Il museum da la natira dal Grischun, il museum d'art dal Grischun ed
il museum retic han realisà - ensemen cun il marketing da cultura da
l'uffizi da cultura dal Grischun - in plan da la citad tut spezial.
Grond e pitschen duain vegnir manads - en moda variada e ludica - en il
trais museums chantunals a Cuira.
In nov plan da la citad per uffants fa che la visita da la citad da
Cuira e dals museums a Cuira daventa in eveniment tut spezial:
infurmaziuns da tut gener ed incumbensas surprendentas per uffants
mainan tematicamain e geograficamain als trais gronds museums grischuns
a Cuira. Pitschnas pausas cun incumbensas d'observar e cun «attracziuns»
fan che gia la via als trais museums daventa in viadi d'exploraziun. En
las trais chasas sezzas - che sa deditgeschan en moda cumplessiva als
temas art, istorgia e natira dal chantun Grischun - èn prontas en in
«lieu da scuntrada» propostas, engiavineras ed incumbensas che fan che
la visita da las exposiziuns daventa in eveniment spezial. L'entrada en
ils museums è gratuita per uffants fin 16 onns.
Il plan ch'è illustrà en ina moda che correspunda als uffants è
vegnì concepì e realisà da las pedagogas e dals pedagogs dal museum
d'art dal Grischun, dal museum retic e dal museum da la natira dal
Grischun . El duai svegliar l'interess ed il gust da visitar in museum,
accumpagnar famiglias ed il public giuven dals museums e manar en las
exposiziuns ch'èn per part vegnidas concepidas en moda dal tuttafatg
nova. Ils museums pon daventar uschia lieus d'eveniment e d'emprender
attractivs ed impurtants. Famiglias cun uffants da 5 fin 12 onns sco er
classas da scola u gruppas da champs da vacanzas èn il public ch'ins ha
prendì en mira cun realisar quest plan da la citad. Sin la pagina davos
porscha el ultra da quai bleras infurmaziuns supplementaras davart Cuira
ch'èn interessantas per famiglias.
Il plan da la citad per uffants na sa drizza dentant betg mo a la
populaziun indigena, anzi, el ha er ina impurtanza turistica. Il plan
ch'è gratuit contribuescha segir sia part che la visita da Cuira da
giasts da las destinaziuns da vacanzas en vischinanza e d'excursiunistas
e d'excursiunists d'in di che vegnan si da la Bassa daventa in eveniment
captivant che plascha a las famiglias. Quest plan da la citad per
uffants survegn ins en ils museums da Cuira, tar l'infurmaziun turistica
a la staziun da Cuira, tar las uniuns da traffic sco er en blers auters
lieus.
Il museum da la natira dal Grischun, il museum retic ed il museum
d'art dal Grischun offreschan ina ritga purschida da la pedagogia da
museum, da la quala profitan oravant tut scolas da tut il chantun e da
las regiuns cunfinantas. Adina pli savens vulessan ils museums dentant
er tschiffar l'attenziun da visitadras individualas e da visitaders
individuals ed als metter a disposiziun - independentamain da guids da
gruppas - purschidas d'intermediaziun ch'èn attractivas e che pon vegnir
utilisadas en differentas modas. Per quest uschenumnà sectur dal temp
liber han las partiziuns per pedagogia da museum ed il post per
marketing da cultura sviluppà per famiglias quest plan da la citad per
uffants.
Plan da la citad da Cuira per uffants
Direcziun dal project:
Sabina Studer
Concept:
Flurin Camenisch (museum da la natira dal Grischun), Barbara Redmann
(museum retic), Sabina Studer (museum d'art dal Grischun), Charlotte
Schütt (marketing da cultura/da PR)
Illustraziuns:
Karin Negele, www.illustration.li
Creaziun:
Rolf Vieli, atelier WORTbild, Maiavilla
Empustaziuns dal plan da la citad per uffants sut
info-gr@graubuendenkultur.ch u sut tel. 081 254 16 00.
Ulteriuras infurmaziuns e pussaivladad da chargiar communicaziuns
per las medias e maletgs sin l'agen computer sut
www.graubuendenkultur.ch, sectur "medias".
Contact: Charlotte Schütt, marketing da cultura, uffizi da cultura
dal Grischun, tel. 081 254 16 08, charlotte.schuett@afk.gr.ch
Gremi: uffizi da cultura
Funtauna: rg uffizi da cultura