Per burgaisas e per burgais ch'èn tschorvs, che han in impediment da la vesida u che han uschiglio difficultads da leger porscha il chantun Grischun a partir d'immediat ses documents da votaziun gratuitamain en furma d'ina revista auditiva. En collavuraziun cun la biblioteca svizra per umans tschorvs ed impedids da la vesida BST vegn quella producida en il format internaziunal DAISY e distribuida sco disc cumpact. Cudeschs e revistas en il format DAISY pon vegnir tadlads cun agid da giraders spezials da DAISY dentant er sin in computer u sin tut ils giraders da CD e da DVD ch'èn endrizzads per il format MP3.
Il chantun Grischun resguarda quest servetsch supplementar per burgaisas e per burgais che han in impediment da la vesida sco bun per votaziuns chantunalas. Il medem sistem vegn gia applitgà tar votaziuns federalas sco er en auters chantuns ed en differentas citads e vischnancas. Il chantun Grischun fa quint cun custs annuals tranter 2'000 e 3'000 francs.
Persunas ch'èn tschorvas, che han in impediment da la vesida u che han uschiglio difficultads da leger e che vulessan survegnir lur documents da votaziun en l'avegnir sco revista auditiva da DAISY pon abunar quella directamain tar la BST. L'adressa da contact sa cloma: medienverlag@sbszh.ch u telefon 043 333 32 32.

Gremi: chanzlia chantunala dal Grischun
Funtauna: rg chanzlia chantunala dal Grischun