La regenza sustegna la strategia da la protecziun da la populaziun e da la protecziun civila 2015+. Ultra da quai ha ella concludì da sa participar a la cunvegna per armonisar l'informatica da la polizia sin plaun naziunal. Plinavant ha ella relaschà ordinaziuns davart l'integraziun sociala e professiunala da persunas cun impediments e tar la lescha da geoinfurmaziun.

La strategia da la protecziun da la populaziun e da la protecziun civila 2015+ vegn beneventada
La regenza grischuna ha prendì posiziun davart la strategia da la protecziun da la populaziun e da la protecziun civila 2015+ dal cussegl federal. Il rapport dettia ina survista cumplessiva davart il stadi actual en ils secturs da la protecziun da la populaziun e da la protecziun civila, mussia champs d'acziun strategics ed illustreschia eventualas opziuns concepziunalas. Tenor la regenza grischuna èn ils puncts centrals tschernids chapaivels e corrects. Ella beneventa spezialmain ch'il rapport descriva er opziuns che surpassan las pussaivladads legalas actualas e che pretendan eventualmain midadas da leschas u schizunt da la constituziun.
En sia posiziun renda la regenza dentant er attent ch'i manchia la confruntaziun cun la dumonda da la concepziun da la lescha federala davart la protecziun da la populaziun e la protecziun civila. En quest connex è ella cleramain da l'avis ch'ils dus secturs stoppian vegnir reglads mintgin per sai en in'atgna lescha. Ultra da quai crititgescha la regenza che las opziuns per concepir l'obligaziun da far servetsch vegnan preschentadas mo marginalmain en il sboz dal rapport. Ella spetga perquai che las gruppas da lavur engaschadas en il rom da las lavurs che resultan tras quest rapport vegnian cumponidas en moda paritetica da represchentantas e da represchentants da la confederaziun e dals chantuns.

Il Grischun sa participescha a la cunvegna per armonisar l'informatica da la polizia sin plaun naziunal
La regenza grischuna ha concludì da sa participar a la cunvegna per armonisar l'informatica da la polizia en Svizra. La finamira da la cunvegna tranter la confederaziun ed ils chantuns è quella d'armonisar ils sistems d'informatica da la polizia da la Svizra e d'uschia meglierar la segirezza interna. Simplifitgar ils andaments e profitar da sinergias duai ultra da quai permetter respargns finanzials.

Relaschà l'ordinaziun davart l'integraziun sociala e professiunala da persunas cun impediments
La regenza ha mess en vigur la lescha davart l'integraziun sociala e professiunala da persunas cun impediments (lescha d'integraziun da persunas cun impediments) per il 1. da schaner 2012. Ussa ha ella anc relaschà in'ordinaziun respectiva. Las disposiziuns reglan tranter auter las cumpetenzas, las furmas organisatoricas ed ulteriurs detagls ch'èn necessaris per l'execuziun. L'ordinaziun entra en vigur retroactivamain per il 1. da schaner 2012. L'ordinaziun vertenta per promover l'integraziun da persunas creschidas cun impediments vegn abolida.

Relaschà ordinaziuns tar la lescha da geoinfurmaziun
La regenza ha mess en vigur la lescha chantunala da geoinfurmaziun per il 1. da schaner 2012. Ussa ha ella relaschà duas novas ordinaziuns respectivas. L'ordinaziun da geoinfurmaziun regla en spezial l'organisaziun sco er ils detagls tecnics areguard ils catalogs da geodatas, areguard la qualitad, areguard l'istorisaziun ed areguard l'archivaziun da las datas. La nova ordinaziun davart la mesiraziun uffiziala cuntegna detagls tecnics e detagls concernent la procedura sco er ulteriuras disposiziuns materialas en ils secturs da la termaziun, da la mesiraziun, da l'actualisaziun e dals nums geografics. Questas ordinaziuns entran en vigur per ils 15 da favrer 2012.


Da vischnancas e da regiuns

• Tavau: La revisiun parziala da la constituziun da la vischnanca da Tavau dals 28 d'avust 2011 vegn approvada. La revisiun parziala dat al parlament communal da nov la pussaivladad da destituir commembras e commembers d'autoritads communalas sut tschertas circumstanzas da lur uffizi (procedura da liberaziun da l'uffizi). 
• Grüsch / Seewis: La revisiun parziala dals statuts dal consorzi da scola Grüsch / Seewis vegn approvada. 
• Leggia: Als custs cun dretg sin gulivaziun da finanzas garantescha la regenza ina contribuziun da maximalmain 110'400 francs per construir da nov e per sanar las vias da Camon e da Risere.

Projects da vias
La regenza ha approvà 2'600'000 francs per lavurs da construcziun sin ils suandants trajects:
- Via dal Scanvetg: lavurs d'impressari e da cuvrida, Maladers – St. Peter


Gremi: regenza
Funtauna: rg chanzlia chantunala dal Grischun