A chaschun da sia sesida dals 4 da matg 2006 ha la cumissiun per economia, taxas e politica da stadi dal cussegl grond tractà la missiva da la regenza tar la nova regulaziun da l'organisaziun da la regenza e da l'administraziun. La cumissiun che stat sut il presidi dad Ernst Nigg propona unanimamain al cussegl grond d'entrar en il project. Il president da la regenza Claudio Lardi è er stà preschent a la sesida.
Co che la regenza scriva en sia missiva vegn l'organisaziun da la regenza e da l'administraziun centrala reglada oz per gronda part en l'urden da gestiun da la regenza ed en diversas ordinaziuns ed en divers conclus da la regenza. In emprim motiv per la nova regulaziun da l'organisaziun da la regenza e da l'administraziun è la nova constituziun dal chantun Grischun che prevesa che tschertas disposiziuns da l'urden da gestiun basegnan - pervi da lur impurtanza - la furma d'ina lescha. In ulteriur motiv per reglar da nov l'organisaziun da la regenza e da l'administraziun è la reorganisaziun da l'administraziun chantunala ch'è vegnida concludida da la regenza. Previs èsi ch'ils champs d'incumbensas vegnian per part repartids da nov als departaments e che differents uffizis vegnian correspundentamain a midar departament.
L'organisaziun da la regenza e da l'administraziun duai ussa vegnir reglada da princip en dus relaschs, en ina lescha davart l'organisaziun da la regenza e da l'administraziun ed en in'ordinaziun davart l'organisaziun da la regenza e da l'administraziun. Tenor la missiva da la regenza sa restrenscha il sboz da la lescha menziunada al fatg da fixar ils princips da l'organisaziun da la regenza e da l'administraziun. Quai correspunda er a las prescripziuns da la nova constituziun chantunala che dat dapli cumpetenza a la regenza en l'organisaziun da l'administraziun. Sin basa da la constituziun ha la regenza spezialmain la cumpetenza da reglar ils champs d'incumbensa dals departaments tras in'ordinaziun. L'ordinaziun davart l'organisaziun da la regenza e da l'administraziun n'è betg object dal project da revisiun e pia er betg object da discussiun en il cussegl grond.
Suenter avair discutà detagliadamain il project ha la cumissiun finalmain suandà en tut ils puncts las propostas da la regenza ed ha deliberà la missiva da la regenza unanimamain per mauns dal cussegl grond.
Il cussegl grond vegn a tractar quest project durant la sessiun da zercladur 2006.

Persuna che dat infurmaziuns:
Ernst Nigg, president da la cumissiun per economia, taxas e politica da stadi, tel. 081 307 36 36

Gremi: cumissiun per economia, taxas e politica da stadi
Funtauna: rg cumissiun per economia, taxas e politica da stadi