L'expulsiun d'ina famiglia siriana mez fanadur è procedida correctamain e las reproschas ch'èn vegnidas fatgas envers l'uffizi da fatgs da polizia e da dretg civil sco er envers la polizia chantunala sa mussan d'esser nungiustifitgadas. Quest resultat han gì ils scleriments che cussegliera guvernativa Barbara Janom Steiner, scheffa dal departament da giustia, segirezza e sanadad, aveva incumbensà suenter las reproschas da differentas organisaziuns e da differentas persunas. Mesemna avantmezdi ha ella orientà la publicitad en chaussa ensemen cun l'advocat dr. Andrea Cantieni, Cuira, che ha fatg ils scleriments.

En connex cun l'expulsiun da la famiglia siriana da sis persunas èsi vegnì reproschà als posts cumpetents dal chantun d'avair agì en moda sproporziunada e d'avair violà uschia tant la convenziun davart ils dretgs da l'uffant sco er la convenziun cunter la tortura ed autras disposiziuns legalas sco per exempel dal dretg davart las persunas estras e dal dretg d'asil e la finala er la lescha davart l'applicaziun da mesiras repressivas.

Tut las reproschas vegnan refutadas
Per schliar questas reproschas aveva cussegliera guvernativa Barbara Janom Steiner incumbensà l'advocat dr. Andrea Cantieni da far scleriments davart l'expulsiun. Per ses rapport ha dr. Cantieni fatg tranter auter discurs cun tut las persunas dal chantun e da la confederaziun ch'èn stadas participadas a l'expulsiun, cun represchentantas e cun represchentants d'Amnesty International e da l'uniun "Miteinander Valzeina" sco er cun praschuniers da la praschun chantunala dal Sennhof ed ha consultà ils maletgs da surveglianza dal Sennhof. Ils scleriments da dr. Cantieni han ussa mussà che las reproschas èn nunfundadas u fallidas.

Las pretensiuns ch'ils collavuraturs da la polizia chantunala u da l'uffizi da fatgs da polizia e da dretg civil hajan bittà las persunas che stuevan vegnir expulsadas "sco poppas" en il bus, èn sa mussadas – sin fundament dals maletgs da video – gist uschè inexactas sco la reproscha ch'ils uffants sajan vegnids transportads separadamain da lur geniturs e n'hajan er betg vis lur geniturs durant il sgol a Damascus, sco che las explicaziuns da las persunas che han accumpagnà il sgol han cumprovà.

Er la reproscha ch'ils uffants sajan stads traumatisads, cur ch'els èn arrivads a Damascus, na sa lascha betg confermar. Ni las persunas accumpagnantas ni il medi accumpagnant e las flight attendants n'han percepì indicaziuns correspundentas sin fundament dal cumportament dals uffants. Perencunter han questas persunas crititgà vehementamain ils geniturs che han fatg tema a lur uffants durant il sgol e suenter l'atterrament a Damascus cun smanatschas e cun sbragir ad auta vusch.

Betg violà prescripziuns legalas
Las mesiras da fixaziun che la polizia chantunala ha prendì èn er vegnidas crititgadas. Talas mesiras, sco metter en chadainas ils mauns ed ils pes u sco metter si ina chapellina, èn previsas tenor la lescha per in'expulsiun sfurzada ed èn sa mussadas en quest cas sco necessarias e proporziunalas. D'ina vart servan las mesiras a proteger las persunas che ston vegnir expulsadas gist tuttina sco las persunas accumpagnantas. Da l'autra han ils conjugals refusà adina puspè da partir voluntarmain da la Svizra. Ultra da quai ha la mamma smanatschà repetidamain da mazzar sasezza ed ils uffants, sch'els ston bandunar la Svizra.

En il rapport vegni perquai constatà ch'ils collavuraturs chantunals ch'èn stads participads a l'expulsiun hajan prestà ina lavur professiunala e n'hajan betg violà ni la convenziun davart ils dretgs da l'uffant ni la convenziun cunter la tortura ni autras prescripziuns legalas e ch'els hajan agì en moda adequata.

La scheffa dal departament da giustia, segirezza e sanadad ha incumbensà in post neutral da far ils scleriments suenter che differents praschuniers da la praschun dal Sennhof avevan crititgà en ina brev averta il proceder da las autoritads en il Sennhof e suenter che la secziun svizra d'Amnesty International aveva medemamain fatg reproschas ils 29 da fanadur 2010. L'expulsiun da la famiglia siriana è daventada necessaria perquai che sia dumonda d'asil sco er ses recurs cunter la decisiun d'asil negativa èn vegnids refusads e perquai ch'ils conjugals han refusà consequentamain – malgrà ch'il termin da partenza era scadì – da bandunar voluntarmain la Svizra. Ultra da quai han els refusà tutta cooperaziun per procurar palpiris dal pajais d'origin. Mez fanadur da quest onn ha l'uffizi da fatgs da polizia e da dretg civil en collavuraziun cun la polizia chantunala perquai stuì expulsar en Siria la famiglia da sis persunas, e quai davent dal Sennhof a Cuira, nua ch'il bab seseva en arrest d'expulsiun.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: departament da giustia, segirezza e sanadad
Funtauna: rg departament da giustia, segirezza e sanadad