La regenza grischuna ha concludì da rinforzar l'engaschament finanzial dal chantun per la construcziun e per l'engrondiment da la plattafurma turistica electronica. Cun quai duai la colliaziun sco er la commerzialisaziun innovativa ed electronica da la purschida per il turissem vegnir cuntinuada cun success.

Ulteriur sustegn per la construcziun e per l'engrondiment da la plattafurma turistica electronica dal Grischun
Il chantun investescha ulteriurs meds finanzials en la construcziun ed en l'engrondiment da la plattafurma turistica electronica (plattafurma-e GR). Cun quai duai la direcziun interna dal project vegnir rinforzada persunalmain ed il sustegn extern vegnir prolungà. Quai ha concludì la regenza grischuna. La contribuziun – per la direcziun interna dal project da la Grischun eTurissem ScRL – ch'è gia vegnida permessa pli baud, vegn auzada per 140'000.– francs sin totalmain 600'000.– francs per ils onns 2009 fin 2012. Supplementarmain ha la regenza prolungà il manaschament extern dal project tras ina firma d'informatica fin la fin da l'onn 2012.
La plattafurma-e GR è ina mesira accumpagnanta da la refurma dal turissem grischun che porta il titel "Structuras cumpetitivas e repartiziun da las incumbensas en il turissem grischun". Il project duai colliar las purschidas regiunalas da turissem en ina rait electronica, duai resumar quellas en in'unitad pratica e duai las commerzialisar communablamain. La finamira è quella da professiunalisar ils chanals da distribuziun en l'internet e da gudagnar novs giasts tras ina vendita activa.
Participads al project èn l'organisaziun per la destinaziun Tavau, l'organisaziun turistica Engiadina San Murezzan, l'Arena alva SA, la viafier retica sco er Grischun vacanzas. Ulteriuras organisaziuns turisticas vegnan medemamain cumpigliadas, uschia ch'il Grischun vegn represchentà en l'entira surfatscha.
Tenor l'avis da la regenza ha il decurs d'enfin ussa dal project che ha cumenza l'onn 2007 mussà ch'il concept innovativ da la plattafurma-e GR è gist e ch'el chatta in grond interess. Tenor la savida actuala è la plattafurma anc adina l'emprima soluziun per las interfatschas e per la vendita che vegn realisada en quella moda dad in'entira regiun turistica. Medemamain èsi sa mussà ch'il project e ch'il manaschi èn pli cumplexs che spetgà oriundamain. Novas sfidas spezialisadas e tecnicas chaschunan custs supplementars. Per cuntinuar cun la lavur constructiva d'enfin ussa e per cuntanscher ulteriurs progress en ils proxims dus onns è in ulteriur engaschament dal chantun necessari.

Da vischnancas e da regiuns 

• Seewis: La revisiun parziala da la constituziun communala da la vischnanca da Seewis, concludida da la radunanza communala ils 3 da december 2010, vegn approvada.
• San Murezzan: La revisiun parziala da la planisaziun locala concludida da la vischnanca da San Murezzan ils 13 da zercladur 2010 en vista a la nova formulaziun da las prescripziuns davart la construcziun d'emprimas abitaziuns e d'abitaziuns secundaras, vegn approvada.
• Madulain: La revisiun totala da la planisaziun locala, concludida ils 14 da december 2009 da la vischnanca da Madulain, vegn approvada.

 

Contribuziuns chantunalas a differentas instituziuns

• Chasa da dimora St. Catharina a Cazas: Il project da construcziun per la midada da construcziun da las chombras d'internat "ost" da la chasa da dimora St. Catharina a Cazas vegn approvà. A l'instituziun responsabla vegn empermessa ina contribuziun chantunala da construcziun da 656'200.– francs.

Chaussas persunalas 

• Susanna Gadient, domiciliada a Claustra, è vegnida elegida per il 1. da favrer 2011 sco substituta dal manader da l'uffizi dal servetsch social.

 

Gremi: regenza
Funtauna: rg chanzlia chantunala dal Grischun