La regenza grischuna beneventa l'installaziun d'in register central davart ils supplements da famiglia sco ch'el vegn proponì da la confederaziun. Cun las midadas correspundentas da la lescha federala davart ils supplements da famiglia va ella da princip d'accord.
Sco quai che la regenza scriva en sia resposta da consultaziun, simplifitgeschia l'installaziun d'in register davart ils supplements da famiglia la procedura da scleriment. In tal register garanteschia ch'ils supplements da famiglia na vegnian betg pajads duas giadas. Plinavant beneventa la regenza che la gestiun dal register duaja vegnir surdada a la cassa centrala da cumpensaziun da la AVS. Sulettamain en il sectur da la finanziaziun è la regenza da l'avis che la soluziun proponida na saja betg adequata. Empè da las cassas da cumpensaziun per famiglias e da las cassas da dischoccupaziun duaja la confederaziun surpigliar la finanziaziun.

La revisiun da l'ordinaziun davart las lavurantas ed ils lavurants tramess en Svizra vegn da princip beneventada
La regenza grischuna beneventa da princip la revisiun da l'ordinaziun davart las lavurantas ed ils lavurants tramess en Svizra, en spezial la nova regulaziun per finanziar la controlla d'interpresas svizras. Percunter refusa la regenza da determinar in dumber da controllas minimal fix en l'ordinaziun, sco ch'ella scriva en sia resposta da consultaziun.
La revisiun ha cunzunt l'intent da meglierar l'execuziun dal sistem da las mesiras accumpagnantas tar la libra circulaziun da persunas. Da nov duain las cumissiuns pariteticas vegnir indemnisadas er per controllar persunas ch'èn suttamessas a l'obligaziun d'annunzia e ch'èn emploiadas tar interpresas svizras. Fin ussa vegnivan indemnisadas mo las controllas d'interpresas estras che tramettan lavurantas e lavurants en Svizra. Questa novaziun stimulescha ils organs cumpetents da controllar pli savens er manaschis indigens. Tenor l'avis da la regenza è quai da beneventar. Pervia da l'extensiun dals contracts bilaterals sin la Rumenia e sin la Bulgaria vul la confederaziun plinavant augmentar en l'avegnir il dumber da controllas per var 20 pertschient e fixar quest dumber ad almain 27'000 controllas per onn. Tenor la regenza na saja dentant betg necessari da determinar en l'ordinaziun in dumber da controllas minimal fix. Per ademplir questa valur previsa stuessan singuls manaschis esters numnadamain vegnir controllads pliras giadas, e quai na saja betg raschunaivel.

Consentiment a la revisiun da la lescha federala davart scussiun e concurs
La regenza grischuna beneventa la direcziun che la confederaziun ha tschernì per proceduras da sanaziun en il rom da la revisiun parziala da la lescha federala davart scussiun e concurs. La revisiun porta differentas novaziuns en la procedura d'accumodament, en la quala i duai vegnir integrada la pussaivladad da suspender il concurs. Uschia stess il moratori a disposiziun en l'avegnir a tut las furmas d'interpresa e betg mo a la societad anonima. Tras differentas autras meglieraziuns en tscherts puncts duai vegnir facilitada ina sanaziun en la pratica.

Da vischnancas e da regiuns
- Differentas vischnancas: La regenza approvescha il project "Reparaziun d'averturas 2009", in project collectiv da differentas vischnancas. Tras il project duain vegnir reparadas diversas vias da guaud. Als custs da totalmain 157 objects da reparaziun vegnan garantidas contribuziuns da maximalmain 11'286'000 francs.
- Trun: Il project "Engrondiment dal rempar da lavinas Munt" da la vischnanca da Trun vegn approvà e sustegnì cun ina contribuziun chantunala da maximalmain 624'000 francs.
- Alvaschagn - Vaz: Il plan dal cunfin tranter las vischnancas d'Alvaschagn e da Vaz vegn approvà.
- Arosa - Vaz: Il plan dal cunfin tranter las vischnancas d'Arosa e da Vaz vegn approvà.

Contribuziuns chantunalas a differentas instituziuns
- Sistem interchantunal da mesiraziun e d'infurmaziun (IMIS): Als custs per manar e per mantegnair las staziuns dal sistem interchantunal da mesiraziun e d'infurmaziun 2000 (IMIS) da l'institut federal per la perscrutaziun da naiv e lavinas sco er differents sistems da preavertiment en il chantun Grischun vegn pajada ina contribuziun da 199'760 francs.

Projects da vias
La regenza ha approvà totalmain 14'255'000 francs per construir e per sanar ils suandants trajects da vias:
- via dal Güglia: lavurs d'impressari, Mot - Sur Gonda, Bögia e tumbin a Grevasalvas; lavurs d'impressari e da cuvrida, Spinatobel
- via dal pass dal Fuorn: lavurs d'impressari e da cuvrida, Ova dal Sagl - Laschadura
- via da Seewis: lavurs da cuvrida

Chaussas persunalas
Paul Engi, domicilià a Cuira, è vegnì elegì sco substitut dal manader da l'uffizi per la scola populara ed il sport.

Gremi: regenza
Funtauna: rg chanzlia chantunala dal Grischun