A partir d'immediat èsi permess da pestgar cun ina patenta chantunala en il lai d'accumulaziun sin l'Alp Nagens sur Laax. Quai ha decidì l'uffizi da chatscha e pestga, integrond il lai en la glista da las auas chantunalas da pestga.

Sin giavisch da la vischnanca da Laax, da las telefericas Arena alva SA (FinanzInfra) e da l'uniun DryFly ha l'uffizi da chatscha e pestga examinà minuziusamain, sch'il lai d'accumulaziun, ch'è vegnì construì sin l'Alp Nagens per intents da far naiv, possia vegnir utilisà per la pestga.

L'uffizi è vegnì a la conclusiun che la situaziun dal lieu saja attractiva e ch'i saja pussaivel da cultivar quest lai artifizial en moda modesta cun litgivas giaglias. La fin da zercladur 2010 ha l'uffizi mess in effectiv inizial da litgivas giaglias da differentas classas da grondezza en il lai. En l'avegnir duai il lai vegnir cultivà mintg'onn cun in pèr tschients peschs giuvens d'in onn.

La pestga en il lai d'accumulaziun da Nagens è libra a partir d'immediat per tut tgi che posseda la patenta chantunala da pestga. Patentas d'in di pon vegnir retratgas tranter auter en l'ustaria da l'Alp Nagens. Per pestgar en il lai da Nagens valan las prescripziuns chantunalas da pestga. A partir da la stagiun 2011 vegn il lai integrà cun il numer da statistica da pestga 1025 en la glista da las auas chantunalas da pestga.


Infurmaziuns:
- dr. Marcel Michel, biolog da peschs, uffizi da chatscha e pestga, tel. 081 257 38 94


Gremi: uffizi da chatscha e pestga
Funtauna: rg uffizi da chatscha e pestga