà totalmain 55'000 francs per l'ediziun dal cudesch
davart las vopnas tar l'istorgia grischuna ("Wappen zur Bündner
Geschichte") da Gerhard Simmen, per las 26 funtaunas siglintas che duain
simbolisar ils chantuns e mezs chantuns sin la plazza federala concepida
da nov, e per il teater da marionettas "Arcasperli" a Cuira.
- Tgira da monuments: Totalmain var 450'000 francs ha la regenza
approvà per lavurs vi da la "chiesa parrocchiale di San Pietro" a
Verdabbio, per ils "grotti di Cama" a Cama, per la "ca' rossa, palazzo
del Togni" a Grono, per il "Turmhaus" a Malans e per la "chaplutta da s.
Gion Battista" a Val S. Pieder.
- Agid umanitar: La 13avla missiun da l'uniun d'agid umanitar per la
Russia survegn ina contribuziun da 30'000 francs.
- Malauras 2002: La regenza ha approvà ulteriurs daners per reparar
ils donns. 18 vischnancas survegnan totalmain var 1,4 milliuns francs
per differents projects da reparaziun en Surselva, en la Val dal Rain
grischuna, en il Grischun central ed en l'Engiadina.
Projects da vias
- Sta. Maria V.M.: Var 330'000 francs ha la regenza concedì per
schlargiar e sanar la via da colliaziun a la via dal Fuorn a Paclera.
- Tunnel dal San Bernardin: En il rom da las lavurs da sanaziun ha
la regenza approvà 700'000 francs per indrizs electromecanics.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun