Martin Schmid sa retira sco commember da la regenza grischuna per il cumenzament da la sessiun d'enviern 2011 da las chombras federalas. A chaschun da sia ultima sesida ha la regenza prendì enconuschientscha da sia demissiun e fixà in'elecziun substitutiva. Plinavant ha la regenza approvà ina refurma da la scolaziun a las scolas medias commerzialas.

Elecziun substitutiva e votaziun davart ina iniziativa dal pievel ils 29 da schaner 2012
A chaschun da l'ultima sesida da la regenza grischuna ha il president da la regenza Martin Schmid communitgà ch'el demissiuneschia ordaifer il termin, e quai per ils 5 da december 2011. Quel di cumenza a Berna la sessiun d'enviern da las chombras federalas, ed a quella vegn Martin Schmid a sa participar sco cusseglier dals chantuns, suenter ch'el è vegnì elegì dal pievel grischun ils 23 d'october 2011 per la perioda d'uffizi 2011 fin 2015. La perioda d'uffizi ordinaria da la commembra e dals commembers da la regenza dura anc fin la fin da l'onn 2014. En cas d'in post vacant sto la regenza ordinar in'elecziun substitutiva per il rest da la perioda d'uffizi. Sco gia fixà ordavant ha l'elecziun substitutiva lieu ils 29 da schaner 2012. Quel di vegni er anc votà davart l'iniziativa chantunala dal pievel cunter birocrazia e reglamentaziuns nunnecessarias.

Nova scolaziun a las scolas medias commerzialas
La scolaziun a las scolas medias commerzialas en il chantun Grischun vegn refurmada ed adattada a la legislaziun federala. La regenza grischuna ha fatg ina revisiun totala da l'ordinaziun davart la scola media commerziala. Cuntrari a la regulaziun vertenta na survegnan las absolventas ed ils absolvents da las scolas medias commerzialas betg pli in diplom da commerzi renconuschì da la confederaziun suenter la scolaziun da trais onns. L'onn da praticum, che ha lieu suenter quests trais onns, è da nov ina part integrala da la scolaziun. Quella vegn terminada suenter quatter onns cun l'attestat federal da qualificaziun (AFQ) da commerzianta/commerziant, furmaziun extendida, e cun la maturitad professiunala commerziala.

La refurma vegn realisada durant ils onns da scola 2011/2012 fin 2014/2015. Pervia da las novas prescripziuns da la confederaziun han l'urari ed ils plans d'instrucziun da las scolas medias commerzialas stuì vegnir repassads cumplettamain. Dal nov concept da scolaziun divergescha la scola media commerziala da la fundaziun Gimnasi da sport a Tavau. Questa scola porscha il model d'ina scolaziun integrada che finescha cun l'AFQ, furmaziun extendida, senza maturitad professiunala.

"New World" per il Grischun
Las scolaras ed ils scolars dal Grischun vegnan ad emprender englais cun il medem med d'instrucziun sco lur collegas da la Svizra dal nordvest. Il chantun Grischun sa participescha ad in project da scola dals chantuns Berna, Basilea-Citad, Basilea-Champagna, Friburg, Soloturn e Vallais e surpiglia – tenor il conclus da la regenza – il nov med d'instrucziun obligatoric d'englais "New World" da la chasa editura Klett und Balmer per la 5. fin 9. classa. L'instrucziun d'englais che cumenza a partir da la 5. classa primara vegn introducida per l'onn da scola 2012/2013. Englais sco segunda lingua estra obligatorica è vegnì concludì dal cussegl grond l'onn 2008 en il rom d'ina revisiun parziala da la lescha da scola.

Contribuziun per il studi consecutiv davart la colliaziun da viafier tranter l'Engiadina ed il Vnuost
La regenza grischuna sustegna in ulteriur studi da project davart la colliaziun da viafier tranter l'Engiadina ed il Vnuost (Italia). Quest studi duai en emprima lingia sclerir il niz per l'economia publica ed il trassé da la colliaziun da viafier. En il rom dal program Interreg IV sa participescha il chantun Grischun cun ina contribuziun da 75 pertschient als custs da l'emprima fasa d'elavuraziun dal project da viafier. Als purtaders dal project vegn concedì in pajament da 180'000 francs.

Il project d'ina colliaziun da viafier tranter l'Engiadina ed il Vnuost ha l'intent da serrar ina largia en la rait da viafier da l'Europa. La lingia da viafier duai colliar dus spazis economics e culturals impurtants – la Svizra bassa cun Venezia/Italia dal nord sco er il Grischun cun il Tirol dal sid – ed integrar la rait da viafier dal Grischun en la rait da viafier da l'Europa. La realisabladad da quest project è gia vegnida sclerida l'onn 2006. L'onn 2009 han il departament da traffic da la provinza autonoma Bulsaun/Tirol dal sid e la corporaziun regiunala Engiadina bassa-Val Müstair inoltrà in project consecutiv.


Da vischnancas e da regiuns

• Grüsch: Ils novs statuts dal consorzi per aua persa dal Partenz davant vegnan approvads. 
• Guarda: La revisiun parziala da la planisaziun locala, concludida da la vischnanca da Guarda ils 7 da zercladur 2011, vegn approvada. 
• Samignun: Per il project "Lavuratori communal da Samignun" da la vischnanca da Samignun vegn garantida ina contribuziun da maximalmain 258'500 francs.

Contribuziuns chantunalas a differentas instituziuns

• Cavegn SA a Landquart: Per renovar ils binaris da colliaziun da la firma Christian Cavegn SA a Landquart vegn garantida ina contribuziun chantunala da maximalmain 152'728 francs.

Projects da vias
La regenza ha approvà 450'000 francs per lavurs da construcziun sin il suandant traject:
- via da l'Alvra: lavurs d'impressari e da cuvrida, Tranter ils Craps – Punt Ota


Gremi: regenza
Funtauna: rg chanzlia chantunala dal Grischun