En il Grischun cumenzan mintga onn passa 1600 giuvenils ina
scolaziun en in manaschi d'emprendissadi. Sco engraziament per lur
prontezza da scolar ils giuvenils obtegnan tut ils manaschis
d'emprendissadi dal chantun - en il rom d'ina acziun singulara - ils
proxims dis gratuitamain il "manual per la furmaziun fundamentala en il
manaschi". La nova ovra da standard gida a concepir cun success la
scolaziun en il manaschi. L'acziun vegn sustegnida da la confederaziun e
dals uffizis chantunals da furmaziun professiunala.
La scolaziun en ils manaschis d'emprendissadi è ina pitga centrala
dal sistem svizzer da la furmaziun professiunala. Manaschis
d'emprendissadi surpiglian responsabladad ed accumpagnan ils giuvens
tras la furmaziun fundamentala professiunala. Cun lur engaschi
contribueschan els en moda decisiva che noss sistem da la furmaziun
professiunala saja in success naziunal ed internaziunal. Sco
renconuschientscha per questa activitad da scolaziun han perquai
l'uffizi federal da furmaziun professiunala e da tecnologia (UFFT) sco
er la conferenza svizra dals uffizis chantunals da furmaziun
professiunala (CSFP) concludì d'engraziar a tut ils manaschis
d'emprendissadi cun il "manual per la furmaziun fundamentala en il
manaschi". La furniziun en il Grischun tudestg succeda la fin da
zercladur, la versiun taliana vegn furnida en las vals il cumenzament da
settember.
La nova ovra da standard per ina furmaziun cun success
Il "manual per la furmaziun fundamentala en il manaschi" remplazza
l'ovra da standard veglia "manual per patruns d'emprendissadi" ch'è
cumparida avant passa 20 onns. Il manual vegn introducì cun ina
prefaziun da cusseglier federal Joseph Deiss. La part principala è
dividida en duas parts. En l'emprima part vegnan descrittas las etappas
impurtantas da la successiun da la furmaziun fundamentala en il
manaschi. Ella cuntegna infurmaziuns dad A fin Z e porscha a tut las
furmaturas ed a tut ils furmaturs da la professiun - sco quai che las
patrunas ed ils patruns d'emprendissadi vegnan numnads tenor la nova
lescha chantunala davart la furmaziun professiunala - ils instruments
teoretics necessaris per la furmaziun en in manaschi. En la segunda
part, tar ils temas da support, vegn explitgà il sistem svizzer da la
furmaziun professiunala e diversas tematicas vegnan approfundadas e
cumplettadas.
In agid indispensabel per la furmaziun en la pratica
Domaduas parts èn vegnidas cumplettadas cun blers meds auxiliars
pratics sco fegls d'infurmaziun, glistas da controlla e formulars per
sustegnair la scolaziun entaifer il manaschi. Sin ina glista detagliada
da litteratura e da links è plinavant enumerada la basa legala da la
furmaziun professiunala. Il manual cuntegna ultra da quai bleras
adressas da paginas d'internet cun infurmaziuns utilas. Registers vids a
la fin dal manual porschan plazza als manaschis d'emprendissadi per
agiuntar agens documents.
Il "manual per la furmaziun fundamentala en il manaschi" cuntegna er
in lexicon da la furmaziun professiunala. Sco versiun surlavurada e
cumplettada, maina el cun passa 220 chavazzins tras tut ils temas
impurtants da la furmaziun professiunala.
Il "manual per la furmaziun fundamentala en il manaschi" vegn edì da
la conferenza dals uffizis da la furmaziun professiunala da la Svizra
tudestga. Per l'emprima giada pon ins retrair il manual en tudestg,
franzos e talian.
Gremi: uffizi per la furmaziun professiunala
Funtauna: rg uffizi per la furmaziun professiunala