Las disposiziuns legalas chantunalas davart il register da commerzi duain vegnir adattadas a las directivas da la confederaziun midadas. La regenza grischuna ha deliberà la revisiun parziala correspundenta da la lescha introductiva tar il dretg d'obligaziuns svizzer per la consultaziun.
Per il 1. da schaner 2008 aveva la confederaziun revedì totalmain l'ordinaziun federala davart il register da commerzi. Questas adattaziuns han consequenzas per las proceduras e per las cumpetenzas sco er per las instanzas da surveglianza, da recurs e da multas. Er las disposiziuns en connex cun societads che vegnan extinguidas d'uffizi en il register da commerzi ed en connex cun la reinscripziun d'unitads giuridicas extinguidas èn vegnidas midadas.
A quellas midadas sto ussa er vegnir adattà il dretg chantunal. Uschia ston vegnir regladas da nov la surveglianza dal register da commerzi e la via da recurs. Tenor il dretg vertent è l'autoritad da surveglianza er l'instanza da recurs. Da nov vegni differenzià tranter ina surveglianza administrativa (sco fin ussa il departament d'economia publica e fatgs socials) ed ina instanza da recurs giudiziala (dretgira chantunala). La finamira da l'adattaziun è quella da pussibilitar cun ina legislaziun concisa proceduras favuraivlas e sveltas. Las novas disposiziuns chantunalas davart il register da commerzi duain vegnir regladas en la lescha introductiva chantunala tar il dretg d'obligaziuns svizzer.
Ils documents da consultaziun èn publitgads sin la pagina d'internet dal departament d'economia publica e fatgs socials www.dvs.gr.ch sut la rubrica temas / projects. La consultaziun dura fin ils 31 d'avust 2009.

Infurmaziuns:
president da la regenza Hansjörg Trachsel, schef dal departament d'economia publica e fatgs socials, tel. 081 257 23 01

La regenza va da princip d'accord cun schluccar il scumond da la diagnostica da preimplantaziun
La regenza grischuna è da princip d'accord cun la proposta da la confederaziun per midar la lescha davart la medischina da reproducziun. La revisiun abolescha il scumond vertent da la diagnostica da preimplantaziun en la lescha davart la medischina da reproducziun. Resguardond il princip da la dignitad umana definescha la revisiun cundiziuns generalas severas, sut las qualas la diagnostica da preimplantaziun duai esser accessibla per pèrs pertutgads. Quai duai valair per pèrs, tar ils quals igl exista - pervia da lur disposiziun ereditara - in grond privel ch'els transmettian a lur uffants la disposiziun per ina greva malsogna.
Sco quai che la regenza declera en sia resposta da consultaziun, s'avra en connex cun quest tema in champ da tensiun tranter las pussaivladads tecnicas ed ils giavischs da la societad. Uschia sto vegnir garantì ch'i vegnan fatgas controllas severas. Gist en la medischina da reproducziun datti numnadamain in grond potenzial d'abus.

Da vischnancas e da regiuns
- Engiadina bassa: La regenza approvescha la lescha davart il svilup dal territori e davart il plan directiv che la radunanza da la corporaziun regiunala Pro Engiadina bassa ha concludì ils 17 da zercladur 2008. Plinavant vegni prendì enconuschientscha dal program da plirs onns concernent il svilup regiunal dal territori da l'Engiadina bassa che resguarda la perioda dals onns 2009 fin 2011. Per la realisaziun vegn deliberà in credit limità da 100'000.- francs.
- Viamala: Il plan directiv regiunal per cuntradas da cultura cun edifizis marcants per la cuntrada da la Val Schons, ch'era vegnì concludì da la corporaziun regiunala RegioViamala ils 26 da november 2008, vegn approvà e vegn declerà sco liant per las autoritads dal chantun Grischun.
- Fläsch: La revisiun totala da la planisaziun locala da la vischnanca da Fläsch dals 3 da november 2008 vegn approvada cun tschertas resalvas ed instrucziuns.
- Malans: La revisiun totala da la planisaziun locala da la vischnanca da Malans dals 29 d'october 2008 vegn approvada cun tschertas cundiziuns, resalvas ed instrucziuns.
- Masagn e Flearda: A las vischnancas da Masagn e da Flearda vegn garantida ina contribuziun da 415'800 francs als custs per renovar il provediment d'aua.
- Mut: A la vischnanca da Mut vegn garantida ina contribuziun da 123'750 francs als custs per engrondir il provediment d'aua.

Contribuziuns chantunalas a differentas instituziuns
- Institut per la perscrutaziun da guaud, naiv e cuntrada: Vi dals custs per il project da perscrutaziun "GuGrC - il guaud grischun e la midada dal clima: retschertgas davart l'impurtanza da la sitgira per la dinamica da creschientscha da las plantas en il guaud" da l'institut federal per la perscrutaziun da guaud, naiv e cuntrada (WSL) sa participescha il chantun Grischun cun ina contribuziun da totalmain 240'000 francs. Questa contribuziun vegn repartida sin ils onns 2009 fin 2011.
- GKB-SPORTKIDS: Il program per la promoziun da la generaziun giuvna dals GKB-SPORTKIDS survegn per l'onn da trenament 2009/2010 ina contribuziun da 145'000 francs or dal fond da sport.
- Club alpin svizzer (CAS), secziun Bregaglia: La sanaziun da la chamona "SASC-Furä" da la secziun CAS da la Bregaglia vegn sustegnida cun ina contribuziun maximala da 29'200 francs or dal fond da sport.
- Uniun "Alpenbikepark": A l'uniun "Alpenbikepark" vegn garantida ina contribuziun maximala da 27'900 francs or dal fond da sport per construir ina senda per velos da muntogna.

Projects da vias
La regenza ha approvà totalmain 1'285'000 francs per construir e per sanar il suandant traject da via:
- via sursilvana: lavurs d'impressari e da cuvrida, Vallorca

Gremi: regenza
Funtauna: rg chanzlia chantunala dal Grischun