La regenza grischuna beneventa la finamira generala sco er la
concepziun flexibla dal concept davart l'urs da l'uffizi federal
d'ambient (UFAM). Quest concept ch'è vegnì elavurà principalmain sin
basa da las experientschas d'enfin ussa cun la cumparsa da l'urs en il
Grischun sto però vegnir sviluppà vinavant ils proxims onns sin basa
d'ulteriuras experientschas praticas. Quai scriva la regenza en sia
consultaziun a la confederaziun. La regenza è da l'opiniun ch'il sboz
dal concept stoppia vegnir repassà e mess en vigur uschè spert sco
pussaivel. Apaina che ulteriuras experientschas èn avant maun sto vegnir
fatga in'analisa cumplessiva dals fatgs sin basa d'ina controlla dal
success. Plinavant sto l'ulteriur proceder vegnir fixà ensemen cun ils
chantuns pertutgads.
La preschientscha da l'urs en il Grischun che ha durà circa dus mais
l'onn 2005 ha chaschunà custs da totalmain var 80'000 francs.
L'indemnisaziun d'animals da niz stgarpads importa 14'850 francs, ils
custs supplementars da l'associaziun d'allevament da nursas da Ramosch
muntan a 10'037 francs ed ils custs da persunal supplementars da
l'uffizi chantunal da chatscha e pestga a 53'108 francs. Pervi da quai
pretenda la regenza che tut ils custs per mesiras da prevenziun en
connex cun l'immigraziun d'animals gronds da rapina stoppian vegnir
purtads da la confederaziun. Cun smirvegl prenda la regenza ultra da
quai enconuschientscha dal fatg che l'assamblea federala ha scursanì
massivamain - cunter tuttas aspectativas - il preventiv dal UFAM per la
protecziun da las muntaneras 2006. Pervi da quai pretenda la regenza che
las indemnisaziuns finanzialas vegnian regladas tranter la confederaziun
ed il chantun en il rom d'ina cunvegna cumplessiva e da lunga durada.
La fin finala constatescha la regenza che la concessiun da
permissiuns da schluppettar urs da ristga crodia tenor la lescha
federala da chatscha en il champ da cumpetenza dal chantun. Perquai ch'i
stoppia per regla vegnir reagì spert en tals cas vegn il chantun a
conceder las permissiuns correspundentas da schluppettar mo en
cunvegnientscha cun il UFAM. La regenza refusa energicamain che la
direcziun dal parc naziunal haja in dretg da cogestiun fixà en connex
cun la procedura da decisiun. Pervi da quai pretenda la regenza che
quest passus vegnia stritgà senza cumpensaziun. En cas ch'in urs privlus
vegnia eliminà en il parc naziunal u en sia proxima vischinanza vegnia
la direcziun dal parc natiralmain a vegnir consultada. La collavuraziun
vertenta cun la direcziun dal parc saja sa cumprovada a plaina
satisfacziun e na stoppia pervi da quai betg vegnir fixada da nov en il
concept davart l'urs en Svizra.
Da vischnancas e regiuns
- Fanas: Il plan da zonas 1:500 "revisiun parziala da la chasa da
scola" dals 27 da favrer 2006 da la vischnanca da Fanas vegn approvà.
Projects da vias
La regenza ha approvà totalmain 1'170'000 francs per construir e per
sanar divers trajects da via:
- via dal Bernina: pass dal Bernina - Baraccone
- via da Duvin: storta dal Tuff - Duvin
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun