Il Grischun extenda ses program per promover l'energia en il senn d'ina acziun speziala. Per rinforzar l'effect energetic en spezial en il sectur da l'effizienza electrica vegn cumplettà il program da promoziun vertent. Cun la "acziun per spargnar energia en il Grischun 2011" limitada stattan a disposiziun daners da promoziun da totalmain circa 1,5 milliuns francs.

Mesiras da spargn en il sectur d'energia èn sa concentradas enfin ussa en emprima lingia sin la reducziun e sin la substituziun da purtaders d'energia fossils. En il futur duain er mesiras supplementaras per duvrar l'energia electrica en moda effizienta survegnir in sustegn pli grond. L'energia la pli bunmartgada è e resta quella che na vegn betg duvrada.

Acziun limitada per spargnar energia
Contribuziuns da promoziun vegnan concedidas a favur da mesiras per meglierar l'effizienza electrica cun remplazzar apparats electrics dal tegnairchasa tras products da la "glista topten" (www.topten.ch). Promovidas vegnan frestgeras, schelenteras, maschinas da lavar e maschinas da lavar giu che han ina buna effizienza energetica. Ma er la cumpra da maschinas da sientar e da pumpas da circulaziun che dovran pauca electricitad vegn sustegnida finanzialmain. Ina part da la "acziun per spargnar energia en il Grischun 2011" furma ultra da quai la montascha facultativa d'apparats per il quint individual da l'aua chauda sco er da ventils termostatics. Dumondas per contribuziuns en il rom da questa acziun per spargnar energia pon vegnir inoltradas a partir dal 1. da settember 2011. Ils apparats na dastgan però betg vegnir acquistads ordavant. L'acziun per spargnar energia dura fin ils 31 da schaner 2012. Il termin per inoltrar ina dumonda da contribuziun scada il 1. da mars 2012.

Realisaziun en il rom da las structuras existentas
La responsabladad per realisar questa acziun limitada per spargnar energia ha l'uffizi d'energia e da traffic dal Grischun. Las mesiras da promoziun respectivas vegnan publitgadas en il fegl uffizial dal chantun e sin la pagina d'internet da l'uffizi (www.aev.gr.ch).


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01
- Erich Büsser, manader da l'uffizi d'energia e da traffic, tel. 081 257 36 21


Gremi: departament da construcziun, traffic e selvicultura
Funtauna: rg departament da construcziun, traffic e selvicultura