La dretgira administrativa ha refusà dus recurs cunter la NGF grischuna, uschenavant ch'ella è entrada sin quels. Ella conferma l'opiniun dal cussegl grond e da la regenza, che la NGF grischuna observia il princip da l'unitad da la materia. Uschia po il project vegnir suttamess ils 7 da mars 2010 a la votaziun dal pievel. Sch'il pievel grischun accepta la NGF grischuna, po ella vegnir introducida sco planisà per il 1. da schaner 2011.

Mez zercladur 2009 ha il cussegl grond approvà cun 88 cunter 22 vuschs il project davart la nova concepziun da la gulivaziun da finanzas e da la repartiziun da las incumbensas tranter il chantun e las vischnancas (NGF grischuna). Cunter quest project èn vegnids inoltrads la fin da zercladur e mez avust 2009 dus recurs tar la dretgira administrativa.

La dretgira administrativa è sa fatschentada intensivamain cun las objecziuns, resguardond ina correspundenza voluminusa tranter las parts pertutgadas, numnadamain las recurrentas ed ils recurrents, il cussegl grond e la regenza grischuna. En sia sentenzia dals 9 d'october 2009 vegn la dretgira administrativa a la conclusiun ch'il project davart la NGF grischuna, deliberà dal cussegl grond, na cuntrafa betg al princip da l'unitad da la materia. Anzi, en il senn d'in concept per in grond project da refurma è el cumpatibel cun quest princip impurtant che duai garantir che las votantas ed ils votants possian manifestar lur voluntad en moda nunfalsifitgada. Qua tras conferma la dretgira administrativa la legalitad da la NGF grischuna. Sin duas ulteriuras contestaziuns n'è la dretgira administrativa betg entrada per motivs formals: l'emprima pretendeva che las contribuziuns da las vischnancas per scolaras e per scolars dal gimnasi inferiur cuntrafetschian a la constituziun, l'autra era da l'avis che las contribuziuns che las vischnancas finanzialmain fermas han da pajar per finanziar la gulivaziun da las resursas disfavurisassan nungiustifitgadamain las vischnancas cun bleras resursas.

La votaziun dal pievel po pia avair lieu. Resguardond las sentenzias da la dretgira administrativa, vegn la regenza a fixar ils 7 da mars 2010 sco data per questa votaziun.

La NGF grischuna è in project cumplessiv che persequitescha en moda consequenta las finamiras surordinadas da reordinar la gulivaziun da finanzas entaifer il chantun sco er da detretschar uschè bain sco pussaivel las incumbensas ed ils moviments da finanzas tranter il chantun e las vischnancas.


Infurmaziuns:
- cusseglier guvernativ dr. Martin Schmid, schef dal departament da finanzas e vischnancas, tel. 081 257 32 01
- dr. Jon Domenic Parolini, deputà e president da la cumissiun per politica da stadi e strategia, tel. 081 860 03 05, natel 079 280 72 92

Gremi: regenza
Funtauna: rg chanzlia chantunala dal Grischun