Suenter las elecziuns da renovaziun dals 13 da zercladur 2010 ha la regenza grischuna repartì oz ils departaments a chaschun da sia sesida.
Il cusseglier guvernativ novelegì, Mario Cavigelli, surpiglia il departament da construcziun, traffic e selvicultura. Il segund cusseglier guvernativ novelegì, Martin Jäger, daventa schef dal departament d'educaziun, cultura e protecziun da l'ambient. Els vegnan ad entrar en uffizi il 1. da schaner 2011. Naginas midadas datti tar la direcziun dals trais ulteriurs departaments.
Per la proxima perioda d'uffizi dal 1. da schaner 2011 fin ils 31 da december 2014 sa preschenta la repartiziun dals departaments e la regulaziun da las substituziuns sco suonda:
- Departament d'economia publica e fatgs socials, schef: cusseglier guvernativ Hansjörg Trachsel; substitut: cusseglier guvernativ Martin Jäger
- Departament da giustia, segirezza e sanadad, scheffa: cussegliera guvernativa Barbara Janom Steiner; substitut: cusseglier guvernativ Mario Cavigelli
- Departament d'educaziun, cultura e protecziun da l'ambient, schef: cusseglier guvernativ Martin Jäger; substitut: cusseglier guvernativ Hansjörg Trachsel
- Departament da finanzas e vischnancas, schef: cusseglier guvernativ Martin Schmid; substituta: cussegliera guvernativa Barbara Janom Steiner
- Departament da construcziun, traffic e selvicultura, schef: cusseglier guvernativ Mario Cavigelli; substitut: cusseglier guvernativ Martin Schmid
Gremi: regenza
Funtauna: rg chanzlia chantunala dal Grischun