Ils servetschs psichiatrics dal Grischun duain pudair sa far valair anc pli fitg sco interprendiders: La regenza ha lantschà la consultaziun tar ina revisiun respectiva da la lescha davart l'organisaziun da la psichiatria. Plinavant ha la regenza approvà la concessiun dal dretg da las auas per il project da l'ovra electrica Casti Plus.

Novas cundiziuns generalas legalas per ils SPGR
Ils servetschs psichiatrics dal Grischun (SPGR) duain survegnir la libertad d'agir sco interpresa, ch'è necessaria per pudair realisar la nova finanziaziun tenor prestaziun dals ospitals e da las instituziuns per persunas cun impediments. Per quest intent duain vegnir adattadas las cundiziuns generalas legalas vertentas da la lescha. La regenza ha dà la revisiun da la lescha davart l'organisaziun dals servetschs psichiatrics chantunals e da las chasas chantunalas da dimora per persunas cun impediments psichics dal chantun Grischun (lescha davart l'organisaziun da la psichiatria) en consultaziun fin ils 30 d'avrigl 2012. La revisiun da la lescha tracta ils suandants puncts: Als SPGR vegnan surdads – en il dretg da construcziun – ils edifizis e stabiliments necessaris per il manaschi, cun excepziun dal bain puril Waldhaus. Ils SPGR vegnan munids cun in chapital da dotaziun da maximalmain 10 milliuns francs ed han la pussaivladad da furmar reservas.

Il transferiment – en il dretg da construcziun – dals bains immobigliars ch'èn necessaris per il manaschi als SPGR gida, ord vista da la regenza, als SPGR a sa far valair en conturns da martgà che daventan adina pli dinamics. Pervia da la midada dal princip da la cuvrida dals custs a la finanziaziun dals ospitals e da las instituziuns per persunas cun impediments tenor prestaziun per il 1. da schaner 2012 ston ils SPGR ultra da quai avair avunda agen chapital per pudair ademplir da tut temp lur obligaziuns. Il chantun è interessà che la structura da la bilantscha dals SPGR na vegnia betg influenzada en moda negativa tras ina quota da chapital ester memia gronda. Ils SPGR ston pia vegnir munids cun chapital da dotaziun en ina moda ch'è adequata als ristgs. (Link als documents da consultaziun)

L'onn 2002 èn las clinicas psichiatricas chantunalas e las chasas chantunalas da dimora e da lavur per persunas cun impediments psichics vegnidas excorporadas da l'administraziun chantunala e transferidas en in institut autonom da dretg public. Questa independenza è vegnida realisada cun la finamira da dar als SPGR la libertad d'agir per ch'els possian far frunt a las pretensiuns creschentas che vegnan fatgas envers ils ospitals ed envers las clinicas da furnir las prestaziuns en moda economica. Quella giada èsi vegnì desistì da dotar l'institut cun agen chapital e d'al permetter da far reservas. Ils edifizis ed ils stabiliments vegnan mess a disposiziun dapi lura als SPGR cunter locaziun.

Approvà la concessiun per l'ovra electrica Casti Plus
La regenza grischuna ha approvà la concessiun dal dretg da las auas ch'è vegnida concedida da la vischnanca da Casti al consorzi Casti Plus ils 15/16 da settember 2010 per utilisar la forza idraulica da l'Alvra. La concessiun dal dretg da las auas vegn dada per ina durada da 75 onns a partir dal mument che l'ovra electrica planisada vegn messa en funcziun.
Il consorzi – che sa cumpona da l'Axpo SA, da l'ovra electrica da Tavau SA (EWD) sco er da l'ovra electrica da la citad da Turitg (EWZ) – ha l'intenziun d'utilisar la forza idraulica da l'Alvra en in ulteriur stgalim tranter il lieu da restituziun a la centrala existenta da l'ovra electrica da l'Alvra e da la Landwasser SA (ALK) a Casti ed il lieu da restituziun previs a la riva dal lai da fermada a Solas. L'utilisaziun sa restrenscha sin l'aua che serva per il manaschi e che pervegn dal chanal sut la centrala da l'ovra electrica a Casti. Sco simpla ovra electrica senza lai da fermada ha la futura ovra electrica Casti Plus ina prestaziun installada da 2,7 megawatts ed ina producziun annuala da ca. 11 uras da gigawatt. I vegn fatg quint cun custs d'investiziun da 23 fin 25 milliuns francs.

Il servetsch tessinais da passaports vegn extendì sin il district da la Moesa
Ina cunvegna ch'è vegnida fatga cun il chantun Tessin davart la registraziun da las datas biometricas da las abitantas e dals abitants dal district da la Moesa è vegnida extendida. Ultra da las burgaisas svizras e dals burgais svizzers domiciliads en il district da la Moesa pon ussa er persunas estras originarias da terzs stadis laschar registrar lur datas biometricas a Bellinzona per survegnir ina legitimaziun da persunas estras. La regenza grischuna ha approvà in nov contract correspundent cun il chantun Tessin.

La cumissiun da sanitad vegn schliada
La cumissiun da sanitad che aveva l'incumbensa da tractar dumondas dals fatgs da sanadad vegn schliada per conclus da la regenza per il 1. da fanadur 2012, suenter la fin da l'ultima perioda d'uffizi da 4 onns. Sin fundament da las cundiziuns generalas politicas ch'èn sa midadas pervia da la nova finanziaziun dals ospitals è la libertad d'agir legislativa sa sminuida. La necessitad d'ina cussegliaziun tras la cumissiun n'è betg pli dada.
La cumissiun da sanitad sa cumpona da 5 commembras e commembers. Presidiada vegn ella da la scheffa u dal schef dal departament da giustia, segirezza e sanadad. Las incumbensas da la cumissiun èn tranter auter cussegliar il departament; examinar las dumondas per subvenziunar edifizis ed indrizs dals ospitals e per permetter novas plazzas da schefmedis e da medis directivs. Plinavant gida ella ad elavurar, ad adattar ed ad examinar incaricas da prestaziun.


Da vischnancas e da regiuns 

• Ardez: La revisiun parziala da la planisaziun locala da la vischnanca dad Ardez dals 23 d'avust 2011 vegn approvada. Questa revisiun parziala stgaffescha las premissas da la planisaziun d'utilisaziun per realisar in concept da parcar ch'è vegnì elavurà.
• Bever/Samedan: Il project da las vischnancas da Bever e da Samedan per la revitalisaziun da las zonas umidas da l'En, 1. etappa vegn approvà cun cundiziuns. Cun resalva da la garanzia da contribuziuns federalas vegn permessa ina contribuziun chantunala da maximalmain 750'000 francs main las contribuziuns da la vischnanca e d'eventualas terzas persunas.

Contribuziuns chantunalas a differentas instituziuns

• Teater da Cuira e filarmonia da chombra dal Grischun: Il project "Churer Operettenfrühling 2012" dal teater da Cuira e da la filarmonia da chombra dal Grischun vegn sustegnì cun ina contribuziun totala en furma d'ina garanzia da deficit da maximalmain 80'000 francs.
• Contribuziuns dal fond da sport: La regenza ha concludì las suandantas contribuziuns or dal fond da sport:

  • Il project GKB SPORTKIDS, in program per promover la generaziun giuvna dal chantun Grischun a favur d'uffants da 5 e 6 onns, vegn sustegnì en total cun maximalmain 500'000 francs durant ils onns da trenament 2012/13, 2013/14 e 2014/15.

  • Per cuntinuar cun il project ma-pi (gimnastica mammas-pitschens) da la federaziun grischuna da gimnastica vegn garantida ina contribuziun da maximalmain 180'000 francs per maximalmain 3 onns respectivamain fin a l'entrada en vigur dal concept / da la lescha per la promoziun dal sport.

  • L'associaziun grischuna da sport survegn ina contribuziun da maximalmain 37'000 francs per l'onn 2012.

Gremi: regenza
Funtauna: rg chanzlia chantunala dal Grischun