A chaschun da sia ultima sesida ha la regenza grischuna formulà sia posiziun davart il cuntraproject tar l'iniziativa dal pievel "giuventetgna + musica". Ella sustegna il cuntraproject da la cumissiun dal cussegl dals chantuns per scienza, educaziun e cultura. Ultra da quai ha la regenza tractà differentas fatschentas da vischnancas e da regiuns.

Sustegn per il cuntraproject tar l'iniziativa dal pievel "giuventetgna + musica"
La regenza grischuna sustegna il cuntraproject direct tar l'iniziativa dal pievel "giuventetgna + musica". Quai scriva ella a la confederaziun en sia resposta da consultaziun davart il cuntraproject ch'è vegnì elavurà da la cumissiun dal cussegl dals chantuns per scienza, educaziun e cultura.
Tras il cuntraproject duai vegnir mantegnida la suveranitad dals chantuns en dumondas da scola, ma tuttina duai vegnir garantì ch'ils uffants e giuvenils da tut las gruppas socialas hajan access a l'instrucziun da musica. En l'avegnir duai la furmaziun musicala vegnir promovida confurm a la constituziun communablamain da la confederaziun e dals chantuns. Tenor la proposta da la cumissiun dal cussegl dals chantuns duai la confederaziun fixar sulettamain ils princips da la furmaziun musicala ordaifer la scola, entant che l'instrucziun da musica en las scolas duai restar en il champ da cumpetenza dals chantuns.
Tenor l'avis da la regenza stoi vegnir separà cleramain tranter ils champs da cumpetenza da la confederaziun e dals chantuns en il sectur da la scola. Uschia stoi per exempel esser e restar chaussa dals chantuns da fixar il dumber da lecziuns. Tenor l'opiniun da la regenza stuess il medem valair er per l'instrucziun da sport. Ordaifer la scola ston plinavant vegnir rinforzadas en mintga cas las stentas da las scolas da musica en il rom da la lescha federala davart la promoziun da la cultura. Independentamain da las relaziuns finanzialas stoi esser pussaivel per tut ils giuvenils d'emprender in instrument da lur tscherna. Er en vista a la gronda impurtanza da l'instrucziun artistica sustegna la regenza expressivamain il cuntraproject.

Da vischnancas e da regiuns 

• Bregaglia e Val Puschlav: Per il manaschament regiunal vegn garantida a la vischnanca da Bregaglia ed a la regiun Val Puschlav – per la perioda 2011 fin 2015 – ina contribuziun totala da maximalmain 825'000 francs u da 165'000 francs per onn en il rom da la nova politica regiunala da la confederaziun (NPR).
• Nufenen: Il project per revitalisar il Rain posteriur en il Enisch Boden a Nufenen vegn approvà. Als custs per l'emprim project parzial vegnan concedidas contribuziuns federalas e chantunalas da maximalmain 350'000 francs.
• Sursaissa: La revisiun parziala da la planisaziun locala da la vischnanca da Sursaissa, ch'è vegnida concludida da la radunanza communala ils 11 da december 2009 e che sa referescha al project per construir in center d'hotel e da sanadad en il territori da Chanzla, vegn approvada.

 
Projects da vias
La regenza ha approvà totalmain 3'083'000 francs per construir e per sanar il suandant traject da via:
- via dal Flüela: lavurs d'impressari e da cuvrida, stortas, Russatsch


Gremi: regenza
Funtauna: rg chanzlia chantunala dal Grischun