Fin la fin da l'onn da scola 2013/14 pon Tavau e Tusaun mantegnair ils andaments en il sectur da la pedagogia speziala ch'els han elavurà sco vischnancas da pilot. Quai ha concludì la regenza grischuna. Ultra da quai ha la regenza prendì enconuschientscha dal fatg che l'iniziativa chantunala dal pievel "Gea ad electricitad netta senza forza electrica da charvun" è reussida sco er d'in nov agid da lavur per concepts communals d'energia.

Ina soluziun transitorica per Tavau e per Tusaun
Ils projects da pilot concernent il concept grischun da pedagogia speziala che vegnan pratitgads en las vischnancas da Tavau e da Tusaun valan sco terminads uffizialmain per la fin da l'onn da scola 2011/12. La regenza grischuna ha però concedì a questas duas vischnancas da cuntinuar cun ils projects da pilot – en il senn d'ina soluziun transitorica – fin la fin da l'onn da scola 2013/14 respectivamain maximalmain fin che la nova lescha da scola entra en vigur. Il chantun paja en quest connex las pauschalas annualas ch'èn vegnidas fixadas enfin ussa. Tenor l'avis da la regenza chaschunass in return da las vischnancas da pilot als andaments tradiziunals ed a las furmas da promoziun tradiziunalas en il sectur da las mesiras da la pedagogia speziala – avant che la nova lescha da scola è en vigur – fitg grondas difficultads tar la realisaziun.

Ils projects da pilot a Tavau ed a Tusaun èn vegnids instradads l'onn 2008. Questas duas vischnancas han stuì examinar elements centrals dal concept da pedagogia speziala ch'era vegnì deliberà da la regenza l'onn 2007. D'ina vart ha la promoziun da la pedagogia speziala stuì vegnir concepida en moda integrala. Da l'autra vart valevi da concepir da nov las structuras da collavuraziun en quest sectur.
In rapport tar l'evaluaziun dals projects da pilot publitgà il cumenzament da l'onn 2010 da la scola auta da pedagogia da Turitg ha mussà ch'ils aspects positivs da l'integraziun en il sectur da la pedagogia speziala predomineschan. L'uffizi chantunal per la scola populara ed il sport ha alura elavurà in rapport 2011 davart l'ulteriur svilup da la pedagogia speziala en il Grischun. En il rapport èn explitgadas las experientschas las pli impurtantas fatgas fin ussa en ils pojects da pilot.

L'iniziativa chantunala dal pievel "Gea ad electricitad netta senza forza electrica da charvun" è reussida
Cun 4'366 suttascripziuns valaivlas è reussida l'iniziativa chantunala dal pievel "Gea ad electricitad netta senza forza electrica da charvun". Quai ha constatà la regenza grischuna. L'iniziativa dal pievel, inoltrada ils 19 d'october 2011, è vegnida redigida sco iniziativa constituziunala en furma d'in proposta generala.
En il rom dals conclus da princip da la regenza e resguardond ils termins legals vegn l'iniziativa surdada al departament da construcziun, traffic e selvicultura per l'ulteriura elavuraziun.

Co che vischnancas pon s'acquistar in concept d'energia
L'uffizi chantunal d'energia e da traffic ha stgaffì in agid da lavur per vischnancas grischunas che vulan elavurar in concept communal d'energia. La regenza ha prendì enconuschientscha da quai.
Sa basond sin la lescha d'energia dal chantun Grischun pon vischnancas far – tenor las directivas da la regenza – in concept communal d'energia. Il nov agid da lavur infurmescha davart la dumonda tge ch'in concept communal d'energia cuntegna e co ch'ina vischnanca po proceder per elavurar in tal concept. En emprima lingia descriva in concept communal d'energia las finamiras da la politica d'energia e/u da la politica dal clima ch'ina vischnanca ha, ina strategia da realisaziun, co che questas finamiras duain vegnir cuntanschidas, in plan da mesiras concret per ils proxims onns sco er in instrument da monitoring per controllar il success. L'agid da lavur po vegnir retratg da l'uffizi d'energia e da traffic dal Grischun (www.aev.gr.ch).


Da vischnancas e da regiuns

• S-chanf: Ils statuts dal "Verband Abwasserreinigung Oberengadin (ARO)" vegnan approvads. 
• Landquart: Cun ils conclus dals 15 da matg 2011 han las vischnancas dad Igis e da Mastrils fusiunà a la nova vischnanca da Landquart. La nova denominaziun vegn approvada cun resalva dal resultat da la procedura d'approvaziun da l'uffizi federal da topografia. 
• Trun: Cun ils conclus dals 16 d'avrigl 2011 (Schlans) e dals 15 da matg 2011 (Trun) han las vischnancas da Schlans e da Trun fusiunà a la nova vischnanca da Trun. La nova denominaziun vegn approvada cun resalva dal resultat da la procedura d'approvaziun da l'uffizi federal da topografia. 
• Andeer: La revisiun parziala da la planisaziun locala, concludida da la vischnanca dad Andeer ils 22 da mars 2011, vegn approvada. En il plan general d'avertura 1:2 000 Clugén, Pignieu / Promischur / Plan Schumanet / Bavugls / Selvanera vegn midà il trassè da la via e senda da viandar en il sectur da l'abitadi Promischur en correspundenza cun il resultat d'in recurs ch'è vegnì fatg ils 15 d'avrigl 2011. 
• Lantsch: La revisiun parziala da la planisaziun locala da la vischnanca da Lantsch dals 24 da mars 2010 vegn approvada. 
• Ziràn-Reschen: La revisiun parziala da la planisaziun locala, concludida da la vischnanca da Ziràn-Reschen ils 26 d'avust 2011, vegn approvada. 
• Val Müstair: Il project "Rempar cunter bovas Taunter Ruinas" che l'uffizi da guaud e privels da la natira ha inoltrà per incumbensa da la vischnanca da Val Müstair vegn approvà. Als custs vegn concedida ina contribuziun da maximalmain 900'000 francs.

Gremi: regenza
Funtauna: rg chanzlia chantunala dal Grischun