Punctualmain, per il cumenzament dal nov onn da scola, han pudì vegnir terminadas las lavurs da construcziun a la scola chantunala Halde a Cuira. Suenter in temp da construcziun da trais onns e suenter lavurs da sanaziun fitg vastas e cumplexas stat puspè a disposiziun a la scola l'entir cumplex d'edifizis.
 
Il zercladur 2006 aveva il cussegl grond concedì in credit d'impegn da 50 milliuns francs per la sanaziun architectonica da la scola chantunala Halde. Circa in onn pli tard han cumenzà las lavurs da construcziun. La sanaziun totala è vegnida fatga en duas etappas, mantegnend ina part dal manaschi. A medem temp ha il manaschi da scola gì lieu en provisoris ch'èn vegnids construids da nov e che cuntegnevan 40 stanzas da scola.
 
Suenter che l'emprima etappa è vegnida terminada a temp la stad 2009 po ussa vegnir averta punctualmain, per il cumenzament da la scola, er la part da l'edifizi ch'è vegnida renovada en la segunda ed ultima etappa.

In element impurtant da la vasta sanaziun ch'è vegnida incumbensada dal chantun è stada l'eliminaziun fitg custaivla e pretensiusa da las substanzas nuschaivlas PCB ed asbest. Las finamiras severas ch'eran vegnidas prescrittas per sanar las substanzas nuschaivlas èn vegnidas cuntanschidas tuttas ed èn vegnidas confermadas tras mesiraziuns da controlla.
 
Ultra da las vastas sanaziuns da las substanzas nuschaivlas ha l'edifizi survegnì ina fatschada autamain termoisolanta, ina tecnica da chasa moderna ed in nov interiur cunvegnent. Las infrastructuras tecnicas correspundan a las enconuschientschas didacticas las pli novas. Las scolaras, ils scolars e las persunas d'instrucziun da la scola chantunala grischuna han pia a disposiziun locals da scola equipads tenor las enconuschientschas las pli novas.

Grazia a l'engaschament ed a la collavuraziun excellenta tranter il patrun da construcziun e l'interpresa generala ch'è vegnida incumbensada han tut las finamiras dal project pudì vegnir observadas cumplainamain, saja quai areguard la qualitad, areguard ils custs ed areguard ils termins.

La scola chantunala sanada Halde vegn ad esser accessibla per il vast public a chaschun da l'inauguraziun, ils 29 ed ils 30 d'october 2010.


Infurmaziuns:
Markus Dünner, architect chantunal, uffizi da construcziun auta, tel. 081 257 36 31


Gremi: uffizi da construcziun auta
Funtauna: rg uffizi da construcziun auta